విశాలాంధ్ర – చోడవరం (అనకాపల్లి జిల్లా) : ప్రభుత్వ పాఠశాలల్లో మధ్యాహ్న భోజన పథకం కార్మికులను పొమ్మన లేక అధికార ప్రభుత్వం పొగ పెట్టే పనిలో పడిందని ఎం.డి.ఎం. కార్మికులు సంఘం రాష్ట్ర అధ్యక్షురాలు గూనూరు వరలక్ష్మీ ఆరోపిస్తున్నారు. దీనిపై శుక్రవారం మీడియాతో మాట్లాడుతూ ప్రతీ 100 మందికి ఒక భోజనం కౌంటర్ పెట్టాలని అధికారులు ఆదేశాలు జారి చేయడంతో స్కూల్స్లో హెచ్.ఎం.లు తీవ్ర ఒత్తిడి చేస్తున్నారన్నారు. ఖచ్చితంగా ఆరు కౌంటర్లు, లేదా ఐదు కౌంటర్లు పెట్టాలని హుకుమ్ జారి చేస్తున్నారని, కౌంటర్లు పెట్టడానికి సరిపడా కార్మికులు లేకుండా వంట పాత్రలు లేకుండా అన్ని కౌంటర్లు ఎలా పెట్టాలని మధ్యాహ్నం భోజన పథకం రాష్ట్ర అధ్యక్షులు గూనూరు వరలక్ష్మి ప్రశ్నించారు. ప్రభుత్వ విధానంతో మధ్యాహ్నం భోజన కార్మికులు ఎంత ఆందోళన చెందుతారని అన్నారు. కనీస ఆలోచన లేకుండా ఇలా పొమ్మనకుండా పొగ పెట్టే పద్ధతిలో వ్యవహరించడం దుర్మార్గంగా ఉందని, దీనివల్ల స్కూల్స్లో ఒత్తిడి తట్టుకోలేక ఆవేదన చెందాల్సిన దుస్థితి ఏర్పడిందని, ఆవేదన వ్యక్తం చేశారు. ఒకవైపు వర్కర్స్ ని స్కూల్స్లో కుదించేస్తూ 9, 10 వంట చేస్తున్న కార్మికులకు వేతనం కూడా లేకుండా ప్రతి హై స్కూల్ కి ముగ్గురు లేదా నలుగురు కార్మికులను ఇస్తున్నారని,
ఆరు కౌంటర్ల ద్వారా సుమారు 18 మంది తో పనిచేయాల్సిన పరిస్థితి ఏర్పడిందని, ఇది ఎలా సాధ్యమని ఆమె ప్రశ్నించారు. అవసరమైతే శానిటేషన్ కార్మికుల సహాయం తీసుకోవాలని చెబుతున్నారన్నారు. వాస్ రూమ్స్ క్లీన్ చేసే వాళ్లు భోజనం పిల్లలకు ఎలా వడ్డిస్తారని అన్నారు. ఇలాంటి రకరకాల పని పద్ధతులను తీసుకొస్తే ఎలా అని, దీనివల్ల మధ్యాహ్న భోజన కార్మికులు ఎంత ఇబ్బంది పడాల్సిన పరిస్థితి వస్తుందో కనీసం అర్థం చేసుకోకపోవడం దురదృష్టకరమని అన్నారు. స్కూల్స్లో ఎలాంటి సదుపాయాలు లేకుండా రకరకాలుగా పని ఒత్తిడికి గురిచేస్తూ పథకాన్ని నీరు గారిచే పనులు ప్రభుత్వం ప్రభుత్వ అధికారులు చేస్తున్నారనేది తేటతెల్లం అవుతుందని ఆమె అన్నారు. ఇప్పటికైనా వందలాదిమందికి వంట చేస్తున్న కార్మికుల శ్రమ ని అర్థం చేసుకుని జిల్లా అధికారులు ప్రభుత్వం ఆలోచన చేయాలని మధ్యాహ్న భోజన యూనియన్ గా డిమాండ్ చేస్తున్నాం అని అన్నారు. ఈ కార్యక్రమంలో ఆర్ బుచ్చి రాజమ్మ, బి లక్ష్మి, మంగమ్మ, హసీనా తదితరులు పాల్గొన్నారు….
మధ్యాహ్న భోజన పథకానికి పొగ పెడుతున్న ప్రభుత్వం
