హిందూ చట్టాల ప్రకారం వివాహేతర సంబంధాల ద్వారా పుట్టిన పిల్లలకు తల్లిదండ్రుల పూర్వీకుల ఆస్తిలో వాటా ఉంటుందా? అనే అంశంపై 2011లో దాఖలైన పిటిషన్‌పై సుప్రీంకోర్టు కీలక తీర్పు వెలువరించింది. చెల్లుబాటు కాని లేదా రద్దు చేయదగ్గ వివాహాల ద్వారా జన్మించిన సంతానం చట్టబద్ధమైన వారసులేనని సర్వోన్నత న్యాయస్థానం స్పష్టం చేసింది. ఈ మేరకు హిందూ వారసత్వ చట్టం కింద హిందూ అవిభాజ్య కుటుంబంలో తల్లిదండ్రులకు సంక్రమించిన పూర్వీకుల ఆస్తిలో వాటా పొందే హక్కు వీరికి కూడా ఉంటుందని ప్రధాన న్యాయమూర్తి జస్టిస్ డీవై చంద్రచూడ్ ధర్మాసనం తేల్చి చెప్పింది.పుష్కరానికిపైగా పెండింగులో ఉన్న ఈ అభ్యర్థనపై సీజేఐ జస్టిస్ చంద్రచూడ్ నేతృత్వంలోని ధర్మాసనం ఇటీవల విచారణ పూర్తిచేసి.. తీర్పును రిజర్వులో ఉంచింది. చట్టబద్ధతలేని లేదా రద్దు చేయదగ్గ వివాహాల ద్వారా పుట్టిన పిల్లలకు తల్లిదండ్రుల వారసత్వ ఆస్తిపై హక్కు ఉండదంటూ గతంలో సుప్రీంకోర్టు ఇచ్చిన తీర్పుతో సీజేఐ ధర్మాసనం విభేదించింది. ఇదే సమయంలో మద్రాస్ హైకోర్టు ఇచ్చిన తీర్పును కూడా ధర్మాసనం కొట్టివేసింది. చెల్లుబాటు కాని వివాహం ద్వారా జన్మించిన బిడ్డకు తల్లిదండ్రులకు వారసత్వంగా లభించిన పూర్వీకుల ఆస్తిలో వాటాకు అర్హత లేదు.. ఏదైనా ఉంటే, స్వీయ-ఆర్జిత ఆస్తులను పొందడానికి మాత్రమే అర్హులు్ణ అని మద్రాస్ హైకోర్టు తీర్పు ఇవ్వగా.. దానిని తాజాగా పక్కనబెట్టింది. లివ్-ఇన్ రిలేషన్ షిప్ ద్వారా పుట్టిన పిల్లలకు పూర్వీకుల ఆస్తిలో వాటాకు అర్హులని అభిప్రాయపడింది.వివాహేతర సంబంధాల ద్వారా జన్మించిన పిల్లలు తన తల్లిదండ్రుల ఆస్తిపై మాత్రమే హక్కులు పొందగలరని, మరే ఇతర ఆస్తులను పొందలేరని సందేహాస్పద నిబంధనలు స్పష్టం చేస్తున్నాయని కూడా కోర్టు పేర్కొంది.మారుతున్న మన సమాజంతో పాటు.. అన్ని ఇతర సమాజాల్లోనూ సాంఘిక నిబంధనల్లో మార్పులు చోటుచేసుకుంటున్నాయి.. గతంలో చట్టవిరుద్ధమైంది.. ఇప్పుడు చట్టబద్ధం కావచ్చు. చట్టబద్ధమనే భావన.. సామాజిక ఏకాభిప్రాయంతో ఉద్భవిస్తుంది.. దీని రూపకల్పనలో వివిధ సామాజిక సమూహాలు కీలక పాత్ర పోషిస్తాయి.. మారుతున్న సమాజంలో చట్టం మారకుండా స్థిరంగా ఉండిపోకూడదు్ణ అని జస్టిస్ డీవై చంద్రచూడ్, జస్టిస్ జేబీ పార్దీవాలా, జస్టిస్ మనోజ్‌ మిశ్రాలతో కూడిన త్రిసభ్య ధర్మాసనం వ్యాఖ్యానించింది.
