కర్ణాటక పోలీసులు పట్టణ జ్యువెలర్స్ వ్యాపారిని తీసుకువెళ్లడం దారుణం

పట్టణ జ్యువెలర్స్ సంఘం
విశాలాంధ్ర – ధర్మవరం : పట్టణంలోని షాజీన్ అనే స్వర్ణకారుల వ్యాపారస్తుని చిత్రదుర్గ పోలీసులు తీసుకొని వెళ్లడం దారుణమని పట్టణ జ్యువెలర్స్ సంఘం అధ్యక్షులు ఖలీల్ రెహమాన్, ఉపాధ్యక్షులు కేఎస్ ప్రకాష్, ప్రముఖ వ్యాపారవేత్త రౌవుఫ్ తెలిపారు. ఈ సందర్భంగా చిత్రదుర్గ పోలీసులు పట్టణంలోని షాజిన్ అనే స్వర్ణకారుల వ్యాపారస్తుని అనుకోకుండా వన్ టౌన్ పోలీసు ద్వారా తీసుకు వెళ్ళడం పద్ధతి కాదని తెలిపారు. గత నెలలోనే అనంతపురం పోలీసులకు ఈ కేసు మీద పూర్తిగా రికవరీ చేసి ఇవ్వడం జరిగిందని తెలిపారు. మరలా అదే కేసు మీద చిత్రదుర్గ పోలీసులు అనంతపురం పోలీసుల సహకారంతో మా వ్యాపారిని తీసుకు పోవడం ఎంతవరకు సమంజసం అని తెలిపారు. పట్టణ పోలీస్ వ్యవస్థ స్వర్ణకారుల వ్యవస్థపై కక్ష సాధింపు చర్యలు కూడా చేస్తోందని, మాకు న్యాయం చేయాలని ఆనాడు మాజీ ముఖ్యమంత్రి కీర్తిశేషులు వైయస్సార్ రాజశేఖర్ రెడ్డికి, ప్రస్తుతం ముఖ్యమంత్రి చంద్రబాబునాయుడు కూడా తెలపడం జరిగిందని, ఓ చట్టం ద్వారా మాకు రక్షణ భద్రత ఉన్నా కూడా మా వ్యాపారస్తుల్ని తీసుకొని వెళ్లడం ఎంతవరకు సమంజసమని వారు పోలీసులను ప్రశ్నించారు. ఏది ఏమైనా మా వ్యాపారస్తుని విడుదల చేసినంతవరకు పట్టణ జ్యువెలర్స్ సంఘం తరఫున పోరాటాలు నిర్వహిస్తామని తెలిపారు. అనంతపురం ఎస్పీ ను కలిసి జరిగిన వివరాలను తెలియజేసి మాకు న్యాయం చేసే విధంగా తాము పోరాడుతామని తెలిపారు. ఈ కార్యక్రమంలో వందలాది పట్టణ జ్యువెలర్స్ వారు పాల్గొనడం జరిగింది.