ఉన్నత విద్య కోసం అమెరికా వెళ్లి.. అక్కడ రోడ్డు ప్రమాదంలో చనిపోయిన జాహ్నవి కందుల కేసులో కీలక పరిణామం చోటుచేసుకుంది. పెట్రోలింగ్ కారుతో వేగంగా ఢీ కొట్టి ఆమె మరణానికి కారణమైన పోలీస్ ఆఫీసర్ పై క్రిమినల్ చర్యలు తీసుకునే అవకాశం లేదని తెలిసింది. ఈ కేసులో పోలీస్ ఆఫీసర్ కెవిన్ డేవ్‌కు వ్యతిరేకంగా ఎటువంటి సాక్ష్యాలు లేవని అక్కడి న్యాయస్థానం అభిప్రాయపడింది. బుధవారం వాషింగ్టన్‌ స్టేట్‌లోని కింగ్‌ కౌంటీ ప్రాసిక్యూటర్‌ కార్యాలయం ఈ మేరకు ప్రకటన చేసింది.
గతేడాది జనవరి 23న అమెరికాలో జరిగిన రోడ్డు ప్రమాదంలో ఆంధ్రప్రదేశ్‌కు చెందిన జాహ్నవి కందుల మృతి చెందిన విషయం తెలిసిందే. పోలీస్ అధికారి నిర్లక్ష్యానికి ఆమె బలైపోయింది. పెట్రోలింగ్ వాహనం ఆమెను ఢీకొట్టింది. తాజాగా, ప్రమాదానికి కారణమైన పోలీసు అధికారి కెవిన్ డవేపై నేరాభియోగాలు మోపడం లేదని అమెరికా అధికారులు ప్రకటించారు. సాక్ష్యాధారాలు లేకపోవడమే అందుకు కారణమని కింగ్‌ కౌంటీ ప్రాసిక్యూటింగ్‌ కార్యాలయం బుధవారం వెల్లడించింది. దీనిపై సీనియర్‌ అటార్నీలతో విచారణ జరిపిన తర్వాతే ఈ నిర్ణయానికి వచ్చినట్లు పేర్కొంది.
మరోవైపు, జాహ్నవి మృతిని తక్కువ చేస్తూ హేళనగా మాట్లాడిన మరో పోలీసు అధికారి డేనియల్‌ అడెరెర్‌ ప్రమాదం జరిగిన సమయంలో అక్కడ లేడని కింగ్‌ కౌంటీ ప్రాసిక్యూటింగ్‌ అటార్నీ చెప్పారు. ఈ నేపథ్యంలో అడెరెర్‌పై తీసుకోబోయే క్రమశిక్షణా చర్యల ప్రభావం డవేపై అభియోగాలు నమోదుచేయద్దనే నిర్ణయంపై ఉండబోదని వివరించారు. అయితే, అడెరెర్‌ వ్యాఖ్యలు ఏమాత్రం ఆమోదయోగ్యం కాదని ఆయన అన్నారు. ప్రజలకు పోలీసులపై విశ్వాసం, నమ్మకం తగ్గించేలా ఉన్నాయని వ్యాఖ్యానించారు. ఇప్పటికే అతడిపై సస్పెన్షన్‌ వేటువేసిన విషయం తెలిసిందే. తీసుకోవాల్సిన చర్యల గురించి తుది విచారణ మార్చి 4న కోర్టు ముందుకు రానుంది.
తెలుగమ్మాయి జాహ్నవి కందుల మృతి కేసు.. ఆ అమెరికా పోలీస్‌కి శిక్షలేనట్టే!
