ఆంధ్రప్రదేశ్ ప్రభుత్వం పింఛనుదారులకు అదనపు పింఛన్ శాతాన్ని పెంచుతూ కీలక నిర్ణయం తీసుకుంది. ఈ మేరకు అదనపు పింఛన్ రేట్లను పునరుద్ధరిస్తూ ఆర్థిక శాఖ జీవో ఎంఎస్ నంబర్-126ను విడుదల చేసింది. 70, 75 ఏళ్లు పూర్తయిన పింఛనుదారులు, ఫ్యామిలీ పింఛనుదారులకు అదనపు పింఛన్లో పెంపు కల్పిస్తూ ఉత్తర్వులు జారీ చేసింది.
70 ఏళ్లు పూర్తయిన వారికి 10 శాతం
ఇప్పటివరకు 70 ఏళ్లు పూర్తయిన పింఛనుదారులు, ఫ్యామిలీ పింఛనుదారులకు 7 శాతం అదనపు పింఛన్ అందుతోంది. తాజాగా ప్రభుత్వం ఈ రేటును 10 శాతానికి పెంచింది. దీంతో 70 ఏళ్లు పూర్తయిన అర్హులైన పింఛనుదారులకు ఇకపై పెరిగిన రేటు ప్రకారం అదనపు పింఛన్ అందనుంది.
75 ఏళ్ల వారికి 15 శాతం
అదేవిధంగా 75 ఏళ్లు పూర్తయిన పింఛనుదారులు, ఫ్యామిలీ పింఛనుదారులకు అదనపు పింఛన్ను 12 శాతం నుంచి 15 శాతానికి పెంచుతూ ప్రభుత్వం నిర్ణయం తీసుకుంది.ఈ మార్పు వల్ల ఈ వయస్సు కేటగిరీలో ఉన్న అర్హులైన పింఛనుదారులకు అదనపు ప్రయోజనం కలగనుంది.
డిసెంబర్ పింఛన్కు పెంపు వర్తింపు
పెంచిన అదనపు పింఛన్ రేట్లు డిసెంబర్ 2026 నెల పింఛనుకు వర్తిస్తాయని ప్రభుత్వం స్పష్టం చేసింది.పెరిగిన మొత్తాన్ని 2027 జనవరి 1న చెల్లించనున్నట్లు ఉత్తర్వుల్లో పేర్కొంది.దీంతో డిసెంబర్ నెలకు సంబంధించిన పింఛన్లోనే కొత్త రేట్ల ప్రకారం అదనపు పింఛన్ ప్రయోజనం అందనుంది.
80 ఏళ్లకు పైబడిన వారికి మార్పు లేదు
అయితే 80 సంవత్సరాలు, అంతకంటే ఎక్కువ వయస్సు ఉన్న పింఛనుదారుల అదనపు పింఛన్ రేట్లలో ఎలాంటి మార్పు లేదని ప్రభుత్వం స్పష్టం చేసింది.ఈ వయస్సు కేటగిరీకి ప్రస్తుతం అమల్లో ఉన్న అదనపు పింఛన్ రేట్లే కొనసాగనున్నాయి.
సంఘాల విజ్ఞప్తితో పాత రేట్ల పునరుద్ధరణ
ఆంధ్రప్రదేశ్ పింఛనర్ల సంఘాలు చేసిన విజ్ఞప్తిని ప్రభుత్వం పరిశీలించిన అనంతరం ఈ నిర్ణయం తీసుకున్నట్లు ఉత్తర్వుల్లో పేర్కొంది.సంఘాల అభ్యర్థన మేరకు గతంలో అమల్లో ఉన్న అదనపు పింఛన్ రేట్లను ప్రభుత్వం పునరుద్ధరించింది.దీనికి అనుగుణంగా ఆర్థిక శాఖ జీవో ఎంఎస్ నంబర్-126ను జారీ చేసింది.
