అది మాటకాదు కంఠంలో ఊపిరి
ఇది గీత కాదు దాటడానికి వీలులేని
ఒక భావోన్ముఖపు ఒప్పందం
చెప్పడం కూడా తప్పిదమే
మౌనంలో వాటిని
తగలబెట్టడమే ఉపశమనం
అటూ ఇటూ లోపలా బయటా
మాటాడావో పంచుకున్నావో దుర్గంధమయ్యావే
కకావికలాన్ని కిరీటంగా ధరించినట్టే
కొన్ని కన్నీటి చుక్కలు కూడా రాలనీకు
మునిపంటికింద అదిమిపట్టి
ఉచ్ఛ్వాస నిచ్ఛ్వాసల్లో
ముంపుకు గురిచేసి దిగమింగు
కొన్ని ఒప్పుకో బయటపడనీకు
దుఃఖం గేట్లు పగలనీకు
వింటూ పో నచ్చినవి నచ్చనివి
మనల్ని మనం కాస్తైనా మిగిల్చుకోవడానికి
జీవితమంతా మంద్రస్థాయి యుద్ధం సలపాలి కదా
ఇక్కడ వేరుపడడానికి వీలులేదు
ఉండాలి కత్తిపై సాము చేస్తూ
బతకాలి నెత్తిపై తొణికే కుండలవరసతో
ఇప్పుడు చెప్పు
కనురెప్పలవెనకాతలి గోసలు
కాస్తైనా నేను వింట
నిన్నేమీ అంచనా వెయ్య అగాధంలోకి తొయ్య
నలుగురి నాలుకల్లో నిన్ను పడనియ్య
మాటిస్తున్నా…
కడుపునిండా
ఏడువు పేగులు చాచి వెక్కి వెక్కి
చివరి రాగం వరకూ ఊపిరి కొసవరకూ
అది చీకట్లని చీలుస్తూ
ఇంకో వ్యథల పొద్దుని
ఇట్టాగే తెల్లారనీ మట్టిలోకి ఇంకిపోనీ
తాజాగా మొహం కడుక్కో కిరణాల ఒడ్డున
లేత ఎండ ముక్కలతో…
గట్టిగా నిట్టూర్చి ఇక తేలికపడి పో
కొత్తగా నడుస్తూ
నేనొక కాల్పనిక కలగన్నాననుకుంట
చూస్తా నిన్ను మాత్రం
అల్లంత దూరం పొయేవరకు తదేకంగా
ఒట్టు ఎక్కడా చెప్ప ఏ దిక్కుకు
ఈ దుఃఖ పర్వాన్ని రాయ ఏ బతుకుపేజీలో
ఇది ఇంతటితో సమాప్తం..
నాలో పరిసమాప్తం!
- రఘు వగ్గు
