మాజీ ఎంపీ, సీపీఐ మాజీ ప్రధాన కార్యదర్శి సురవరం సుధాకర రెడ్డి
కామ్రేడ్‌ పడాల శ్యామ్‌సుందర్‌రావు జీవితచరిత్ర తప్పక చదవలసిన పుస్తకం. డాక్టర్‌ గుఱ్ఱం సీతారాములు, డాక్టర్‌ పడాల సమతా రోష్ని సంపాదకులుగా ఈ పుస్తకం ఈ మధ్యనే వెలు వడిరది. పడాల శ్యామ్‌సుందరరావు బర్మా కాందిశీకుల కుటుంబం నుండి అనేక కష్టాలు, ప్రమాదాలు ఎదుర్కొని, నెలల తరబడి నడిచి దారిలో కొందరు అప్తులను కోల్పోయి, ఆఖరకు పశ్చిమగోదావరి జిల్లాలో వారి పూర్వికుల గ్రామం చేరుకున్నారు. వారి తాతగారు ఐచ్చికంగా తన స్వంత కులాన్ని వదిలేసి, దళిత మహిళను వివాహం చేసుకొని, దళితవాడలో నివసించి, దళితుడిగా మారిన సంస్కర్త. ఆయన పేరు వీరాస్వామి. ఆయన కుమారుడు రామస్వామి. రామస్వామి కుమారుడు శ్యామ్‌సుందరరావు. వీరాస్వామి బర్మాకు వలస వెళ్ళారు. తండ్రిని తిరిగి తీసుకు వచ్చేందుకు వెళ్లిన రామస్వామి కూడా బర్మాలోనే సెటిల్‌ అయ్యారు. భూములు, ఆస్తులు సంపాదించుకున్నాడు. ఆ కాలంలో చాలామంది తెలుగువాళ్లు, బర్మాకు వలస వెళ్లే వారు. ఒక అంచనాప్రకారం దాదాపు లక్షా యాభైవేలమంది తెలుగువారు బర్మాలో ఉండేవారు.
1947లో బర్మావారు భారతీయులందర్ని కట్టుబట్టలతో వెళ్లగొడితే, రామస్వామి, శ్యామ్‌ సుందరరావు మరొక పదిమంది పనివారితో బర్మా నుండి బయలుదేరి అడవుల నుండి నడిచి, దారిలో పది మందిని కోల్పోయి, తండ్రి కొడుకు ఆరు నెలలకు నర్సాపురం చేరుకున్నారు. భయంకరమైన ప్రయాణం. 14 సంవత్సరాల వయసున్న శ్యామ్‌సుందర్‌ రావుకు బర్మీస్‌, ఇంగ్లీషు తప్ప వేరే భాషలు రావు. పాఠశాలలో తెలుగుభాష రానందున ప్రవేశం లేదు. పశువులు కాసి జీవనం కొనసాగించారు. తర్వాత ఆల్లు రామలింగయ్య ఆధ్వర్యంలో ప్రజానాట్యమండలిలో చేరి, కమ్యూనిస్టు పార్టీలో చేరారు.
పార్టీ నిషేధానికి గురైనప్పుడు రహస్య జీవితం గడిపారు. అనేక ప్రమాదాలు ఎదుర్కొన్నారు. పార్టీని విస్తృతం చేసాడు. అతి చిన్న వయసులో 24 సంవత్సరాల వయసులో పార్టీ తరఫున ఎం.ఎల్‌.ఎ.గా ఎన్నికయ్యారు. రెండోవసారి కూడా ఎన్నికయ్యారు. ఒక గుడిసెలో జీవితం ప్రారంభించి, ఎం.ఎల్‌.ఎ.గా ఐన తర్వాత ఆ తర్వాత కూడా ఆ గుడిసెలో ఉండి మరణించారు. శాసనసభలో శ్రమజీవులవాణి సమర్థవంతంగా వినిపించారు. ఆదర్శ కమ్యూనిస్టుగా జీవితాంతం గడిపారు. ఆయన జీవితచరిత్ర వివరాలను సంపాదకులు చాలా కష్టపడి సేకరించారు. ఆదర్శ జీవనం ఆయనది. ఆఖరి రోజుల్లో కొన్ని అభిప్రాయ భేదాల వల్ల ఆయన పార్టీ నుండి దూరం కావటం విషాదకరం. ఐతే ఆయన ఏ ఇతర పార్టీలో చేరలేదు. తప్పక చదవలసిన పుస్తకం.
పుస్తకం కావలసినవారు డాక్టర్‌ సమతారోష్నిని 8333839439కు సంప్రదించవచ్చు.
స్ఫూర్తినిచ్చే పుస్తకం
