ఆకలి, పేదరికంపై పోరుకుఅంతర్జాతీయ కూటమి

‘జీ20’ ప్రారంభ సభలో బ్రెజిల్‌ ప్రకటన
రియో డి జనేరియో : ఆకలి, పేదరికంపై పోరాటానికి అంతర్జాతీయ కూటమి ఏర్పాటైంది. జీ20 సదస్సు ప్రారంభోత్సవంలో ఈ కూటమిని బ్రెజిల్‌ అధó్యక్షుడు లులా డా సిల్వా ప్రకటించారు. బ్రెజిల్‌ నిర్దేశించిన లక్ష్యసాధనకు 26 అంతర్జాతీయ సంస్థలు, 81 దేశాలు, తొమ్మిది ఆర్థిక సంస్థలు, 31 స్వచ్చంధ సంస్థల మద్దతు ప్రకటించాయి. ‘73.3 కోట్ల మందికి పౌష్టికాహారం లభించని పరిస్థితుల్లో నేడు మనం బతుకున్నామని, ఈ సంఖ్య బ్రెజిల్‌, మెక్సికో, జర్మనీ, బ్రిటన్‌, దక్షిణ అమెరికా, కెనడా దేశాల జనాభాకు సమానమని లులా అన్నారు. 73 కోట్ల మందికిపైగా ఆకలితో అలమటిస్తున్నారంటే పరిస్థితి ఎంత జఠిలంగా ఉందో అర్థం చేసుకోవచ్చన్నారు. ఏటా ఆరు బిలియన్ల టన్నుల ఆహారోత్పత్తి ఉన్నాగానీ ఇంతటి పరిస్థితులు ఆమోదయోగ్యం కాదని అన్నారు. ఆకలిపై, పేదరికంపై పోరాటానికిగాను జీ20కి బ్రెజిల్‌ అధ్యక్షత వహిస్తున్న సందర్భంగా అంతర్జాతీయ కూటమి (గ్లోబల్‌ అలయెన్స్‌) ఏర్పాటు అయిందని లులా డా సిల్వా తెలిపారు.
ఈ కూటమి వల్ల న్యాయం జరగడమే కాకుండా తమకు గొప్ప వారసత్వం… ప్రపంచ శాంతి, సుసంపన్న సమాజాల నిర్మాణానికి చేయూత లభిస్తుందని ఆకాంక్షించారు. తమ ఉద్దేశానికి మద్దతిచ్చిన అందరికీ ఆయన కృతజ్ఞతలు తెలిపారు. బ్రెజిల్‌ రాజధాని రియో డి జనేరియోలో ఈనెల 18,19 తేదీల్లో జీ20 సమావేశాలు జరిగాయి. కాగా, 2023, డిసెంబరు ఒకటో తేదీ నుంచి జీ 20 అధ్యక్ష పగ్గాలను బ్రెజిల్‌ చేపట్టిన విషయం విదితమే.