ఆయన వద్ద సరైన సమాచారం లేదు.. ` ఎన్‌సీబీ అధికారి వాంఖడే
ముంబై : మహారాష్ట్ర మంత్రి నవాబ్‌ మాలిక్‌ పుకార్లు వ్యాప్తి చేస్తున్నారని, ఆయన వద్ద సరైన సమాచారం లేదని నార్కోటిక్స్‌ కంట్రోల్‌ బ్యూరో(ఎన్‌సీబీ) జోనల్‌ డైరెక్టర్‌ సమీర్‌ వాంఖడే మంగళవారం తెలిపారు. ఐఆర్‌ఎస్‌ అధికారి వాంఖడే ఖరీదైన జీవనశైలి గురించి నవాబ్‌ లేవనెత్తిన తర్వాత వాంఖడే ఈ వ్యాఖ్యలు చేశారు. ఈసారి ఆయన జీవనశైలి, ‘ఖరీదైన’ వస్తువుల వినియోగాన్ని ప్రశ్నిస్తూ, మాలిక్‌ తాజా విమర్శల దాడిని ప్రారంభించిన తర్వాత వాంఖడేకు ఆయన భార్య రెడ్కర్‌, సోదరి యాస్మిన్‌ వాంఖడే మద్దతుగా నిలిచారు. యాస్మిన్‌ వాంఖడే మాట్లాడుతూ నవాబ్‌ ‘మానసిక ఆరోగ్యాన్ని’ పరీక్షించాలని అన్నారు. ఇదిలాఉండగా, మాలిక్‌ అంతకుముందు రోజు సమీర్‌ వాంఖడేపై విమర్శలు చేస్తూ వాంఖడే కోట్లు దోపిడీ చేశారని, నిజాయతీగా ఉన్న అధికారి అంత ఖరీదైన దుస్తులు ఏ విధంగా ధరించారని ప్రశ్నించారు. అధికారి లక్ష రూపాయల ప్యాంటు, రూ.70 వేలకు పైగా ఖరీదు చేసే షర్టు, రూ.25 లక్షల నుంచి 50 లక్షల విలువైన వాచీలు ధరించినట్లు నవాబ్‌ మాలిక్‌ ఆరోపించారు. దీనిపై సమీర్‌ వాంఖడే మాట్లాడుతూ, ‘ఆయన లోఖండ్‌వాలా ప్రాంతానికి వెళ్లి నా బట్టల ధరలు ఏమిటో తనిఖీ చేయాలి. వదంతులు వ్యాప్తి చేస్తున్నాడు. ఆయన వద్ద సరైన సమాచారం లేదు. మాలిక్‌కు సమాధానం చెప్పాల్సిన అవసరం లేదు. నేను ప్రతిసారీ ఆయనకు ఎందుకు సమాధానం చెప్పాలి. నేను ప్రభుత్వ ఉద్యోగిని, నేను నా ప్రభుత్వానికి సమాధానం ఇస్తాను’ అని అన్నారు. వృత్తిరీత్యా న్యాయవాది అయిన యాస్మీన్‌ వాంఖడే మీడియా ప్రతినిధులతో మాట్లాడుతూ మాలిక్‌ అల్లుడు లగ్జరీ కార్‌ బ్రాండ్‌ జాగ్వార్‌ వంటి ఖరీదైన వాహనాల్లో తిరుగుతుంటాడని, అయితే అతని జీవనశైలి గురించి ఎవరూ ప్రశ్నించరని అన్నారు. తన సోదరుడు ఉపయోగించిన వస్తువులను తన దివంగత తల్లి ఆయనకు బహుమతిగా ఇచ్చిందని చెప్పారు. ‘మా తల్లి ఆయనకు ఈ వాచీలన్నింటినీ బహుమతిగా ఇచ్చింది. నాకు కూడా… ఇవి దాదాపు 17 సంవత్సరాల క్రితం కొన్నవి. ఒకరోజు షాపింగ్‌ చేయడానికి నా సోదరుడు ఏడాది పొడవునా డబ్బు ఆదా చేస్తాడు. ఈ బట్టలను ఏడాది పొడవునా ధరిస్తాడు. ఆయన ఏమి కోరుకుంటున్నాడో జాబితా చేసి, ఆపై షాపింగ్‌కు వెళతాడు. నేను నవాబ్‌ మాలిక్‌ అల్లుడి చిత్రాలను చూశాను. కానీ అతని భారీ జీవనశైలి గురించి ఎవరూ అడగడం లేదు. అతను జాగ్వార్‌ వంటి ఖరీదైన వాహనాలలో కనిపిస్తాడు. అతనికి అంత డబ్బు ఎక్కడ నుండి వస్తుంది?’ అని ఆమె ప్రశ్నించారు. ‘నవాబ్‌ మాలిక్‌కు తగిన సమాధానాలు చెప్పే మహిళలను ‘లేడీ డాన్‌’ అని పిలుస్తాడు. ఆయన మానసికంగా అస్థిరంగా ఉన్నాడు. పని లేదు. సామాజిక సేవతో సంబంధం లేదు. ఆయన విరామం తీసుకొని మానసిక ఆరోగ్యాన్ని పరీక్ష చేయించుకోవాలి’ అని యాస్మిన్‌ వాంఖడే అన్నారు. సమీర్‌ వాంఖడే భార్య క్రాంతి రెడ్కర్‌ కూడా తన భర్తకు మద్దతుగా నిలిచారు. తన భర్త ఆస్తి గురించి సమాచారాన్ని పంచుకుంటూ ట్వీట్‌ చేశారు. ‘సమీర్‌ ఆస్తి మొత్తం ఆమె తల్లికి చెందినది. అది దాదాపు రూ.50 నుండి 100 కోట్లు కాదు. సమీర్‌కు కేవలం 15 సంవత్సరాల వయస్సులో అలాంటి ఆస్తులు ఉన్నాయి. 2008 బ్యాచ్‌ ఐఆర్‌ఎస్‌ అధికారి సర్వీస్‌ రూల్స్‌ ప్రకారం తన ఆస్తుల వివరాలను ప్రభుత్వంతో పంచుకుంటున్నారు’ అని రెడ్కర్‌ వివరించారు.
నవాబ్‌ మాలిక్‌ వదంతులు వ్యాప్తి చేస్తున్నారు..
