అదానీ హిండెన్‌బర్గ్ కేసుపై సుప్రీం కోర్టు బుధవారం రోజు కీలక తీర్పు వెలువరించింది. మార్కెట్ నియంత్రణ సంస్థ సెక్యూరిటీస్ అండ్ ఎక్స్చేంజ్ బోర్డ్ ఆఫ్ ఇండియా (SEBI) ఈ కేసులో పెండింగ్ దర్యాప్తును మరో 3 నెలల్లో పూర్తి చేయాలని స్పష్టం చేసింది. ఇదే సమయంలో ప్రస్తుతం SEBI దర్యాప్తు చేస్తున్న కేసును కేంద్ర దర్యాప్తు సంస్థకు (CBI) బదిలీ చేయాలన్న పలువురు పిటిషనర్ల విజ్ఞప్తిని కూడా తిరస్కరించింది. భారత ప్రధాన న్యాయమూర్తి సీజేఐ డీవై చంద్రచూడ్, న్యాయమూర్తులు జేబీ పార్దివాలా, మనోజ్ మిశ్రాతో కూడిన బెంచ్ ఈ ఆదేశాలు జారీ చేసింది.న్యాయవాదులు విశాల్ తివారీ, ఎంఎల్ శర్మ, కాంగ్రెస్ నాయకుడు జయ ఠాకుర్, అనామిక జైశ్వాల్ .. ప్రజా ప్రయోజన వ్యాజ్యాలు (PIL) దాఖలు చేయగా.. సుప్రీం కోర్టు వీటిని పరిశీలించింది. గతేడాది నవంబర్ 24న ఈ కేసుకు సంబంధించి వాదనలు విన్న కోర్టు.. తీర్పు వాయిదా వేసింది. గతేడాది జనవరి 24న అమెరికాకు చెందిన షార్ట్ సెల్లర్ హిండెన్‌బర్గ్ రీసెర్చ్.. అదానీ గ్రూప్‌పై సంచలన ఆరోపణలు చేసిన సంగతి తెలిసిందే. అదానీ గ్రూప్.. భారత స్టాక్ మార్కెట్లలో అవకతవకలకు పాల్పడుతుందని.. షేర్ల ధరల్ని కృత్రిమంగా పెంచుతోందని ఆరోపించింది. ఈ దెబ్బకు అదానీ గ్రూప్ షేర్లు భారీగా పతనం అయ్యాయి. చాలా వరకు షేర్లు 60 శాతం వరకు పడిపోయాయి. ఇంకా అదానీ వ్యక్తిగత సంపద కూడా పెద్ద మొత్తంలో పడిపోయింది. ఈ క్రమంలోనే ప్రపంచ కుబేరుల జాబితాలో అదానీ టాప్-3 నుంచి ఏకంగా 30 అవతలికి పడిపోయారు. ఇటీవల సుప్రీం కోర్టు నుంచి సానుకూల వ్యాఖ్యల తర్వాత వరుసగా అదానీ షేర్లు అప్పర్‌సర్క్యూట్ కొట్టాయి. దీంతో అదానీ చాలా వరకు కోలుకున్నారు. ఇప్పుడు సుప్రీం కోర్టు తీర్పు తర్వాత కూడా అదానీ షేర్లు చాలా వరకు పెరిగాయి. అదానీ ఎనర్జీ సొల్యూషన్స్ షేరు దాదాపు 10 శాతం పెరిగింది. అదానీ గ్రీన్, అదానీ విల్మర్, NDTV 4 శాతం పుంజుకున్నాయి. అదానీ టోటల్ గ్యాస్ 7 శాతానికిపైగా పుంజుకుంది. అదానీ గ్రూప్ మిగతా స్టాక్స్ కూడా లాభాల్లోనే ఉన్నాయి.
