ఐదేళ్లలో 20 వేల స్టార్టప్‌ల స్థాపనే లక్ష్యం
రతన్‌ టాటా ఇన్నోవేషన్‌ హబ్‌లో భాగస్వాములుకండి
పారిశ్రామికవేత్తలు, మేధావులకు సీఎం చంద్రబాబు పిలుపు
విశాలాంధ్ర బ్యూరో – అమరావతి : రాష్ట్ర ప్రభుత్వం తలపెట్టిన ‘రతన్‌ టాటా ఇన్నోవేషన్‌ హబ్‌’ని తీర్చిదిద్దేందుకు, ‘వన్‌ ఫ్యామిలీ-వన్‌ ఎంట్రప్రెన్యూర్‌’ సంకల్పాన్ని నిజం చేసేందుకు పారిశ్రామికవేత్తలు, కార్పొరేట్‌ సంస్థలు, ప్రొఫెసర్లు, మేధావులు ముందుకురావాలని ముఖ్యమంత్రి నారా చంద్రబాబు నాయుడు పిలుపునిచ్చారు. ఆంధ్రప్రదేశ్‌ నుంచి కొత్తగా పారిశ్రామిక వేత్తలు రావాలని, నూతన ఆవిష్కరణలకు ఏపీ హబ్‌ కావాలన్నారు. అదే స్థాయిలో పెట్టుబడులు కూడా ఆశిస్తున్నామని అన్నారు. అందిరిలో స్ఫూర్తి నింపేందుకే ఇన్నోవేషన్‌కు హబ్‌కు రతన్‌ టాటా వంటి గొప్ప వ్యక్తి పేరు పెట్టామని చెప్పారు. బుధవారం సచివాలయంలో ప్రముఖ పారిశ్రామికవేత్తలు, విద్యావంతులతో ‘రతన్‌ టాటా ఇన్నోవేషన్‌ హబ్‌’ గురించి ముఖ్యమంత్రి సమావేశం అయ్యారు. ఆర్టీఐహెచ్‌ వైస్‌ చైర్మన్‌గా వ్యవహరిస్తున్న టాటా గ్రూపు, టాటా సన్స్‌ చైర్మన్ ఎన్‌ చంద్రశేఖరన్‌ సహా మరికొందరు ప్రముఖులు వీడియో కాన్ఫరెన్స్‌ ద్వారా సమావేశంలో పాల్గొన్నారు. ఈసందర్భంగా మాట్లాడుతూ భారతీయులు దేశవిదేశాల్లో పారిశ్రామికవేత్తలుగా ఎదిగారని… అలాగే తలసరి ఆదాయంలోనూ విదేశీయులు కన్నా ఎక్కువ ఆర్జిస్తున్నారని, వారిలో 30 శాతం తెలుగు ప్రజలు ఉన్నందుకు తనకు గర్వంగా ఉందని ముఖ్యమంత్రి అన్నారు. నాడు హైదరాబాద్‌ను ఐటీ హబ్‌ చేసినట్టుగానే, ఇప్పుడు అమరావతిని క్వాంటమ్‌ వ్యాలీ చేయాలనేది తన సంకల్పంగా చెప్పారు.గతంలో తమ ప్రభుత్వం పీ3 కార్యక్రమాన్ని చేపట్టిందని దాంతో కొన్ని కుటుంబాలు ఆర్ధికంగా నిలదొక్కుకున్నాయని… ఈసారి జీరో పావర్టీ-పీ4 కార్యక్రమాన్ని ప్రవేశపెట్టినట్టు ముఖ్యమంత్రి చెప్పారు.
వచ్చే 5 ఏళ్లలో 20వేల స్టార్టప్‌లు
వచ్చే ఐదేళ్లలో 20వేల స్టార్టప్‌లు ఏర్పాటు అయ్యేలా చూడాలనేది ప్రభుత్వ లక్ష్యం. దీంతో లక్ష మందికి ఉద్యోగాలు లభిస్తాయి. 10 సెంటర్‌ ఆఫ్‌ ఎక్సలెన్స్‌లు వస్తాయి. రతన్‌ టాటా ఇన్నోవేషన్‌ హబ్‌గా అమరావతి ఉంటుంది. దీనికి గ్రూపు లీడర్‌గా టాటా గ్రూపు ఉంటుంది. ఎల్‌ అండ్‌ టీ, ఎఎంఎన్‌ఎస్‌ పార్టనర్లుగా వ్యవహరిస్తాయి. అమరావతి హబ్‌కు రాష్ట్రంలో 5 స్పోక్స్‌ అనుబంధంగా ఉంటాయి. స్పోక్స్‌ లీడ్‌ పార్టనర్లుగా అనంతపురానికి-జెఎస్‌డబ్లు, తిరుపతికి-అదానీ గ్రూపు, విజయవాడకు-మేఘా గ్రూపు, రాజమహేంద్రవరానికి-గ్రీన్‌కో, విశాఖపట్నానికి-జీఎంఆర్‌ గ్రూపు వ్యవహరిస్తాయి. ఆర్టీఐహెచ్‌లో ఇంక్యుబేటర్‌, ఎంఎస్‌ఎంఈ ఫెసిలిటేషన్‌ సెంటర్‌, బ్యాంకింగ్‌ లింకేజ్‌, ట్రైనింగ్‌, వీసీ ఫండిరగ్‌ హ్యాండ్‌ హోల్డింగ్‌, సెంటర్స్‌ ఆఫ్‌ ఎక్సలెన్స్‌, హైపెర్ఫార్మెర్స్‌ కంప్యూటింగ్‌ ఇన్ఫ్రాస్ట్రక్చర్‌, మార్కెట్‌ లింకేజ్‌, రా మెటీరియల్‌ సోర్సింగ్‌ సపోర్ట్‌, ప్రోటోటైపింగ్‌ సెంటర్‌, ఔట్‌ డేటింగ్‌ టెస్టింగ్‌ ట్రాక్స్‌, హైస్పీడ్‌ ఇంటర్నెట్‌ ఉంటాయని సీఎం వివరించారు. ప్రభుత్వ లక్ష్యానికనుగుణంగా అందరూ సహకరించి ఏపీని అభివృద్ధిలో అగ్రగామిగా నిలపాలని చంద్రబాబు కోరారు.
