అవినీతికి పాల్పడిన ప్రభుత్వ ఉద్యోగులను ప్రత్యక్ష సాక్ష్యాలు లేకపోయినా శిక్షించవచ్చని, లంచాలు తీసుకున్నవారిని దోషులుగా పరిగణించవచ్చని సర్వోన్నత న్యాయస్థానం స్పష్టం చేసింది. అవినీతి జరిగినట్టు ప్రత్యక్ష రుజువులు లేకపోయినా.. ఇతరత్రా బలమైన ప్రాసంగిక సాక్ష్యాలనూ పరిగణనలోకి తీసుకొని దోషులుగా తీర్మానించవచ్చని పేర్కొంది. ఈ విషయంలో ఫిర్యాదుదారులతో పాటు ప్రాసిక్యూషన్‌ కూడా చిత్తశుద్ధి, నిజాయతీతో కృషి చేసి, అవినీతిపరుల కారణంగా పరిపాలన, ప్రభుత్వం భ్రష్టు పట్టకుండా చర్యలు తీసుకోవాలని జస్టిస్‌ ఎస్‌.ఎ.నజీర్‌ నేతృత్వంలోని ఐదుగురు సభ్యుల రాజ్యాంగ ధర్మాసనం ఈ మేరకు గురువారం తీర్పు వెలువరించింది.ఈ ధర్మాసనంలో జస్టిస్‌ ఎస్‌ఏ నజీర్‌తో పాటు జస్టిస్‌ బీఆర్‌ గవాయ్‌, జస్టిస్‌ ఏఎస్‌ బోపన్న, జస్టిస్‌ వి.రామసుబ్రమణియన్‌, జస్టిస్‌ బీవీ నాగరత్నలు ఉన్నారు. ‘‘ఫిర్యాదుదారుడు ఎదురుతిరగడం లేదా చనిపోయినప్పుడు లేదా విచారణ సమయంలో తన సాక్ష్యాన్ని నమోదు చేయలేనప్పుడు.. ఇతర సాక్షుల మౌఖిక లేదా డాక్యుమెంట్లు.. సందోర్భోచిత సాక్ష్యాల ఆధారంగా అక్రమ ప్రతిఫలాన్ని ప్రభుత్వ ఉద్యోగి డిమాండు చేసినట్లు నిరూపించవచ్చు’’ అని ధర్మాసనం పేర్కొంది. అవినీతి కేన్సర్‌ లాంటిదని, ఇది ప్రభుత్వం, సమాజంపై తీవ్ర ప్రభావం చూపుతుందని వ్యాఖ్యానించింది.అవినీతి ముప్పుపై సుప్రీంకోర్టు గతంలో ఇచ్చిన తీర్పును ధర్మాసనం ప్రస్తావిస్తూ.. ప్రభుత్వ ఉద్యోగులలో అవినీతి ఒక పెద్ద సమస్యగా మారిందని, ప్రజా కార్యకలాపాలు ఏ కోణంలోనూ ప్రభావం చూపలేదని తెలిపింది.
‘‘అవినీతి అనేది కేన్సర్‌లా వ్యాపిస్తోంది.. ప్రజా సేవలో సమర్థత, నిజాయితీ గల అధికారులను నిరుత్సాహపరిచే సామాజిక స్వరూపం. ప్రభుత్వోద్యోగి చిత్తశుద్ధితో తన కర్తవ్యాన్ని శ్రద్ధగా, నిజాయితీగా, నిజాయితీగా నిర్వర్తించి, తన పదవికి సంబంధించిన విధుల నిర్వహణకు అంకితభావంతో పనిచేసినప్పుడే ప్రజాసేవలో సమర్థత మెరుగుపడుతుంది.. అవినీతికి పాల్పడే అధికారి ప్రవర్తన చుట్టూ దట్టమైన, అణచివేయలేని మేఘాలను ఆవరిస్తుంది.. పొగ కంటే చాలా వేగంగా అపఖ్యాతి దక్కుతుంది’’ గతం తీర్పును ఉటంకిస్తూ సమస్యను పరిష్కరించడానికి కఠినమైన చర్యలు తీసుకోవాల్సిన అవసరం ఉందని నొక్కిచెప్పింది.లంచం తీసుకున్న ప్రభుత్వ ఉద్యోగికి వ్యతిరేకంగా ప్రత్యక్ష లేదా ప్రాథమిక సాక్ష్యం లేనప్పుడు, ఇతర రుజువుల ఆధారంగా దోషిగా తీర్మానించవచ్చా? అన్న అంశాన్ని విచారించడానికి సుప్రీంకోర్టు రాజ్యాంగ ధర్మాసనాన్ని ఏర్పాటుచేసింది.
అవినీతి అధికారులను శిక్షించడానికి సరైన సాక్ష్యంతో పనిలేదు : సుప్రీంకోర్టు
