దేశంలోని టెలివిజన్, రేడియో ప్రసార రంగంలో భారీ సంస్కరణలకు కేంద్ర ప్రభుత్వం శ్రీకారం చుట్టింది. ఇప్పటివరకు వేర్వేరుగా ఉన్న అనేక మార్గదర్శకాలను ఒకే గొడుగు కిందకి తీసుకొస్తూ టెలికమ్యూనికేషన్స్ (టెలివిజన్, రేడియో, అనుబంధ సేవలు) రూల్స్, 2026ః పేరుతో ముసాయిదా నియమావళిని విడుదల చేసింది. కేంద్ర సమాచార, ప్రసార మంత్రిత్వ శాఖ ఈ విషయాన్ని అధికారికంగా ప్రకటించింది. కొత్త టెలికమ్యూనికేషన్స్ చట్టం-2023కు అనుగుణంగా ఈ మార్పులు చేపట్టినట్టు తెలిపింది. ఈ కొత్త ముసాయిదా నిబంధనలతో ప్రసార పరిశ్రమకు ఏకీకృత, అత్యంత సరళీకృత నియమావళి అందుబాటులోకి వస్తుందని మంత్రిత్వ శాఖ పేర్కొంది. టీవీ, రేడియో ప్రసార రంగంలో వ్యాపార సరళీకరణను (ఈజ్ ఆఫ్ డూయింగ్ బిజినెస్) ప్రోత్సహించడమే ఈ సంస్కరణల ప్రధాన లక్ష్యమని స్పష్టం చేసింది. ఈ కొత్త నియమావళి అమల్లోకి వస్తే, ప్రస్తుతం ఉన్న అనేక పాత గైడ్లైన్స్ రద్దవుతాయి.
ఒకే గొడుగు కిందకి రానున్న సేవలు
ప్రస్తుతం వేర్వేరుగా ఉన్న పలు విధానాలను ఈ కొత్త ముసాయిదాలో విలీనం చేశారు. వాటిలో ముఖ్యమైనవి:
శాటిలైట్ టెలివిజన్ ఛానళ్ల అప్లింకింగ్, డౌన్లింకింగ్ మార్గదర్శకాలు.
డైరెక్ట్-టు-హోమ్ (డీటీహెచ్) బ్రాడ్కాస్టింగ్ సేవల లైసెన్సింగ్ విధానాలు.
హెడ్ఎండ్-ఇన్-ది-స్కై (హెచ్ఐటీఎస్) ప్రసార సేవల మార్గదర్శకాలు.
ప్రైవేట్ ఏజెన్సీల ద్వారా ఎఫ్ఎం రేడియో సేవల విస్తరణ (ఫేజ్-III) విధానాలు.
కమ్యూనిటీ రేడియో స్టేషన్ల ఏర్పాటుకు సంబంధించిన మార్గదర్శకాలు.
కొత్త ముసాయిదాలోని కీలక అంశాలు
ఈ ముసాయిదాలో పలు కీలక సంస్కరణలను ప్రతిపాదించారు. అన్ని రకాల అనుమతుల ప్రక్రియను డిజిటల్ రూపంలోకి మార్చనున్నారు. అనుమతుల కోసం గతంలో తప్పనిసరిగా ఉన్న గ్రాంట్ ఆఫ్ పర్మిషన్ అగ్రిమెంట్ (జీఓపీఏ) పద్ధతిని తొలగించారు. దీనివల్ల విధానాలు మరింత సులభతరం కానున్నాయి. ఏదైనా వివాదాలు తలెత్తితే వాటి పరిష్కారం కోసం పారదర్శక యంత్రాంగాన్ని కూడా ఏర్పాటు చేయనున్నారు. ఈ మార్పులన్నీ ప్రసార రంగంలో వ్యాపారాన్ని సులభతరం చేస్తాయని కేంద్రం విశ్వాసం వ్యక్తం చేసింది.
ఈ ముసాయిదా నియమావళిని సమాచార, ప్రసార మంత్రిత్వ శాఖ వెబ్సైట్లో ప్రజలు, ఇతర మంత్రిత్వ శాఖల సంప్రదింపుల కోసం అందుబాటులో ఉంచినట్టు అధికారులు తెలిపారు. దీనిపై సూచనలు, సలహాలు, లేదా అభిప్రాయాలను జులై 27వ తేదీలోగా మంత్రిత్వ శాఖలోని అండర్ సెక్రటరీ (బీపీ&ఎల్)కి పంపాలని కోరారు.
