ఉద్యోగులకు గుడ్‌ న్యూస్‌.. పెరిగిన ఈపీఎఫ్‌ వడ్డీ రేటు

ఉద్యోగుల భవిష్య నిధి సంస్థ కీలక ప్రకటన చేసింది. ప్రావిడెంట్‌ ఫండ్‌ డిపాజిట్లపై వడ్డీ రేటును సవరించింది. గతంలో 8.10 శాతంగా ఉన్న పీఎఫ్‌ వడ్డీ రేటును స్వల్పంగా పెంచి 8.15 శాతానికి చేర్చింది. ఇది 2022-23 పీఎఫ్‌ డిపాజిట్లపై వర్తిస్తుంది. పీఎఫ్‌ అకౌంట్‌లో ఉన్న నగదు నిల్వపై ఈ వడ్డీ జమ అవుతుంటుంది. ఈ మేరకు బోర్డు సమావేశంలో చర్చించి కీలక ప్రకటన చేసింది రిటైర్మెంట్‌ ఫండ్‌ బాడీ. సోమ, మంగళవారాల్లో రెండు రోజుల పాటు ఈపీఎఫ్‌ఓ బోర్డు అధికారులు సమావేశం అయ్యారు. ఈ నేపథ్యంలోనే చర్చించి కీలక ప్రకటన చేశారు. వడ్డీ రేట్లు పెంచి ఉద్యోగులకు తీపి కబురు అందించారు. అంతకుముందు 2021-22కు సంబంధించి గతేడాది మార్చిలో వడ్డీ రేటును 8.10 శాతంగా నిర్ణయించింది ఈపీఎఫ్‌ఓ. ఇప్పుడు మరో 0.05 శాతం మేర పెంచింది. ఇక గత ఆర్థిక సంవత్సరానికి సంబంధించిన వడ్డీ రేటే ఏకంగా 4 దశాబ్దాల కనిష్టం కావడం గమనార్హం. చివరగా 1977-78 సమయంలో 8 శాతం వడ్డీ రేటుగా ఉండేదే తక్కువ.
2020-21లో పీఎఫ్‌ వడ్డీ రేటు 8.5 శాతంగా ఉండేది. దానిని మరుసటి ఆర్థిక సంవత్సరం 8.10 శాతానికి తగ్గించింది. ఇక ఇప్పుడు స్వల్పంగా పెంచిందన్నమాట. ఈపీఎఫ్‌ఓకు మొత్తం 6 కోట్ల మందికిపైగా సబ్‌స్క్రైబర్లు ఉన్నారు. వీరిలో 72.73 లక్షల మంది పెన్షనర్లు. ఈపీఎఫ్‌ఓ సెంట్రల్‌ బోర్డ్‌ ఆఫ్‌ ట్రస్టీస్‌ పీఎఫ్‌ వడ్డీ రేటును ప్రస్తుత ఆర్థిక సంవత్సరానికి 8.15 శాతంగా నిర్ణయించినట్లు విశ్వసనీయ వర్గాలు తాజాగా వెల్లడిరచాయి. దీనిపై అధికారిక ప్రకటన రావాల్సి ఉంది. ఈపీఎఫ్‌ఓ వడ్డీ రేట్ల పెంపుపై తన నిర్ణయాన్ని కేంద్ర ఆర్థిక మంత్రిత్వ శాఖకు పంపాల్సి ఉంటుంది. అక్కడ ఆమోదం పొందితే.. వడ్డీ రేటు ఇదే ఖరారు అవుతుంది.
2019-20లో పీఎఫ్‌ వడ్డీ రేటు 8.50 శాతంగా ఉండేది. ఇది ఏడేళ్ల కనిష్టం. 2018-19లో పీఎఫ్‌ ఇంట్రెస్ట్‌ రేటు 8.65 శాతంగా ఉండేది. అయితే ఇక్కడ గమనించాల్సింది ఏంటంటే.. మనం ముందుకు పోదున్న కొద్దీ పీఎఫ్‌ వడ్డీ రేటు తగ్గిస్తూ వస్తోంది కేంద్రం. 8.65, 8.50, 8.10 ఇలా తగ్గుకుంటూ వచ్చింది. ఇప్పుడు మాత్రం పెంచింది. అదీ చాలా తక్కువే. 2016-17లో కూడా ఈపీఎఫ్‌ఓ తన చందాదారులకు 8.65 శాతం వడ్డీ చొప్పున చెల్లించగా.. 2017-18లో 8.55 శాతానికి తగ్గించింది. 2015-16లో ఇది 8.8 శాతంగా ఉండటం విశేషం. అప్పటికీ ఇప్పటికీ అంటే ఏడేళ్ల వ్యవధిలో చూసుకుంటే గనుక పీఎఫ్‌ వడ్డీ రేటు 0.65 శాతం వరకు తగ్గింది.