ఆంధ్రప్రదేశ్లో సినిమా థియేటర్ల మనుగడ ప్రశ్నార్థకంగా మారుతోందని ఏపీ సినీ ఎగ్జిబిటర్ల ఫోరం ఆవేదన వ్యక్తం చేసింది.విజయవాడలో నిర్వహించిన ఫోరం సమావేశంలో రాష్ట్రంలోని థియేటర్లు ఎదుర్కొంటున్న సమస్యలపై ఎగ్జిబిటర్లు చర్చించారు.లైసెన్స్ విధానం, విద్యుత్ ఛార్జీలు, టికెట్ ధరలు, నిర్వహణ ఖర్చులు, ఓటీటీ విడుదలలతో పాటు పలు కీలక అంశాలను ప్రభుత్వం దృష్టికి తీసుకెళ్లారు.
2 వేల నుంచి 1200కు పడిపోయిన థియేటర్లు
ఫోరం సమావేశంలో సీనియర్ ఎగ్జిబిటర్ యలమంచిలి రామచంద్రరావు మాట్లాడుతూ.. ఒకప్పుడు ఆంధ్రప్రదేశ్లో 2 వేలకుపైగా సినిమా థియేటర్లు ఉండేవని తెలిపారు.ప్రస్తుతం వాటి సంఖ్య సుమారు 1200కు తగ్గిపోయిందని పేర్కొన్నారు. ముఖ్యంగా గత మూడు, నాలుగు నెలల్లోనే దాదాపు 400 థియేటర్లు మూతపడ్డాయని ఆవేదన వ్యక్తం చేశారు.థియేటర్ల నిర్వహణకు ఫైర్, సినిమాటోగ్రాఫ్ తదితర వివిధ శాఖల నుంచి లైసెన్సులు తీసుకోవాల్సి ఉంటుందని, అయితే వాటి రెన్యూవల్ గడువులు ఒక్కో శాఖకు ఒక్కో విధంగా ఉండటంతో ఎగ్జిబిటర్లు తీవ్ర ఇబ్బందులు ఎదుర్కొంటున్నారని తెలిపారు.అన్ని శాఖలకు ఒకే విధంగా ఐదేళ్ల కాలపరిమితితో సింగిల్ విండో విధానంలో లైసెన్స్ రెన్యూవల్స్ అందించేలా ప్రభుత్వం చర్యలు తీసుకోవాలని కోరారు.
థియేటర్లకు ఇండస్ట్రియల్ పవర్ టారిఫ్ ఇవ్వాలి
టూరిజం, హోటల్ రంగాలకు వర్తింపజేస్తున్న తరహాలోనే సినిమా పరిశ్రమకు, థియేటర్లకు కూడా ఇండస్ట్రియల్ పవర్ టారిఫ్ వర్తింపజేయాలని ఎగ్జిబిటర్లు ప్రభుత్వాన్ని కోరారు.ఇప్పటికే సిబ్బంది జీతాలు, విద్యుత్ ఛార్జీలు భారీగా పెరిగాయని తెలిపారు. దీనికి తోడు థియేటర్ల ఆధునీకరణ, రోజువారీ నిర్వహణ ఖర్చులు కూడా తమపై తీవ్ర ఆర్థిక భారాన్ని మోపుతున్నాయని పేర్కొన్నారు.పెరుగుతున్న ఖర్చులను దృష్టిలో ఉంచుకుని థియేటర్ల మెయింటెనెన్స్ ఛార్జీలను కొంతమేర పెంచుకునేందుకు ప్రభుత్వం అనుమతి ఇవ్వాలని విజ్ఞప్తి చేశారు.అలాగే పంచాయతీలు, మున్సిపాలిటీలు, కార్పొరేషన్లు అనే తేడా లేకుండా అన్ని కేటగిరీల థియేటర్లకు వర్తించేలా, ప్రేక్షకులకు అందుబాటులో ఉండే విధంగా యూనిఫామ్ టికెట్ ధరల విధానాన్ని సమీక్షించాలని కోరారు.
కొత్త సినిమాలకు 8 వారాల OTT నిబంధన
థియేటర్లలో విడుదలైన కొత్త సినిమాలు కనీసం 8 వారాల పాటు ఓటీటీ ప్లాట్ఫామ్లలోకి రాకుండా నిబంధన తీసుకురావాలని ఎగ్జిబిటర్లు కోరారు.ఈ విషయంపై నిర్మాతలు, ప్రభుత్వంతో కలిసి నిర్ణయం తీసుకోవాలని విజ్ఞప్తి చేశారు.థియేటర్ల మనుగడకు ఈ 8 వారాల నిబంధన ఎంతో అవసరమని ఎగ్జిబిటర్లు అభిప్రాయపడ్డారు.
టికెట్ ధరలు పెంచితే ప్రేక్షకులు దూరమవుతున్నారు.టికెట్ ధరలను పెంచడం వల్ల ముఖ్యంగా మిడిల్ క్లాస్, లోయర్ క్లాస్ ప్రేక్షకులు థియేటర్లకు రావడం తగ్గిపోతోందని ఏపీ ఎగ్జిబిటర్స్ ఫోరం జాయింట్ సెక్రటరీ తెలిపారు.టికెట్ రేట్లు పెంచకుండా విడుదలైన ‘ఇరుముడి’, సమంత చిత్రం, ‘డీసీ’ వంటి సినిమాలకు భారీగా రెవెన్యూ వచ్చిన విషయాన్ని ఉదాహరణగా ప్రస్తావించారు.టికెట్ ధరలు పెంచడం వల్ల థియేటర్ల మనుగడ మరింత కష్టంగా మారుతుందని, అందువల్ల టికెట్ రేట్ల పెంపునకు సంబంధించిన జీవోలను ప్రభుత్వం ఇవ్వవద్దని కోరారు.టికెట్ ధరల పెంపుతో వచ్చే అదనపు ఆదాయంలో ప్రధాన భాగం నిర్మాతలు, డిస్ట్రిబ్యూటర్లకు వెళ్తుందని, థియేటర్ యాజమాన్యాలకు మాత్రం దాని వల్ల అదనపు ప్రయోజనం పెద్దగా ఉండటం లేదని వివరించారు.
భారీగా పెరిగిన మెయింటెనెన్స్ ఖర్చులు
అధిక టికెట్ ధరల కారణంగా సామాన్య ప్రేక్షకులు థియేటర్ యాజమాన్యాలను తప్పుపడుతున్నారని ఎగ్జిబిటర్లు తెలిపారు.మరోవైపు థియేటర్ల నిర్వహణకు అయ్యే ఖర్చులు మాత్రం గణనీయంగా పెరిగాయని పేర్కొన్నారు. ముఖ్యంగా కరెంట్ బిల్లులు, టాయిలెట్ల నిర్వహణ, సీటింగ్, ఇతర మెయింటెనెన్స్ ఖర్చులు భారీగా పెరిగాయని తెలిపారు.ఈ పరిస్థితుల్లో టికెట్ ధరలను పెంచడం కాకుండా, పెరిగిన నిర్వహణ వ్యయాలను భర్తీ చేసుకునేందుకు కేవలం థియేటర్ మెయింటెనెన్స్ ఛార్జీలను పెంచుకునే అవకాశం కల్పించాలని ప్రభుత్వాన్ని కోరారు.
ప్రభుత్వం తక్షణ చర్యలు తీసుకోవాలి
రాష్ట్రంలో వరుసగా థియేటర్లు మూతపడుతున్న నేపథ్యంలో ప్రభుత్వం తమ సమస్యలను సానుకూలంగా పరిశీలించాలని ఏపీ సినీ ఎగ్జిబిటర్ల ఫోరం విజ్ఞప్తి చేసింది.థియేటర్లను కొనసాగించేందుకు లైసెన్స్ విధానాన్ని సరళీకరించడం, ఇండస్ట్రియల్ పవర్ టారిఫ్ అమలు చేయడం, టికెట్ ధరల విధానాన్ని సమీక్షించడం, మెయింటెనెన్స్ ఛార్జీల పెంపునకు అనుమతి ఇవ్వడం, సినిమాల ఓటీటీ విడుదలకు కనీసం 8 వారాల నిబంధన తీసుకురావడం వంటి చర్యలు చేపట్టాలని కోరింది.థియేటర్ల మనుగడను కాపాడేందుకు ప్రభుత్వం తమ సమస్యలపై తక్షణమే స్పందించి అవసరమైన చర్యలు తీసుకోవాలని ఎగ్జిబిటర్లు విజ్ఞప్తి చేశారు.
