విధులతో పాటు ఆరోగ్యంపై దృష్టి సారించండి
— జిల్లా ఎస్పీ శ్రీ కేకేఎన్ అన్బరాజన్
విశాలాంధ్ర అనంతపురం వైద్యం : ఆరోగ్యంగా ఉంటేనే ఏదైనా చేయగల్గుతామని… విధులతో పాటు ఆరోగ్యంపై దృష్టి సారించాలని జిల్లా ఎస్పీ శ్రీ కేకేఎన్ అన్బురాజన్ పిలుపునిచ్చారు. జిల్లా సాయుధ పోలీసు బలగాలకు రెండు వారాల పాటు నిర్వహించిన ” డీ మొబలైజేషన్ ” కార్యక్రమం శుక్రవారంతో ముగిసింది. స్థానిక పోలీసు పరేడ్ మైదానంలో నిర్వహించిన ముగింపు కార్యక్రమంలో జిల్లా ఎస్పీ ముఖ్య అతిథిగా పాల్గొన్నారు. ముందుగా… పరిశీలన వాహనంపై వెళ్లి ఏ.ఆర్ ప్లటూన్లను పరిశీలించారు. ఆతర్వాత ప్లటూన్ల నుండీ గౌరవ వందనం స్వీకరించారు. అనంతరం ఆయన మాట్లాడుతూ… ఈరోజు పరేడ్ అద్భుతంగా నిర్వహించడం చాలా సంతోషం. ఇలాంటి పరేడ్ ను మునుపెన్నడూ చూడలేదన్నారు. మంచి ఆహారం వేళకు తీసుకోవాలని… యోగాసనాలు, ఎక్సర్సైజులు క్రమం తప్పకుండా చేయాలన్నారు. మనకు వచ్చే జీతాన్ని ఏమాత్రం వృథా చేయకుండా ప్రస్తుత అవసరాలకు వినియోగించడంతో పాటు మున్ముందు భవిష్యత్తుకు దాచు కోవాలన్నారు. ఉద్యోగంతో పాటు కుటుంబానికి ప్రాధాన్యత ఇవ్వాలని… కుటుంబ సభ్యుల నిర్ణయాలతో ముందుకెళ్లాలని సూచించారు. జిల్లా ఏ.ఆర్ విభాగానికి ప్రత్యేకత ఉందన్నారు. సాధారణ బందోబస్తు విధుల నుండీ శాంతిభద్రతల సమస్యల వరకు ఏ.ఆర్ సిబ్బంది కీలక పాత్ర పోషిస్తున్నారన్నారు. జిల్లా ప్రశాంతంగా ఉంచడంలో సివిల్ పోలీసులతో పాటు ఏ.ఆర్ విభాగం పని చేస్తూ కుడి భుజంగా నిలిచారన్నారు. సమిష్టిగా కష్టించి రానున్న రోజుల్లో మరింత యూనిటీతో పని చేద్దామన్నారు.
ఈకార్యక్రమంలో అదనపు ఎస్పీలు ఆర్ విజయ భాస్కర్ రెడ్డి, ఎ.హనుమంతు(ఏ.ఆర్), డీఎస్పీలు బి.శ్రీనివాసులు, సీఎం గంగయ్య, బి.వి.శివారెడ్డి, జి.మునిరాజ ( ఏ.ఆర్), డీసీఆర్బీ సి.ఐ విశ్వనాథచౌదరి, ట్రాఫిక్ సి.ఐ నారాయణరెడ్డి, ఆర్.ఐ లు హరికృష్ణ, రాముడు, జిల్లా పోలీసు అధికారుల సంఘం అడహక్ కమిటీ సభ్యులు సాకే త్రిలోక్‌నాథ్‌, సుధాకర్‌రెడ్డి, గాండ్ల హరినాథ్, తేజ్ పాల్, నాగరాజు, ఆర్‌ఎస్‌ఐలు బాలాజీ నాయక్, ప్రవీణ్ కుమార్,మగ్బుల్, రమేష్ నాయక్, ఏ.ఆర్ సిబ్బంది, తదితరులు పాల్గొన్నారు.
ఆరోగ్యంగా ఉంటేనే ఏదైనా చేయగల్గుతాం…
