దేశవ్యాప్తంగా డిజిటల్ సేవలను వినియోగించుకోవడంలో ప్రజలు చూపిస్తున్న ఆసక్తికి mAadhaar యాప్ ఆదరణ నిదర్శనంగా నిలుస్తోంది. ఈ యాప్ డౌన్‌లోడ్ల సంఖ్య 5 కోట్ల మైలురాయిని దాటినట్లు కేంద్ర ఐటీ మంత్రిత్వ శాఖ నేడు ఒక ప్రకటనలో వెల్లడించింది. ఆధార్ సేవలను సులభంగా, వేగంగా పొందేందుకు ప్రజలు డిజిటల్ మాధ్యమాల వైపు మొగ్గు చూపుతున్నారని ఈ పరిణామం స్పష్టం చేస్తోంది.ఈ యాప్ ద్వారా ఆధార్ నంబర్ హోల్డర్లు తమ స్మార్ట్‌ఫోన్ నుంచే అనేక సేవలను పొందుతున్నారు. ఇందులో మొబైల్ నంబర్ అప్‌డేట్, చిరునామా మార్పు, ఈ-మెయిల్ ఐడీ జతచేయడం, బయోమెట్రిక్ లాక్/అన్‌లాక్, ఈ-ఆధార్ డౌన్‌లోడ్ వంటివి ఉన్నాయి. ఇప్పటివరకు ఈ యాప్ ద్వారా 60 లక్షల మందికి పైగా తమ మొబైల్ నంబర్‌ను, 15 లక్షల మందికి పైగా చిరునామాలను, 23 లక్షల మందికి పైగా ఈ-మెయిల్ ఐడీలను అప్‌డేట్ చేసుకున్నారు. దీనివల్ల ఆధార్ కేంద్రాలకు వెళ్లే అవసరం లేకుండానే పనులు పూర్తి చేసుకుంటున్నారు.
మరోవైపు, ఆధార్ వినియోగంలో గోప్యత, భద్రతను మరింత పెంచేందుకు యూఐడీఏఐ ఆఫ్‌లైన్ వెరిఫికేషన్ విధానాన్ని విస్తృతం చేస్తోంది. ఇందులో భాగంగా ఇప్పటివరకు 200కు పైగా సంస్థలను ఆఫ్‌లైన్ వెరిఫికేషన్ సీకింగ్ ఎంటైటీస్ (OVSEs)గా ఆన్‌బోర్డ్ చేసింది. ఈ సంస్థలు క్యూఆర్ కోడ్, డిజిటల్ సంతకంతో కూడిన డాక్యుమెంట్ల ద్వారా ఆధార్ వెరిఫికేషన్‌ను పూర్తి చేయగలవు. దీనివల్ల యూఐడీఏఐ సెంట్రల్ డేటాబేస్‌తో రియల్ టైమ్ కనెక్టివిటీ అవసరం ఉండదు.ఈ ఆఫ్‌లైన్ విధానంలో వినియోగదారులు తమకు అవసరమైనంత సమాచారాన్ని మాత్రమే పంచుకునే వీలుంటుంది. తద్వారా వ్యక్తిగత గోప్యతకు మరింత భద్రత లభిస్తుంది. ఈ నూతన విధానాలు ప్రభుత్వ ‘డిజిటల్ ఇండియా’ లక్ష్యానికి, ప్రజల జీవన ప్రమాణాలను సులభతరం చేసేందుకు దోహదపడతాయని ఐటీ శాఖ తన ప్రకటనలో పేర్కొంది.
