వందేమాతరం గీతాలాపనపై సుప్రీంకోర్టు కీలక వ్యాఖ్యలు చేసింది. గీతంలోని ఎన్ని చరణాలు పాడాలన్నది పౌరుల వ్యక్తిగత నిర్ణయానికి సంబంధించిన అంశమని కోర్టు పేర్కొంది. ఒక చరణం పాడాలా, నాలుగు చరణాలు పాడాలా, మొత్తం చరణాలన్నీ ఆలపించాలా అనేది వ్యక్తిగత స్వేచ్ఛకు సంబంధించిన విషయమని స్పష్టం చేసింది. వందేమాతరంలోని మొత్తం ఆరు చరణాలను ఆలపించడం తప్పనిసరి చేస్తూ కేంద్రం తీసుకున్న నిర్ణయాన్ని సవాల్ చేస్తూ ప్రముఖ కర్ణాటక సంగీత విద్వాంసుడు టి.ఎం. కృష్ణ సుప్రీంకోర్టును ఆశ్రయించారు. ఈ పిటిషన్పై మంగళవారం ప్రధాన న్యాయమూర్తి నేతృత్వంలోని ధర్మాసనం విచారణ చేపట్టింది.
కేంద్రం ప్రతిపాదించిన శిక్షాత్మక చర్యలపై కూడా విచారణ
అన్ని చరణాలను ఆలపించని పౌరులపై శిక్షాత్మక చర్యలు తీసుకునే అంశంపై సుప్రీంకోర్టు కీలకంగా స్పందించింది. కేవలం అన్ని చరణాలు పాడలేదనే కారణంతో చర్యలు తీసుకోవచ్చా? అనే అంశాన్ని పరిశీలించాల్సి ఉందని పేర్కొంది. కేంద్రం ప్రతిపాదించిన శిక్షాత్మక చర్యలపై కూడా విచారణ జరుపుతామని తెలిపింది. ఈ వ్యవహారానికి సంబంధించి వందేమాతరం సవరణ చట్టం, కేంద్రం జారీ చేసిన మార్గదర్శకాలపై సుప్రీంకోర్టు కేంద్ర ప్రభుత్వానికి నోటీసులు జారీ చేసింది.ఈ నోటీసులకు రెండు వారాల్లోగా సమాధానం ఇవ్వాలని ఆదేశించింది. అదే సమయంలో పౌరుల మత విశ్వాసాలకు రాజ్యాంగపరమైన రక్షణ ఉందని ధర్మాసనం స్పష్టం చేసింది.
పొలిటికల్ వివాదంగా మారిన వందేమాతరం అంశం
గత కొన్ని దశాబ్దాలుగా వందేమాతరం గీతంలోని మొదటి రెండు చరణాలనే ప్రధానంగా ఆలపించే ఆనవాయితీ కొనసాగుతోందని పిటిషన్లో పేర్కొన్నారు.అయితే ఇటీవల కేంద్ర ప్రభుత్వం మొత్తం ఆరు చరణాలను ఆలపించేలా సర్క్యులర్ జారీ చేసిందన్న అంశం వివాదానికి దారితీసింది.దీనికి తోడు వందేమాతరానికి ఃజనగణమనఃతో సమానమైన చట్టపరమైన హోదా కల్పించేలా చర్యలు తీసుకున్నట్లు పిటిషన్లో ప్రస్తావించారు.గీతాలాపనకు అంతరాయం కలిగించిన సందర్భాల్లో శిక్ష విధించేలా చట్టపరమైన మార్పులు తీసుకొచ్చినట్లు కూడా అందులో పేర్కొన్నారు.ఈ నిర్ణయాలను సవాల్ చేస్తూ టి.ఎం. కృష్ణ సుప్రీంకోర్టును ఆశ్రయించారు.
జాతీయ గీతం’జనగణమన’తో సమాన గౌరవం
వందేమాతరంలోని చివరి నాలుగు చరణాల్లో నిర్దిష్ట మతపరమైన అంశాలు ఉన్నాయని ఆయన తన పిటిషన్లో పేర్కొన్నారు.అలాంటి చరణాలను పౌరులు తప్పనిసరిగా ఆలపించేలా చేయడం రాజ్యాంగం కల్పించిన లౌకిక విలువలు,మత స్వేచ్ఛ,వ్యక్తిగత స్వేచ్ఛకు విరుద్ధమని ఆయన వాదించారు.వందేమాతరం గీతం దేశ స్వాతంత్ర్యోద్యమ చరిత్రలో కీలక పాత్ర పోషించిన జాతీయ గీతంగా గుర్తింపు పొందింది.1950లో రాజ్యాంగ సభ నిర్ణయం ప్రకారం దీనికి జాతీయ గీతంఃజనగణమనఃతో సమాన గౌరవం కల్పించారు.ప్రస్తుతం వందేమాతరం గీతంలోని ఎన్ని చరణాలు ఆలపించాలి,వాటిని పౌరులపై తప్పనిసరిగా అమలు చేయవచ్చా అనే అంశం న్యాయపరమైన చర్చగా మారింది.ఈ నేపథ్యంలో సుప్రీంకోర్టు కేంద్రానికి నోటీసులు జారీ చేయడం,పౌరుల మత విశ్వాసాలకు రాజ్యాంగ రక్షణ ఉంటుందని పేర్కొనడం ప్రాధాన్యం సంతరించుకుంది.
