జిల్లా కలెక్టర్ డాక్టర్ వినోద్ కుమార్.వి
విశాలాంధ్ర అనంతపురం : ఎన్నికల అనంతరం జరిగిన హింసకు సంబంధించిన కేసులపై 10 రోజుల్లోపు చార్జిషీట్ వేయాలని జిల్లా కలెక్టర్ డాక్టర్ వినోద్ కుమార్.వి, ఐ.ఏ.ఎస్ ఆదేశించారు. శుక్రవారం అనంతపురం కలెక్టరేట్ లోని జిల్లా కలెక్టర్ ఛాంబర్ లో సాధారణ ఎన్నికలు- 2024 అనంతరం జరిగిన హింసపై సంబంధిత అధికారులతో జిల్లా ఎస్పీ పి.జగదీష్ తో కలిసి జిల్లా కలెక్టర్ సమీక్ష నిర్వహించారు. ఈ సందర్భంగా జిల్లా కలెక్టర్ మాట్లాడుతూ ఎన్నికల అనంతరం జరిగిన హింస చాలా సున్నితమైన అంశమన్నారు. ఎన్నికల అనంతరం జరిగిన హింసకు సంబంధించి కఠిన చర్యలు తీసుకోవడం జరుగుతుందన్నారు. ఎన్నికల అనంతరం జరిగిన హింసకు సంబంధించి తాడిపత్రిలో 7 కేసులు నమోదు కాగా, అందులో 5 కేసులుకు సంబంధించి చార్జిషీట్ ఫైల్ చేయడం జరిగిందని, 1 కేసు ఫాల్స్ కేసు అని, మరొకటి అండర్ ఇన్వెస్టిగేషన్ జరుగుతోందన్నారు. ఎలక్షన్ కమీషన్ పోర్టల్ ఓపెన్ కావడం జరిగిందని, చార్జిషీట్ దాఖలులో పోలీస్ వారికి అవసరమైన సంపూర్ణ సహకారం అందించాలని ఆర్డీఓ, తహసిల్దార్లను ఆదేశించారు.
ఈ సందర్భంగా జిల్లా ఎస్పీ పి.జగదీష్ మాట్లాడుతూ ఎన్నికల అనంతరం జరిగిన హింసకు సంబంధించి కఠిన చర్యలు తీసుకుంటామన్నారు. ఇందుకు సంబంధించి నమోదైన కేసులకు సంబంధించి త్వరితగతిన చార్జిషీట్ ఫైల్ చేయాలని పోలీసులను ఆదేశించారు.
ఈ సమావేశంలో డిఆర్ఓ ఏ.మాలోల, ఆర్డీఓ కేశవనాయుడు, కలెక్టరేట్ కోఆర్డినేషన్ సెక్షన్ సూపరింటెండెంట్ యుగేశ్వరి దేవి, ఎన్నికల విభాగం డిప్యూటీ తహసిల్దార్ కనకరాజ్, పోలీస్ శాఖ డిసిఆర్బి హరినాథ్, తాడిపత్రి టౌన్ సిఐ సాయికృష్ణ, తాడిపత్రి తహసీల్దార్ రజాక్ వలి, తదితరులు పాల్గొన్నారు.
ఎన్నికల అనంతరం జరిగిన హింసకు సంబంధించిన కేసులపై 10 రోజుల్లోపు చార్జిషీట్ వేయాలి
