దేశవ్యాప్తంగా సంచలనం సృష్టించిన ఉత్తర్ ప్రదేశ్ గ్యాంగస్టర్ అతీక్ అహ్మద్, సోదరుడు అష్రఫ్ అహ్మద్ హత్యలపై పోలీసుల దర్యాప్తు కొనసాగుతోంది. నిందితులు 22 సెకెన్లలో 14 రౌండ్ల కాల్పులు జరిపి హతమార్చారు. అతీక్ అహ్మద్ శరీరంలో కనీసం 9 బుల్లెట్లు దిగినట్టు పోస్ట్మార్టం నివేదిక పేర్కొంది. అధికార వర్గాల సమాచారం ప్రకారం.. పోస్టమార్టం సమయంలో అతీక్ అహ్మద్ శరీరంలో కనీసం 8 బుల్లెట్లు గుర్తించారు.. సోదరుడు అష్రఫ్ శరీరంలో ఐదు బుల్లెట్లు వెలికితీశారు. అతీక్ తలలోకి ఒకసారి, గుండె, వీపుపై ఎనిమిదిసార్లు కాల్చినట్టు పేర్కొన్నాయి. ముఖంలో ఒకటి, వీపులో నాలుగు బుల్లెట్లు గుర్తించారు.ఐదుగురు వైద్యుల బృందం పోస్టుమార్టం నిర్వహించింది. హై ప్రొఫైల్ కేసుపై సరైన విచారణ జరిగేలా చర్యల్లో భాగంగా వీడియో కూడా తీశారు. మాజీ ఎమ్మెల్యే, ఎంపీ అయిన అతిక్ అహ్మద్పై కనీసం 100 క్రిమినల్ కేసులున్నాయి. 2005లో బీఎస్పీ ఎమ్మెల్యే రాజు పాల్ హత్య కేసులో న్యాయవాది, ప్రత్యక్ష సాక్షి ఉమేష్ పాల్ను గత ఫిబ్రవరిలో ప్రయాగ్రాజ్లో హత్యకు గురైన విషయం తెలిసిందే. ఈ హత్యల వెనుక అతీక్ కుటుంబం ఉన్నట్టు ఆరోపణలు ఉన్నాయి. ఈ నేపథ్యంలో బీఎస్పీ ఎమ్మెల్యే హత్యకేసులో అతీక్ ప్రధాన నిందితుడు.వ్యాపారవేత్త కిడ్నాప్ కేసులో ఆరోపణలు ఎదుర్కొంటున్న అతీక్.. 2019 నుంచి గుజరాత్ జైలులో ఉన్నాడు. గత నెలలో అతిక్ అహ్మద్ను కోర్టు విచారణ కోసం ప్రయాగ్రాజ్కు తీసుకువచ్చి, ఆపై గుజరాత్కు తీసుకువెళ్లారు. మళ్లీ గతవారం ఆయనను తీసుకొస్తుండగా.. తన కుటుంబాన్ని ఏమీ చెయొద్దని ప్రాధేయపడ్డారు. ఆ మర్నాడు ఎన్కౌంటర్లో అతీక్ కుమారుడు హతమయ్యాడు. కొడుకు అంత్యక్రియలు పూర్తికాక ముందే ఆయన కూడా హత్యకు గురయ్యారు.
