Wednesday, August 17, 2022
Wednesday, August 17, 2022

భీమవరంలో అల్లూరి విగ్రహాన్ని ఆవిష్కరించిన మోదీ..

అల్లూరి సీతారామరాజు విగ్రహం ఆవిష్కరణ

భీమవరంలో ప్రధాని నరేంద్ర మోదీ పర్యటన

విప్లవ వీరుడు అల్లూరి సీతారామరాజు 125వ జయంతి ఉత్సవాల్లో ప్రధాని మోదీ పాల్గొన్నారు. ముందుగా కాళ్ల మండలం పెద అమిరం వేదికపై ప్రధానిని ఏపీ ముఖ్యమంత్రి వైఎస్ జగన్ సత్కరించారు. ఆజాదీ కా అమృత్‌ మహోత్సవ్‌లో భాగంగా ఈ వేడుకల్లో ప్రధాని పాల్గొన్నారు. ఈ సందర్భంగా పశ్చిమగోదావరి జిల్లా భీమవరంలో ఏర్పాటు చేసిన అల్లూరి సీతారామరాజు 30 అడుగుల కాంస్య విగ్రహాన్ని వర్చువల్‌గా ఆవిష్కరించారు. ఈ కార్యక్రమంలో ముఖ్యమంత్రి వైఎస్ జగన్, కేంద్రమంత్రి కిషన్ రెడ్డి, గవర్నర్‌ బిశ్వభూషణ్‌ హరిచందన్‌, మెగాస్టార్ చిరంజీవితో పాటూ ఏపీ మంత్రులు, ప్రజా ప్రతినిధులు పాల్గొన్నారు. అలాగే అల్లూరి, మల్లుదొర వారసులను వేదికపై ప్రధాని మోదీ సత్కరించారు. ఒక మనిషిని.. ఇంకొక మనిషి.. ఒక జాతిని మరొక జాతి.. ఒక దేశాన్ని మరొక దేశం దోపిడీ చేయడానికి వీల్లేని సమాజాన్ని స్వాతంత్ర్య సమరయోధులు ఆకాంక్షించారని ముఖ్యమంత్రి వైఎస్‌ జగన్‌మోహన్‌రెడ్డి అన్నారు. దేశ స్వాతంత్ర్యం కోసం లక్షలాది మంది ప్రాణాలు అర్పించారన్నారు. అల్లూరి ఒక మహా అగ్ని కణం.. ఆయన తెలుగు గడ్డపై పుట్టడం గర్వకారణమన్నారు.అల్లూరి మరణం లేని విప్లవ వీరుడు.. తెలుగు జాతికి, దేశానికి స్ఫూర్తి ప్రధాత.. అడవి బిడ్డలకు ఆరాధ్య దైవం అంటూ ప్రశంసించారు.
అల్లూరి సీతారామరాజును మనసులో పెట్టుకుని జిల్లాల పునర్ విభజనలో భాగంగా ఆయన నేలకొరిగిన ప్రాంతం, ఆ జిల్లాకి అల్లూరి సీతారామరాజు పేరు పెట్టామని గుర్తు చేశారు. తెలుగు జాతి ఆయన్ను ఎప్పుటికీ మర్చిపోదని.. దేశం, అడవి బిడ్డల కోసం పోరాటాలు చేశారని.. ప్రతి ఒక్కరి గుండెల్లో ఆయన చిరస్థాయిగా నిలిచిపోతారన్నారు.అల్లూరి సీతారామారాజు జయంతి ఉత్సవాలు దేశవ్యాప్తంగా నిర్వహిస్తామని కేంద్ర మంత్రి కిషన్ రెడ్డి తెలిపారు. స్వాతంత్య్రం కోసం అనేక మంది పోరాటం చేశారని.. వారి చరిత్ర నేటి తరానికి తెలియాల్సిన అవసరం ఎంతైనా ఉందన్నారు. అల్లూరి సంచరించిన ప్రాంతాలను పర్యాటక ప్రాంతాలుగా అభివృద్ధి చేస్తామని.. అల్లూరి సీతారామరాజు, ఆయన అనుచరుల కుటుంబాలను కలుస్తామన్నారు కేంద్రమంత్రి కిషన్ రెడ్డి. ఈ విగ్రహాన్ని క్షత్రియ పరిషత్‌ ఆధ్వర్యంలో భీమవరంలో ఏడు అడుగుల సిమెంట్‌ దిమ్మపై 30 అడుగుల కాంస్య విగ్రహం ఏర్పాటు చేశారు. ఈ విగ్రహం తయారీకి రూ.3కోట్లు వ్యయం అయ్యింది. ఈ విగ్రహానికి పాలకొల్లు మండలం ఆగర్రుకు చెందిన అల్లూరి సీతారామరాజు అనే దాత ఈ రూ.3కోట్లు విరాళం అందజేశారు. 10 టన్నుల కాంస్యం మెటీరియల్‌, 7 టన్నుల స్టీలును వినియోగించారు. హనుమాన్‌ జంక్షన్‌కు చెందిన శిల్పి బుర్రా ప్రసాద్‌ ఈ విగ్రహాన్ని 32 రోజులలో తయారు చేశారు. అంతేకాదు దేశంలోనే అతిపెద్ద అల్లూరి సీతారామరాజు విగ్రహంగా నిలవబోతోంది.

సంబంధిత వార్తలు

spot_img

తాజా వార్తలు

spot_img