కుమ్ములాటల కాంగ్రెస్ ను నమ్మితే మళ్లీ కల్లోలమే…

మాది బీ-టీమో, సీ-టీమో కాదు.. ఒంటిచేత్తో ఢీకొట్టే ఢీ-టీం.. రాహుల్‌కు కేటీఆర్ కౌంటర్
బీఆర్ఎస్ పార్టీ బీజేపీకి బీ టీం.. అంటూ రాహుల్ గాంధీ చేసిన ఆరోపణలపై స్పందించిన మంత్రి కేటీఆర్.. అదే స్థాయిలో కౌంటర్ వేశారు. తమది బీజేపీ బంధువుల పార్టీ కాదు.. కాంగ్రెస్‌దే భారత రాబందుల పార్టీ అంటూ విమర్శించారు. ఏఐసీసీ అంటేనే… అఖిల భారత కరప్షన్ కమిటీ అంటూ కొత్త అబ్రివేషన్ చెప్పారు. దేశంలో… అవినీతికి, అసమర్థతకు.. ఒకే ఒక్క కేరాఫ్ అడ్రస్.. కాంగ్రెస్ పార్టీ అన్నారు. స్కాములే తాచుపాములై.. యూపీఏను.. దేశవ్యాప్తంగా కాంగ్రెస్‌ను దిగమింగిన చరిత్రను ప్రజలు మరిచిపోలేదన్నారు కేటీఆర్. తమ పార్టీ బీజేపీకి.. బీ టీమ్ కాదు.. కాంగ్రెస్ పార్టీకి.. సీ టీమ్ అంతకన్నా కాదని.. బీజేపీ-కాంగ్రెస్ రెండింటీనీ ఒంటిచేత్తో ఢీకొట్టే.. ఢీ టీమ్.. బీఆర్ఎస్ అంటూ మంత్రి కేటీఆర్ స్పష్టం చేశారు. బీఆర్ఎస్‌‌ను నేరుగా ఢీకొనే దమ్ములేక బీజేపీ భుజంపై తుపాకీ పెట్టి.. మమ్మల్ని కాల్చే కుట్ర చేస్తారా? అంటూ ప్రశ్నించారు. ఈ మిస్ ఫైరింగ్‌లో ముమ్మాటికీ కుప్పకూలేది కాంగ్రెస్సేనని ఎద్దేవా చేశారు.లక్ష కోట్లు వ్యయం కాని కాళేశ్వరం ప్రాజెక్టులో లక్షకోట్ల అవినీతా? అంటూ కేటీఆర్ ఆశ్చర్యం వ్యక్తం చేశారు. అర్థంలేని ఆరోపణలు చేసి.. ప్రజాక్షేత్రంలో ఎన్నిసార్లు నవ్వులపాలవుతారని అడిగారు. తెలంగాణ ప్రజలు కోరుతోంది.. నిర్మాణాత్మక ప్రతిపక్షమని.. ప్రాజెక్టు నిర్మాణ వ్యయం కూడా తెలియని ప్రతిపక్షం కాదన్నారు. భూములు, భూరికార్డుల చుట్టూ అల్లుకున్న సవాలక్ష చిక్కుముళ్లను విప్పిన ధరణిని ఎత్తివేసి.. మళ్లీ దళారుల రాజ్యం తెస్తామన్న రాహుల్ గాంధీని తెలంగాణ సమాజం ఎప్పటికీ క్షమించదన్నారు కేటీఆర్.కర్ణాటకలో అన్నభాగ్య హామీని గంగలో కలిపి.. ఇక్కడ 4 వేల పెన్షన్ అంటే నమ్మేదెవరు? అంటూ కేటీఆర్ ప్రశ్నించారు. ఎన్నికల్లో హామీఇచ్చినా రేషన్ ఇవ్వలేనోళ్లు.. తెలంగాణకొచ్చి డిక్లరేషన్ అంటే విశ్వసించేదెవరు? అని నిలదీశారు. కర్ణాటకలో బీజేపీని ఓడించింది అక్కడి ప్రజలు తప్ప.. ముమ్మాటికీ కాంగ్రెస్ కానే కాదని స్పష్టం చేశారు. మరో ప్రత్యామ్నాయం లేకే ఆ ఫలితం తప్ప.. అది కాంగ్రెస్ ఘనత కాదు, సమర్థత అంతకన్నా కాదని పేర్కొన్నారు.సమ్మక్క జాతరను తలపించేలా.. పండుగలా సాగుతున్న పోడుభూముల పంపిణీ రాహుల్ గాంధీకి కనబడటం లేదా..? అని కేటీఆర్ నిలదీశారు. కంటివెలుగు కింద పరీక్షలు చేయించుకోవాలని హితవు పలికారు. 4.6 లక్షల ఎకరాలు పంచి అడవిబిడ్డల జీవితాల్లో ఆనందాన్ని నింపిన మనసున్న ముఖ్యమంత్రి కేసీఆర్ అని తెలిపారు. నీళ్లు నిధులు నియామకాలు అనే ఉద్యమ నినాదాలనే కాదు.. జల్ జంగల్ జమీన్ అనే మన్యంవీరుడు కుమురం భీం కలలను కూడా సంపూర్ణంగా సాకారం చేసిన దార్శనిక ముఖ్యమంత్రి కేసీఆర్ అనే చెప్పుకొచ్చారు. తెలంగాణలో… నిరంతరం పేదల పక్షాన నిలిచిన పార్టీ మాది. బ్రోకర్లు, కబ్జాకోరుల పక్షాన ఎప్పుడూ నిలబడే పార్టీ… మీది. కారు స్టీరింగ్ కేసిఆర్ గారి చేతిలో పదిలంగానే ఉంది. కానీ కాంగ్రెస్ పైనే రాహుల్‌కు కంట్రోల్ తప్పింది. బంగాళాఖాతంలో ఆల్రెడీ నిండా మునిగిన పార్టీ కాంగ్రెస్.. ప్రజల గుండెల నిండా అభిమానం పొందిన పార్టీ బీఆర్ఎస్. మా తొమ్మిదేళ్ల పాలన.. వెలుగుల ప్రస్థానం. గత కాంగ్రెస్ పదేళ్ల పాలన.. చీకటి అధ్యాయం. కుమ్ములాటల కాంగ్రెస్ ను నమ్మితే మళ్లీ కల్లోలమే అంటూ కేటీఆర్ విమర్శనాస్త్రాలు సంధించారు.