డ్రైవర్లు రోడ్డు భద్రత నియమాలు తప్పక పాటించాలి

విశాలాంధ్ర-తాడిపత్రి ( అనంతపురం జిల్లా) : రోడ్డుపై వెళ్లే ప్రతి వాహనదారుడు, డ్రైవర్లు రోడ్డు భద్రత నియమాలు తప్పక పాటించాలని అనంతపురం జిల్లా ట్రాన్స్పోర్ట్ కమిషనర్ వీర్రాజు డ్రైవర్లకు సూచించారు. గురువారం మండలంలోని భోగసముద్రం గ్రామంలో ఉన్న అల్ట్రాటెక్ సిమెంట్ కర్మాగారంలో అల్ట్రాటెక్ సిమెంట్ ఫ్యాక్టరీ యాజమాన్యం ఆధ్వర్యంలో రోడ్డు భద్రత వారోత్సవాలు, డ్రైవర్లకు మెడికల్ క్యాంపు నిర్వహించారు. ఈ కార్యక్రమానికి ముఖ్యఅతిథిగా అనంతపురం జిల్లా ట్రాన్స్పోర్ట్ కమిషనర్ వీర్రాజు పాల్గొన్నారు. మొదటగా డ్రైవర్లకు ఏర్పాటు చేసిన మెడికల్ క్యాంపును రిబ్బన్ కట్ చేసి ప్రారంభించారు. ఈ సందర్భంగా ఆయన మాట్లాడుతూ డ్రైవర్లు రోడ్డుపై వెళ్లే సమయంలో తమ కుటుంబీకులను, ఎదురుగా వచ్చే వాహనా డ్రైవర్ల కుటుంబీకులను గుర్తుంచుకొని వాహనాలను నడపాలన్నారు. మద్యం సేవించి, అతివేగంగా వాహనాలు నడపరాదని తదితర రోడ్డు భద్రతపై, హిట్ అండ్ రన్ కేసుల్లో కాంపెన్సేషన్ స్కీమ్ గురించి డ్రైవర్లకు అవగాహన కల్పించారు. అనంతరం తాడిపత్రి మోటర్ వెహికల్ ఇన్స్పెక్టర్లు శ్రీనివాసులు, రాజగోపాల్ లు డ్రైవర్ల, ట్రాన్స్పోర్టర్లతో రహదారి భద్రత ప్రతిజ్ఞ చేయించారు. ఈ కార్యక్రమంలో అల్ట్రాటెక్ సిమెంట్ సంస్థ ప్రతినిధులు అడ్మిన్ హెడ్ అంజన్ ప్రకాష్, లాజిస్టిక్ హెడ్ చంద్రకాంత్ కంపెనీ డాక్టర్లు పాల్గన్నారు.