కైరో: ఆఫ్రికా ఖండ సామాజిక, ఆర్థిక వెనుక బాటుకు వలసవాదమే ప్రధాన కారణమని ఈజిప్టు అధ్యక్షుడు అబ్దెల్‌ ఫట్టా ఎల్‌-సిసి వ్యాఖ్యానించారు. ఆఫ్రికా ఖండం అభివృద్ధికి పాశ్చాత్య దేశాలు సహకరించాలని పిలుపునిచ్చారు. ‘‘చారిత్రాత్మక కారణాల నేపధ్యంలో ఆఫ్రికా ఎల్లప్పుడూ వెనుకబడి ఉందని ఈజిప్టు అంతర్జాతీయ పెట్రోలియం సమావేశంలో సిసి అన్నారు. వాతావరణ మార్పులను పరిష్కరించడానికి, పునరుత్పాదక ఇంధన వ్యవధిని పొడిగించడానికి ఆఫ్రికన్‌ దేశాలకు ఆర్థిక సహాయం అందించాలని మేము ధనిక దేశాలను కోరుతున్నాము అని సిసినొక్కిచెప్పారు. ఈ ప్రణాళికలను నెరవేర్చడానికి అయ్యే ఖర్చు చాలా ముఖ్యమైనది. ఆఫ్రికా ఇటువంటి ఖర్చులను భరించలేదని అన్నారు. ఆఫ్రికా ఖండంలోని జనాభాలో సగం మంది విద్యుత్తు లేకుండా జీవిస్తున్నారని పేర్కొన్నారు. పెట్రోలియం ఎగుమతి చేసే దేశాల సంస్థ, ఇంటర్నేషనల్‌ ఎనర్జీ ఏజెన్సీ, ఈస్టర్న్‌ మెడిటరేనియన్‌ గ్యాస్‌ ఫోరమ్‌, యూనియన్‌ ఫర్‌ మెడిటరేనియన్‌, ఆఫ్రికన్‌ పెట్రోలియం ప్రొడ్యూసర్స్‌ ఆర్గనైజేషన్‌, ఇతర ప్రపంచ, ప్రాంతీయ సంస్థల నుండి ప్రతినిధులు హాజరయ్యారు.
