జనసేన పార్టీ, ఆ పార్టీ అధినేత పవన్ కళ్యాణ్ మీద వైసీపీ నేత ముద్రగడ పద్మనాభం సంచలన వ్యాఖ్యలు చేశారు. వైసీపీలో చేరిన మరుసటి రోజే పవన్ కళ్యాణ్ మీద తీవ్రస్థాయిలో విరుచుకుపడ్డారు. తాను వైసీపీలో చేరడం మీద సోషల్ మీడియాలో జరుగుతున్న ప్రచారాన్ని ముద్రగడ పద్మనాభం ఖండించారు. కిర్లంపూడిలో విలేకర్ల సమావేశం నిర్వహించిన ముద్రగడ పద్మనాభం.. పవన్ కళ్యాణ్ లక్ష్యంగా తీవ్ర వ్యాఖ్యలు చేశారు. ఏపీలో ఎన్నికలు ముగిశాక జనసేన పార్టీ క్లోజ్ అవడం ఖాయమని జోస్యం చెప్పారు.
సీఎం జగన్ సమక్షంలో వైసీపీలో చేరిన దగ్గర నుంచి సోషల్ మీడియాలో నాపై తప్పుడు రాతలు రాస్తున్నారు. నేనేమీ కండీషన్లు పెట్టి వైసీపీలో చేరలేదు. ఎలాంటి షరతులు లేకుండానే వైఎస్‌ఆర్‌సీపీలో చేరా. ప్రజలకు సేవ చేయడానికే ఈ పార్టీలో చేరా. కాపుల, దళితుల కోసం నేను ఉద్యమాలు చేశా.దళితుల భిక్షతోనే ఈ స్థాయికి వచ్చా. నేనేదో ఆశించి వైసీపీలో చేరలేదు. రాష్ట్ర ప్రయోజనాల కోసం ఈ పార్టీలో చేరాను. రాజకీయాల్లో మొలతాడు లేనివాడు కూడా నన్ను విమర్శిస్తున్నాడు. మీరు చెప్పినట్లు నేనేందుకు రాజకీయం చేయాలి. నాకు చెప్పడానికి మీరెవరూ అంటూ ముద్రగడ పద్మనాభం ప్రశ్నించారు.జగన్ దగ్గరకు ఎందుకు వెళ్లావు.. పవన్ వద్దకు ఎందుకు వెళ్లలేదంటూ కొందరు కామెంట్లు పెడుతున్నారన్న ముద్రగడ పద్మనాభం.. జగన్ కుటుంబానికి రాజకీయంగా ఒక చరిత్ర ఉందన్నారు. పవన్ కళ్యాణ్ సినిమాల్లో హీరో కావచ్చేమో కానీ.. రాజకీయాల్లో మాత్రం తాను హీరోనని.. మీరా నాకు పాఠాలు చెప్పేంది?్ణ్ణ అని సెటైర్లు వేశారు. వైసీపీ వ్యవస్థాపకుల్లో తానూ ఒకడినన్న ముద్రగడ పద్మనాభం.. కొన్ని కారణాల వలన జగన్‌కు దూరమయ్యాయనని.. మళ్లీ ఇప్పుడు చేరడం ఆనందంగా ఉందన్నారు. అధిష్టానం ఆదేశిస్తే ఎన్నికల్లో పోటీ చేస్తానని ప్రకటించారు. మరోవైపు పొత్తులో భాగంగా జనసేనకు 21 సీట్లు కేటాయించడంపై ముద్రగడ కీలక వ్యాఖ్యలు చేశారు. 21 సీట్లతో పవన్ కళ్యాణ్ కూడా బాధపడే ఉంటాడన్న ముద్రగడ పద్మనాభం.. ఇచ్చినవి కూడా టీడీపీకి తిరిగి ఇచ్చేస్తే మంచిందంటూ ఎద్దేవా చేశారు. పవన్ కళ్యాణ్‌ను మారుద్దామని ఎంతగా ప్రయత్నించినా కుదరలేదన్న ఆయన..21 సీట్లలోనే పోటీకి పరిమితం కావటంతో పవన్ కళ్యాణ్ బలమెంతో ఏపీ ప్రజలకు అర్థమైపోయిందన్నారు. వచ్చే ఎన్నికల తర్వాత జనసేన పార్టీ క్లోజ్ అవ్వడం ఖాయమని ముద్రగడ పద్మనాభం కీలక వ్యాఖ్యలు చేశారు.
ఎన్నికల తర్వాత జనసేన క్లోజ్ కావడం ఖాయం: ముద్రగడ పద్మనాభం
