దేశ వైద్య రంగాన్ని మరింత బలోపేతం చేయడంతో పాటు నర్సింగ్ వృత్తిని అంతర్జాతీయ ప్రమాణాలకు తీసుకెళ్లే లక్ష్యంతో భారత నర్సింగ్ కౌన్సిల్ కీలక నిర్ణయం తీసుకుంది. నర్సుల వృత్తిపరమైన నైపుణ్యాలను మెరుగుపరచేందుకు దేశవ్యాప్తంగా ప్రత్యేక పోస్ట్ గ్రాడ్యుయేట్ (PG) రెసిడెన్సీ కోర్సులను ప్రవేశపెట్టేందుకు ఆమోదం తెలిపింది. ఈ నేపథ్యంలో ఆంధ్రప్రదేశ్ ప్రభుత్వం కూడా రాష్ట్రంలోని ప్రభుత్వ, ప్రైవేట్ నర్సింగ్ కళాశాలల్లో రెండేళ్ల వ్యవధి గల 10 ప్రత్యేక పీజీ రెసిడెన్సీ కోర్సులను ప్రారంభించేందుకు సిద్ధమైంది.
అంతర్జాతీయ ప్రమాణాల దిశగా అడుగు
అమెరికా, బ్రిటన్, ఆస్ట్రేలియా, నెదర్లాండ్స్ వంటి అభివృద్ధి చెందిన దేశాల్లో ఃనర్సింగ్ ప్రాక్టీషనర్ః విధానం ఇప్పటికే విజయవంతంగా అమలవుతోంది. అక్కడ నర్సులు కేవలం వైద్యులకు సహాయకులుగా మాత్రమే కాకుండా, రోగుల చికిత్స, సంరక్షణలో కీలక బాధ్యతలు నిర్వహిస్తున్నారు. అదే విధానాన్ని భారతదేశంలోనూ అమలు చేయడం ద్వారా క్రిటికల్ కేర్, అత్యవసర వైద్య సేవల నాణ్యతను మరింత పెంచవచ్చని భారత నర్సింగ్ కౌన్సిల్ భావిస్తోంది. ముఖ్యంగా సూపర్ స్పెషాలిటీ ఆసుపత్రుల్లో నిపుణుల కొరతను తగ్గించడంతో పాటు రోగులకు వేగవంతమైన, నాణ్యమైన వైద్య సేవలు అందించడంలో ఈ కోర్సులు కీలకంగా మారనున్నాయి.
అందుబాటులోకి రానున్న 10 ప్రత్యేక కోర్సులివే
రాష్ట్రంలోని బోధనాసుపత్రులకు అనుబంధంగా ఉన్న నర్సింగ్ కళాశాలల్లో అందుబాటులో ఉన్న వసతులు, అవసరాలను బట్టి ఈ కోర్సులను ప్రవేశపెట్టనున్నారు.
- నర్స్ ప్రాక్టీషనర్ ఇన్ క్రిటికల్ కేర్
ఐసీయూ, అత్యవసర వైద్య సేవల్లో నైపుణ్యం పెంపు కోసం. - నెఫ్రాలజీ నర్సింగ్
కిడ్నీ సంబంధిత వ్యాధులతో బాధపడే రోగుల సంరక్షణ కోసం. - అనస్థీషియా నర్సింగ్
శస్త్రచికిత్సల సమయంలో అనస్థీషియా విభాగంలో ప్రత్యేక సేవల కోసం - పీడియాట్రిక్ కేర్ నర్సింగ్
పిల్లలకు ప్రత్యేక వైద్య సేవలు అందించేందుకు. - ఫ్యామిలీ హెల్త్ నర్సింగ్
కుటుంబ సభ్యుల సమగ్ర ఆరోగ్య సంరక్షణ కోసం. - ప్రాక్టీషనర్ ఇన్ జెరియాట్రిక్ నర్సింగ్
వృద్ధుల ఆరోగ్య సమస్యల నిర్వహణకు.
ట్రామా అండ్ ఎమర్జెన్సీ నర్సింగ్
ప్రమాదాలు, అత్యవసర పరిస్థితుల్లో తక్షణ వైద్య సేవల కోసం.
- ఆర్గాన్ ట్రాన్స్ప్లాంట్ నర్సింగ్
అవయవ మార్పిడి చికిత్సలకు సంబంధించిన ప్రత్యేక సంరక్షణ కోసం. - మెంటల్ హెల్త్ / సైకియాట్రిక్ నర్సింగ్
మానసిక ఆరోగ్య సమస్యలతో బాధపడుతున్న వారికి కౌన్సిలింగ్, వైద్య సహకారం అందించేందుకు. - ప్రాక్టీషనర్ ఇన్ నియోనేటల్ నర్సింగ్
నవజాత శిశువుల ప్రత్యేక సంరక్షణ కోసం.
ఈ నెల 23న ప్రిన్సిపాళ్లతో ప్రత్యేక వర్క్షాప్
ఈ కొత్త కోర్సుల అమలు, నిర్వహణపై స్పష్టతనిచ్చేందుకు ఏపీ నర్సెస్ అండ్ మిడ్వైవ్స్ కౌన్సిల్ చర్యలు చేపట్టింది.
ఇందులో భాగంగా ఈ నెల 23న రాష్ట్రంలోని అన్ని నర్సింగ్ కళాశాలల ప్రిన్సిపాళ్లతో ఉన్నత స్థాయి వర్క్షాప్ నిర్వహించనుంది.
ఈ సమావేశంలో కోర్సుల అమలు విధానం, అవసరమైన మౌలిక సదుపాయాలు, శిక్షణా ప్రమాణాలు తదితర అంశాలపై చర్చించనున్నారు.
ఉపాధి అవకాశాలు మరింత పెరగనున్నాయి
ఆరోగ్య రంగ నిపుణుల అభిప్రాయం ప్రకారం, ఈ ప్రత్యేక పీజీ రెసిడెన్సీ కోర్సులు పూర్తి చేసిన అభ్యర్థులకు దేశీయంగానే కాకుండా విదేశాల్లో కూడా విస్తృత ఉపాధి అవకాశాలు లభించే అవకాశం ఉంది.
అలాగే కార్పొరేట్ ఆసుపత్రులు, సూపర్ స్పెషాలిటీ హాస్పిటల్స్లో ఈ తరహా నైపుణ్యాలు కలిగిన నర్సులకు డిమాండ్ గణనీయంగా పెరగనుంది. ప్రస్తుతం వైద్యారోగ్య శాఖ కోర్సుల నిర్వహణ, మౌలిక వసతుల ఏర్పాటు, సీట్ల కేటాయింపు వంటి అంశాలపై కసరత్తు చేస్తోంది. త్వరలోనే అడ్మిషన్లు, సీట్ల వివరాలకు సంబంధించిన పూర్తి మార్గదర్శకాలను విడుదల చేసే అవకాశం ఉంది.
