ప్రధానమంత్రి మోదీ రెండు రోజుల వారణాసి పర్యటనలో భాగంగా ఇవాళ బీజేపీ పాలిత రాష్ట్రాల ముఖ్యమంత్రులతో సమావేశమయ్యారు. ఉత్తరప్రదేశ్‌ సహా పలు రాష్ట్రాల్లో వచ్చే ఏడాది ప్రారంభంలో అసెంబ్లీ ఎన్నికలు జరగనున్న నేపథ్యంలో మోదీ ఈ సమావేశం ఏర్పాటు చేయడం ప్రాధాన్యం సంతరించుకుంది. అసోం, అరుణాచల్‌ ప్రదేశ్‌, గోవా, గుజరాత్‌, హర్యానా, హిమాచల్‌ ప్రదేశ్‌, కర్ణాటక, మధ్యప్రదేశ్‌, మణిపూర్‌, త్రిపుర, ఉత్తరప్రదేశ్‌, ఉత్తరాఖండ్‌ ముఖ్యమంత్రులతో పాటు బీహార్‌, నాగాలాండ్‌ ఉప ముఖ్యమంత్రులు ఈ సమావేశంలో పాల్గొన్నారు. ఈ సందర్భంగా పాలన సంబంధిత విషయాలతో పాటు పలు కీలక అంశాలపై చర్చించారు. బీజేపీ పాలిత రాష్ట్రాల పనితీరును ఈ సమావేశంలో ప్రధాని సమీక్షించినట్టు పార్టీ వర్గాలు తెలిపాయి. రాష్ట్రాల పురోగతికి సంబంధించి సీఎంలు ప్రజెంటేషన్‌ ఇచ్చినట్టు తెలుస్తోంది.అలాగే, ఈరోజు సద్గురు సదాఫల్దియో విహంగం యోగ్‌ సంస్థాన్‌ 98వ వార్షికోత్సవ వేడుకలో మోడీ పాల్గొంటారు. ప్రధానమంత్రి కార్యాలయం ప్రకారం, వారణాసిలోని మధ్యాహ్నం 3:30 గంటలకు జరిగే స్వర్వేద్‌ మహామందిర్‌లో సద్గురు సదాఫల్దీయో విహంగం యోగ్‌ సంస్థాన్‌ 98వ వార్షికోత్సవ వేడుకలకు ప్రధాని మోదీ హాజరవుతారు. అలాగే, బీజేపీ పాలిత రాష్ట్రాల ముఖ్యమంత్రులు, ఉప ముఖ్యమంత్రులు మంగళవారం కూడా కాశీ విశ్వనాథ ఆలయాన్ని సందర్శించనున్నారు.
