. నోటిఫికేషన్‌ సిద్ధం
. ఆర్డినెన్స్‌ గవర్నర్‌ ఆమోదించిన వెంటనే విడుదల
. కల్లుగీత వృత్తిదారులకు ప్రత్యేకంగా 10 శాతం షాపులు
విశాలాంధ్ర బ్యూరో – అమరావతి : రాష్ట్రంలో అక్టోబరు మొదటివారంలో అమల్లోకి రానున్న నూతన పాలసీ ప్రకారం కొత్త మద్యం షాపుల నోటిఫికేషన్‌ విడుదలకు ఎక్సైజ్‌శాఖ సిద్ధమవుతోంది. ఇప్పటికే నూతన విధానం ప్రకారం విధి విధానాలు రూపొందించిన ఎక్సైజ్‌ శాఖ… రేపో, మాపో నోటిఫికేషన్‌ జారీ చేసేందుకు సన్నద్ధమైంది. రాష్ట్రంలో మద్యం దుకాణాలను ప్రభుత్వమే నిర్వహించేలా గత వైసీపీ ప్రభుత్వం చట్టం చేసింది. ఆ చట్టాన్ని సవరించి ఆర్డినెన్స్‌ తీసుకురావాలని రాష్ట్ర మంత్రివర్గం ఇటీవల నిర్ణయించింది. ఈ ఆర్డినెన్స్‌ ఆమోదం కోసం సవరణ బిల్లును రాష్ట్ర ప్రభుత్వం గవర్నర్‌ వద్దకు పంపనుంది. గవర్నర్‌ ఆమోదం తెలిపిన వెంటనే… రాష్ట్రంలో మొత్తం 3,736 మద్యం షాపులకు ప్రభుత్వం నోటిఫికేషన్‌ విడుదల చేయనుంది. ఎన్నికల సందర్భంగా చంద్రబాబు ఇచ్చిన హామీ మేరకు ఇందులో 10 శాతం మద్యం షాపులు కల్లుగీత వృత్తిదారులకు కేటాయించనున్నారు. రిజర్వేషన్ల కోటాలోని షాపులను ఎక్కడెక్కడ కేటాయించాలన్న అంశంపై అబ్కారీశాఖ కసరత్తు చేస్తోంది. కల్లుగీత వృత్తి కులాలకు సంబంధించిన జనాభా ఏయే జిల్లాల్లో ఏ మేరకు ఉన్నారనే అంశంపై అధికారులు ఆరా తీస్తున్నారు. జనాభా ప్రాతిపదికన మద్యం షాపులను ఎక్సైజ్‌ శాఖ రిజర్వు చేయనుంది. దీనికి సంబంధించి మార్గదర్శకాలపై విడిగా నోటిఫికేషన్‌ విడుదల కానుంది. అన్‌రిజర్వుడ్‌ దుకాణాలకు ప్రతిపాదించే లైసెన్స్‌ ఫీజులో 50 శాతం మాత్రమే కల్లుగీత వృత్తిదారులు షాపులకు చెల్లించాల్సి ఉంటుంది. మద్యం షాపులకు లైసెన్స్‌ ఫీజు నాలుగు శ్లాబుల్లో రూ.50 లక్షల నుంచి రూ.85 లక్షల వరకు ఉండే అవకాశం ఉందని అధికారులు పేర్కొంటున్నారు.
అలాగే గతంలో రాత్రి 9 గంటల వరకే మద్యం షాపులు తెరచి ఉంచగా, ఇకపై ఉదయం 10 గంటల నుంచి రాత్రి 10 గంటల వరకు పనిచేయనున్నాయి. నాణ్యమైన మద్యాన్ని, జాతీయ, అంతర్జాతీయ బ్రాండ్లను అందుబాటులోకి తీసుకొస్తారు. క్వార్టర్‌ కనీస ధర రూ.99లకే విక్రయించేలా చర్యలు తీసుకోనున్నారు. ముఖ్య నగరాల్లో 12 ప్రీమియర్‌ దుకాణాలు కూడా ఏర్పాటు చేస్తున్నారు.
వీటికి ఐదేళ్లు కాలపరిమితి నిర్ణయించి లైసెన్స్‌ ఫీజు కోటి రూపాయలుగా నిర్ణయించారు. కొత్తగా వచ్చే మద్యం షాపులన్నీ రెండేళ్లపాటు కొనసాగేలా లైసెన్స్‌ ఇస్తారు.
