పిటిషన్లన్నీ బదిలీ…30 లోగా వివరాలు
సాయికృష్ణ కేసుపై సుప్రీం ఆదేశం
న్యూఢిల్లీ: తెలుగు రాష్ట్రాల్లో సంచలనం సృష్టించిన గాదె సాయికృష్ణ లాకప్ డెత్ కేసులో కీలక పరిణామం చోటు చేసుకుంది. కేసు దర్యాప్తు విషయంలో ఏపీ ప్రభుత్వం, పోలీసుల తీరు పట్ల సుప్రీంకోర్టు ఆగ్రహం వ్యక్తం చేసింది. విచారణను ఇక తామే చేపడతామని చెబుతూ… ఏపీ హైకోర్టు విచారణపై స్టే విధిస్తూ తక్షణమే ఈ కేసును బదిలీ చేస్తున్నట్లు వెల్లడించింది. గాదె సాయికృష్ణ మృతి వ్యవహారంపై వైసీపీ ఎంపీ గురుమూర్తి సుప్రీం కోర్టులో ఓ పిటిషన్ వేశారు. డీజీపీతో పాటు విజయవాడ సీపీపై చర్యలు తీసుకోవాలని ఆయన కోరారు. బుధవారం జస్టిస్ విక్రమ్నాథ్ నేతృత్వంలోని ధర్మాసనం ఈ పిటిషన్పై కీలక ఆదేశాలు జారీ చేసింది.
సాయికృష్ణ కేసులో హైకోర్టు విచారణపై స్టే విధిస్తూ ప్రతివాదులకు నోటీసులు జారీ చేసింది. సెప్టెంబర్ 30లోపు సాయికృష్ణ కేసుకు సంబంధించిన పూర్తి వివరాలను సీల్డ్ కవర్లో సమర్పించాలని సిట్ను ఆదేశించింది. హైకోర్టులోని ఈ కేసుకు సంబంధించిన అన్ని పిటిషన్లను, రికార్డులను తమకు బదిలీ చేయాలని స్పష్టం చేసింది. కేసు తదుపరి విచారణను అక్టోబర్ 12కు వాయిదా వేసింది. ఈ క్రమంలో సాయికృష్ణ కేసు దర్యాప్తు జరిగిన తీరును తీవ్రంగా తప్పుబట్టింది. కస్టడీలో ఉన్న వ్యక్తి ఆచూకీ లేకుండా పోవడం చట్టవిరుద్ధమేనని స్పష్టం చేసింది. ‘పోలీసు కస్టడీలో సాయికృష్ణ అదృశ్యం కావడం చట్టవిరుద్ధం. పోలీస్ స్టేషన్లోని సీసీటీవీ ఫుటేజ్ ధ్వంసం చేస్తే ఏసీపీ చూస్తూ కూర్చున్నారా? మీ డ్యూటీ మీకు తెలియదా? మీ తీరు ఘోరంగా ఉంది. సాయికృష్ణ మృతదేహం ఇప్పటిదాకా దొరకలేదంటే… పోలీసుల దర్యాప్తు తీరు ఎంత ఆందోళనకరంగా ఉందో అర్థమవుతోంది’ అని ధర్మాసనం వ్యాఖ్యానించినట్లు సమాచారం. సాయికృష్ణ కస్టడీలో ఉన్న సమయంలో ఏం జరిగిందన్న దానిపై ఇప్పటికే అనేక ఆరోపణలుండగా… ఈ కేసు దర్యాప్తులో భాగంగా పోలీసులు సేకరించిన కృష్ణలంక పోలీస్స్టేషన్ సీసీటీవీ రికార్డుల్లో కీలక సమయానికి సంబంధించిన ఫుటేజీ అందుబాటులో లేదని గతంలో కోర్టు రికార్డుల్లో నమోదైంది. ప్రస్తుతం కేసు దర్యాప్తు చేస్తున్న ప్రత్యేక దర్యాప్తు బృందం (సిట్) నుంచి పూర్తి వివరాలను సుప్రీంకోర్టు కోరింది.
కేసు పూర్వాపరాలు
గాదె సాయికృష్ణను 2026 మే 6న మార్కాపురం నుంచి టాస్క్ఫోర్స్ పోలీసులు అదుపులోకి తీసుకుని విజయవాడలోని కృష్ణలంక పోలీస్స్టేషన్కు తీసుకొచ్చినట్లు దర్యాప్తు రికార్డుల్లో ఉంది. అనంతరం అతడిని మేజిస్ట్రేట్ ముందు హాజరుపరచలేదని, ఆ తర్వాత అతడి ఆచూకీ తెలియలేదని ప్రాసిక్యూషన్ పేర్కొంది. సాయికృష్ణ తల్లి విజయలక్ష్మీ తన కుమారుడిని అక్రమంగా నిర్బంధించి, చిత్రహింసలకు గురిచేసి మృతిచెందేలా చేశారని, మృతదేహాన్ని కూడా మాయం చేశారని ఆరోపిస్తూ హైకోర్టును ఆశ్రయించారు. జూన్ 19న కేసు నమోదు కాగా, జూన్ 21న రాష్ట్ర ప్రభుత్వం సిట్ను ఏర్పాటు చేసింది. అప్పటి కృష్ణలంక సీఐ ఎస్ఎస్వీవీ నాగరాజును సిట్ అరెస్టు చేసింది. ఆయనపై సాయికృష్ణ కస్టడీ మృతి కేసులో ప్రధాన నిందితుడిగా ఆరోపణలు ఉన్నాయి. అయితే కేసులోని ఆరోపణలు, దర్యాప్తులో తేలాల్సిన అంశాలపై తుది నిర్ణయం ఇంకా రావాల్సి ఉంది. తాజాగా సెప్టెంబరు 21న సిట్ విజయవాడ ఏసీబీ కోర్టులో ఛార్జ్షీట్ దాఖలు చేసింది. అందులో సాయికృష్ణను కస్టడీలో కొట్టినట్లు, అనంతరం రాణిగారితోటలోని ఓ ప్రైవేటు భవనానికి తరలించగా అక్కడ అతడు కుప్పకూలి మృతి చెందినట్లు దర్యాప్తులో తేలిందని పేర్కొంది. నిందితుల్లో ఒకరైన జి. సురేశ్ సిట్కు ఇచ్చిన వాంగ్మూలంలో సాయికృష్ణను పోలీసులు కొడుతుండగా తాను చూశానని, అనంతరం అతడు కుప్పకూలి చనిపోయినట్లు తెలిపినట్లు నివేదికలు వెల్లడించాయి. మృతదేహాన్ని ఆధారాలు లేకుండా చేసేందుకు దహనం చేసినట్లు కూడా సిట్ ఆరోపించినట్లు సమాచారం. ఈ కేసులో అప్పటి కృష్ణలంక సీఐ ఎస్ఎస్వీవీ నాగరాజుతో పాటు మరో ఆరుగురిని నిందితులుగా చేర్చారు.
