ఈ ఏడాది గణేష్‌ నవరాత్రి ఉత్సవాలను ఘనంగా నిర్వహించేలా ప్రభుత్వం అన్ని రకాల ఏర్పాట్లు చేస్తుందని పశుసంవర్ధక, మత్స్య, పాడి పరిశ్రమల అభివృద్ధి, సినిమాటోగ్రఫీ శాఖల మంత్రి తలసాని శ్రీనివాస్‌ యాదవ్‌ తెలిపారు. శనివారం మర్రి చెన్నారెడ్డి మానవ వనరుల అభివృద్ధి కేంద్రంలో మంత్రి అద్యక్షతన గణేష్‌ ఉత్సవాల నిర్వహణ, ఏర్పాట్లపై ఉన్నతస్థాయి సమావేశం జరిగింది. ఈ సందర్భంగా మంత్రి శ్రీనివాస్‌ యాదవ్‌ మాట్లాడుతూ సెప్టెంబర్‌ 10న విగ్రహాల ప్రతిష్టతో ప్రారంభమయ్యే గణేష్‌ ఉత్సవాలు సెప్టెంబర్‌ 19 వ తేదీన నిర్వహించే శోభాయాత్ర తో నిమజ్జనం కార్యక్రమం ముగుస్తుందని చెప్పారు.
