మాస్కో: రష్యా అధ్యక్షుడు వ్లాదిమిర్‌ పుతిన్‌ వచ్చే ఏడాది భారత్‌లో పర్యటించనున్నారు. పరస్పర వార్షిక పర్యటనల్లో భాగంగా పుతిన్‌ భారత్‌కు రానున్నారని దౌత్య వర్గాలు తెలిపాయి. ఈ ఏడాది జులైలో మాస్కోలో జరిగిన సదస్సు సందర్భంగా భారత్‌కు రావాలంటూ పుతిన్‌ను ప్రధాని మోదీ ఆహ్వానించారు. భారత్‌కు చెందిన సీనియర్‌ ఎడిటర్లతో మంగళవారం ఉదయం వీడియో సంభాషణ జరిపిన క్రెమ్లిన్‌ అధికార ప్రతినిధి దిమిత్రీ పెస్కోవ్‌ ఈ విషయాన్ని తెలిపారు. పుతిన్‌ భారత్‌కు రానున్నట్లు చెప్పారు. అయితే ఆయన పర్యటన తేదీ ఇంకా ఖరారు కాలేదని పెస్కోవ్‌ అన్నారు.
అమెరికాకు రష్యా హెచ్చరిక: అణ్వస్త్రాలకు సంబంధించి వ్లాదిమిర్‌ పుతిన్‌ మరోమారు అమెరికాను హెచ్చరించారు. ఏదేని అణుశక్తి దేశంతో కలిసి మాపై క్షిపణులతో దాడి చేస్తే అణ్వస్త్రాలు బయటకు తీస్తామని తేల్చిచెప్పారు. నాటో సాయుధ సంపత్తి లక్ష్యంగా దాడులు చేస్తామని, ఇందుకోసం వ్యూహాలు సిద్ధంగా ఉన్నాయని పుతిన్‌ అన్నారు. అమెరికా దూకుడుకు కళ్లెం వేసేందుకు కొత్త అణు విధానాన్ని పుతిన్‌ మంగళవారం ఆమోదించారు. రష్యాలోకి దీర్ఘశ్రేణి క్షిపణలతో దాడి చేసేందుకు వీలుగా ఉక్రెయిన్‌కు అమెరికా మద్దతివ్వడానికి… అధికారిక అణు విధానాన్ని సవరించడం ద్వారా రష్యా బదులిచ్చింది. అణ్వస్త్రాల వినియోగాన్ని సులభతరం చేసేలా కొత్త విధానాన్ని పుతిన్‌ ఆమోదించారు. ఇప్పటికే తన అణు విధానానికి సవరణలు చేసిన రష్యా… తాజాగా దానిని మరింత సరళతరం చేసుకుంది.
త్వరలో భారత్‌కు పుతిన్‌
