Friday, October 7, 2022
Friday, October 7, 2022

క్షణాల్లో కూలిన సౌధాలు

100 మీటర్ల ఎత్తయిన సూపర్‌టెక్‌ జంట సౌధాల కూల్చివేత
‘వాటర్‌ఫాల్‌ ఇంప్లోజన్‌’ సాంకేతికతతో…
3,700 కిలోల పేలుడు పదార్ధాల వినియోగం

నోయిడా : నోయిడాలో 100 మీటర్ల ఎత్తయిన సూపర్‌టెక్‌ జంట సౌధాలను ఆదివారం కూల్చివేశారు. కేవలం 10 సెకన్ల వ్యవధిలోనే ఈ జంట సౌధాలు పేకమేడల్లా కుప్పకూలిపోయాయి. దాదాపు 100-మీటర్ల ఎత్తయిన ఈ జంట సౌధాలు దిల్లీలోని ఐకానిక్‌ కుతుబ్‌ మినార్‌ (73 మీటర్లు) కంటే ఎత్తయినవి. ఆధునిక ఇంజనీరింగ్‌ ఉత్కంఠభరితమైన దృశ్యంలో ‘వాటర్‌ఫాల్‌ ఇంప్లోజన్‌’ సాంకేతికత ద్వారా కార్డుల ఇల్లులాగా ఉండే ఈ సౌధాలను సెకన్లలో నేలపైకి తీసుకువచ్చారు. భారతదేశంలో కూల్చివేసిన అత్యంత ఎత్తయిన నిర్మాణాలు ఇవి కావడం విశేషం. కూల్చివేసిన నిమిషాల తర్వాత, సమీపంలోని భవనాలు సురక్షితంగా కనిపించాయి. అయితే దీనిపై ఇంకా స్పష్టత రావాల్సి ఉంది. అపెక్స్‌ (32 అంతస్తులు), సెయానే (29 అంతస్తులు) అనే ఈ జంట సౌధాలు 2009 నుంచి దేశ రాజధాని దిల్లీకి ఆనుకుని ఉన్న నోయిడాలోని సెక్టార్‌ 93ఏ లోని సూపర్‌టెక్‌ ఎమరాల్డ్‌ కోర్ట్‌ హౌసింగ్‌ సొసైటీలో నిర్మాణంలో ఉన్నాయి. టవర్లు 40 అంతస్తులతో 21 దుకాణాలు, 915 నివాస అపార్ట్‌మెంట్‌లతో నగరం మనోహరమైన వీక్షణను కలిగి ఉండేలా నిర్మాణం చేశారు. కాగా భవనాన్ని కూల్చివేసేందుకు 3,700 కిలోల పేలుడు పదార్థాలను ఉపయోగించారు. ఈ సౌధాలు ధ్వంసమయ్యే ముందు, పక్కనే ఉన్న ఎమరాల్డ్‌ కోర్టు, ఏటీఎస్‌ విలేజ్‌ సొసైటీలలోని దాదాపు 5 వేల మంది నివాసితులు ఈరోజు కోసం తమ ఇళ్లను ఖాళీ చేశారు. పిల్లులు, కుక్కలతో సహా దాదాపు 3 వేల వాహనాలు, 150-200 పెంపుడు జంతువులను కూడా తీసుకెళ్లారు. నిర్మాణాలను కూల్చివేయడం వల్ల 35 వేల క్యూబిక్‌ మీటర్లు లేదా 55 వేల టన్నుల నుంచి 80 వేల టన్నుల శిధిలాలు మిగిలి ఉన్నాయి. ఇందులో ప్రధానంగా కాంక్రీట్‌ రాళ్లు, ఉక్కు, ఇనుప కడ్డీలు ఉంటాయి. వాటిని సరిగ్గా తొలగించడానికి మరో మూడు నెలలు పడుతుంది. రెండు భవనాల్లో 7 వేల రంధ్రాలు చేసి అందులో పేలుడు పదార్థాలు నింపారు. 20 వేల సర్క్యూట్లను ఏర్పాటు చేశారు. 100 మీటర్ల దూరంలో ఉన్న బటన్‌ నొక్కడం ద్వారా భవనాలు నేలమట్టం అయ్యాయి. నోయిడా అథారిటీ మార్గదర్శకత్వంలో సూపర్‌టెక్‌ సంస్థ తన సొంత ఖర్చుతో భవనాలను కూల్చివేసింది. ట్విన్‌ టవర్స్‌ కూల్చివేత నేపథ్యంలో చుట్టుపక్కల ప్రాంతాల్లో అనేక ఆంక్షలు అమలు చేశారు. ఈ జంట సౌధాలకు సమీపంలో ఉన్న భవనాల్లోకి దుమ్ము చొరబడకుండా జియో టెక్స్‌టైల్‌ కవరింగ్‌ ఉపయోగించారు. అలాగే సమీపంలోని ఎమరాల్డ్‌ కోర్టు, ఏటీఎస్‌ విలేజ్‌ సొసైటీలలో వంట గ్యాస్‌, విద్యుత్‌ సరఫరా కూడా నిలిపివేసినట్టుగా అధికారులు తెలిపారు. సౌధాల కూల్చివేత తర్వాత కాలుష్య స్థాయిలను పర్యవేక్షించేందుకు నోయిడాలోని సెక్టార్‌ 93ఏలోని కూల్చివేత స్థలంలో ప్రత్యేక డస్ట్‌ మెషీన్‌ను ఏర్పాటు చేశారు. ప్రస్తుతం పేలుడు పూర్తికావడంతో భద్రతా క్లియరెన్స్‌ అనంతరం ఎమెరాల్డ్‌ కోర్టు, ఏటీఎస్‌ విలేజ్‌ సొసైటీలలోని నివాసితులను తిరిగి వారి ఇళ్లలోకి అనుమతించనున్నారు. ఇక ఈ కూల్చివేత సందర్భంగా ఏదైనా అత్యవసర పరిస్థితి ఏర్పడితే దానిని ఎదుర్కొనేందుకు వీలుగా అంబులెన్స్‌లు, ఫైర్‌ ఇంజన్లు సిద్ధంగా ఉంచారు. అలాగే ఫెలిక్స్‌ ఆస్పత్రిలో 50 బెడ్లను సిద్ధంగా ఉంచారు. ఎన్డీఆర్‌ఎఫ్‌, ఉత్తరప్రదేశ్‌ పోలీసు సిబ్బందిని క్షేత్రస్థాయిలో అందుబాటులో ఉంచారు. జంట సౌధాల కూల్చివేత దృశ్యాలను అక్కడికి కొద్ది దూరంలో భవనాల నుంచి ప్రజలు వీక్షించారు. కాగా ‘జిల్లా అధికారులతో కుమ్మక్కయి, నిబంధనలను ఉల్లఘించి నిర్మాణాలు చేసిన ఈ జంట సౌధాలను కూల్చివేయాలని 2021 ఆగస్టు 31న సుప్రీం కోర్టు ఆదేశించింది. చట్టవ్యతిరేకమైన నిర్మాణాలపై కఠినంగా వ్యవహరించాలని, చట్టబద్ధంగా ఉండేలా చర్యలు తీసుకోవాలని తెలిపింది. నోయిడా అథారిటీ అని కూడా పిలిచే న్యూ ఓఖ్లా పారిశ్రామిక అభివృద్ధి మండలి (నోయిడా) ఎమరాల్డ్‌ కోర్టు ప్రాజెక్టులో సూపర్‌టెక్‌ లిమిటెడ్‌తో దాని అధికారులు కుమ్మక్కయిన అనేక సంఘటనలను, రియల్‌ ఎస్టేట్‌ సంస్థ నిబంధనలను ఉల్లంఘించడాన్ని ఉన్నత న్యాయస్థానం ఎత్తిచూపింది. ‘చట్టంలోని నిబంధనలను డెవలపర్‌ ఉల్లంఘించడంలో ప్లానింగ్‌ అథారిటీ దుర్మార్గపు సంక్లిష్టతను ఈ కేసు బహిర్గతం చేసింది’ అని సుప్రీం కోర్టు పేర్కొంది. భవనం మ్యాప్‌లను మొదట ఆమోదించిన స్థానిక నోయిడా అభివృద్ధి మండలి దాదాపు ఏడాది కాలంగా ప్లానింగ్‌లో ఉన్న మెగా కూల్చివేత కసరత్తును పర్యవేక్షించింది. ముంబైకి చెందిన ఎడిఫైస్‌ ఇంజినీరింగ్‌ ఈ పనిని అప్పగించింది. దాని నైపుణ్యం కోసం దక్షిణాఫ్రికాకు చెందిన జెట్‌ డెమోలిషన్స్‌ను నియమించుకుంది. సెంట్రల్‌ బిల్డింగ్‌ రీసెర్చ్‌ ఇన్‌స్టిట్యూట్‌ (సీబీఆర్‌ఐ) ఈ ప్రాజెక్టుకు సాంకేతిక నిపుణుడిగా సుప్రీం కోర్టు నియమించింది. ఎమరాల్డ్‌ కోర్టు ప్రాజెక్టు కోసం అసలు ప్రణాళికలో భాగం కాని జంట సౌధాల నిర్మాణం దాని నివాసితుల జీవన నాణ్యతను ప్రత్యక్షంగా ప్రభావితం చేస్తుందని పేర్కొన్నందున కూల్చివేతకు అయ్యే ఖర్చును సూపర్‌టెక్‌ భరించాలని సుప్రీం కోర్టు ఆదేశించింది. 2020 జనవరిలో 18-20 అంతస్తుల భవనాలను సుప్రీంకోర్టు ఆదేశాలకు అనుగుణంగా, తీర ప్రాంత నియంత్రణ జోన్‌ నిబంధనలను ఉల్లంఘించి నిర్మాణం చేసిన కేరళలోని కొచ్చిలోని మరడు మునిసిపాలిటీ ప్రాంతంలోని నాలుగు గృహ సముదాయాలను కూల్చివేశారు. మరడు కాంప్లెక్స్‌ల కూల్చివేతకు కూడా ఎడిఫైస్‌, జెట్‌ డెమోలిషన్స్‌ సహకరించాయి. నవంబర్‌ 2019లో దక్షిణాఫ్రికాలోని జోహన్నెస్‌బర్గ్‌లో 108 మీటర్ల ఎత్తయిన బ్యాంక్‌ ఆఫ్‌ లిస్బన్‌ భవనం కూల్చివేయడాన్ని జెట్‌ డిమోలిషన్స్‌ వ్యక్తిగతంగా విజయవంతంగా అమలు చేసింది.

సంబంధిత వార్తలు

spot_img

తాజా వార్తలు

spot_img