హోంవర్క్ చేయలేదని ఐదేళ్ల చిన్నారి పట్ల ఓ కన్నతల్లి అత్యంత అమానుషంగా వ్యవహరించింది. కాళ్లూచేతులు కట్టేసి మిట్టమధ్యాహ్నం మండుటెండలో ఇంటి పైకప్పు మీద వదిలేసింది. ఈ హృదయవిదారకమైన ఈ ఉదంతం దేశ రాజధాని దిల్లీలో గతవారం చోటుచేసుకుంది. ప్రస్తుతం దీనికి సంబంధించిన వీడియో సామాజిక మాధ్యమాల్లో వైరల్ కావడంతో పోలీసులు స్పందించారు. ఎండకు తాళలేక చిన్నారి విలవిలలాడిపోతూ ఏడ్వవటం పలువురిని కదిలించింది. అసలు ఆమె కన్నతల్లేనా? అని మండిపడుతున్నారు. అలాంటి కఠినాత్మురాలిని శిక్షించాలని కోరుతున్నారు. తొలుత ఈ ఘటన కర్వాల్ నగర్ ప్రాంతంలో జరిగినట్టు సోషల్ మీడియా పోస్ట్లు పేర్కొన్నాయి. అయితే, పోలీసుల విచారణలో అటువంటి సంఘటన అక్కడ జరగలేదని తేలింది. ఇది ఖజూరీ ఖాస్ ప్రాంతంలో జూన్ 2న చోటుచేసుకొన్నట్లు పోలీసులు తెలిపారు. బాధిత చిన్నారి వయసు ఐదేళ్లు ఉంటుందని, హోంవర్క్ చేయలేదని ఆమె తల్లే ఇటువంటి కఠినశిక్ష విధించిందని పేర్కొన్నారు. చిన్నారికి కాళ్లూచేతులు కట్టేసి ఎండలో వదిలేయగా.. పొరుగింటిలో ఉండే ఓ మహిళ వీడియో తీసింది. 25 సెకన్ల ఈ వీడియోలో మధ్యాహ్నం 2.00 గంటల ప్రాంతంలో ఈ ఉదంతం చోటుచేసుకొన్నట్లు పేర్కొంది. సోషల్ మీడియాలో ఈ వీడియోపై తీవ్ర ఆగ్రహం వ్యక్తమయ్యింది. చిన్నారి మాదిరిగానే ఆమె తల్లికి కూడా కాళ్లుచేతులు కట్టేసి మండుటెండలో వదిలేయాలని మండిపడ్డారు. దిల్లీ పోలీస్ కమిషనర్ రాకేశ్ ఆస్థానా, మహిళా కమిషన్ ఛైర్మన్ స్వాతి మాలివాల్లకు ఓ నెటిజన్ ట్యాగ్ చేయడంతో వాళ్లు స్పందించారు. చిన్నారి తల్లిపై కేసు నమోదు చేసినట్లు పోలీసులు వెల్లడిరచారు. స్కూల్ హోంవర్క్ చేయడం లేదని కేవలం 5-7 నిమిషాల వరకూ తానే ఎండలో వదిలేసినట్టు ఆ మహిళ అంగీకరించిందని తెలిపారు.