టీ20ల్లో చరిత్ర సృష్టించిన అభిషేక్.. సూర్యకుమార్ వరల్డ్ రికార్డు బ్రేక్!

భారత యువ ఓపెనర్ అభిషేక్ శర్మ టీ20 క్రికెట్‌లో సంచలనాలు సృష్టిస్తూ తన రికార్డుల వేటను కొనసాగిస్తున్నాడు. తన అద్భుతమైన ఫామ్‌తో దూసుకుపోతున్న ఈ యువ కెరటం, తాజాగా మరో ప్రపంచ రికార్డును తన ఖాతాలో వేసుకున్నాడు. వెస్టిండీస్‌తో నిన్న‌ జరిగిన నాలుగో టీ20 మ్యాచ్‌లో అభిషేక్ ఈ అరుదైన ఘనతను సాధించాడు. ఈ మ్యాచ్‌లో సిక్సర్ కొట్టడం ద్వారా ఒకే క్యాలెండర్ ఇయర్‌లో అత్యధిక టీ20 అంతర్జాతీయ సిక్సర్లు బాదిన ఆటగాడిగా చరిత్ర సృష్టించాడు. 2026 సంవత్సరంలో అభిషేక్ శర్మ ఇప్పటివరకు 69 సిక్సర్లు బాదాడు. తద్వారా 2022లో 68 సిక్సర్లతో సూర్యకుమార్ యాదవ్ నెలకొల్పిన రికార్డును అధిగమించాడు. ఈ జాబితాలో అభిషేక్ శర్మ (2025లో 54 సిక్సర్లు), ఇషాన్ కిషన్ (2026లో 52 సిక్సర్లు) తర్వాతి స్థానాల్లో ఉన్నారు. ఈ ఏడాది టీమిండియా మరో ఆరు టీ20 మ్యాచ్‌లు ఆడాల్సి ఉన్నందున, అభిషేక్ వంద సిక్సర్ల మైలురాయిని చేరుకునే అవకాశం ఉంది. ఇటీవలే జరిగిన గత మ్యాచ్‌లో అభిషేక్ మరో అరుదైన ఘనతను కూడా అందుకున్నాడు. టీ20 అంతర్జాతీయ క్రికెట్‌లో 2,000 పరుగులు పూర్తి చేసిన ఆరో భారత ఆటగాడిగా నిలిచాడు. ఈ క్లబ్‌లో రోహిత్ శర్మ, విరాట్ కోహ్లీ, సూర్యకుమార్ యాదవ్, హార్దిక్ పాండ్యా, కేఎల్ రాహుల్ వంటి దిగ్గజాలు ఉన్నారు. 2026 సంవత్సరం అభిషేక్‌కు అద్భుతంగా కలిసివస్తోంది. ఈ ఏడాది ఇప్పటివరకు 33 మ్యాచ్‌లు ఆడి 29కి పైగా సగటుతో, 206 పైగా స్ట్రైక్ రేట్‌తో 950 పరుగులు చేశాడు. ఇందులో ఒక సెంచరీ, ఎనిమిది హాఫ్ సెంచరీలు ఉన్నాయి. టెస్ట్ ఆడే దేశాల తరఫున అత్యంత వేగవంతమైన టీ20 సెంచరీ కూడా అభిషేక్ పేరు మీదే ఉండటం విశేషం. అయితే, ఈ ప్రపంచ రికార్డు సృష్టించిన హైదరాబాద్ టీ20లో అభిషేక్ వ్యక్తిగతంగా పెద్దగా రాణించలేకపోయాడు. 24 బంతుల్లో 29 పరుగులు మాత్రమే చేసి ఔటయ్యాడు. ఈ మ్యాచ్‌లో భారత్ 24 పరుగుల తేడాతో ఓటమిపాలైంది.