ప్రతి వాహనదారుడు రోడ్డు నిబంధనలు పాటించండి

హెల్మెట్, సీటు బెల్టుతోనే వాహనాలను నడపాలి

విశాలాంధ్ర, కదిరి; (శ్రీ సత్య సాయి జిల్లా)ప్రతి వాహనదారుడు తప్పనిసరిగా
రోడ్డు నిబంధనలు పాటిస్తూ ప్రయాణం సాగించాలని మోటార్ వెహికల్ ఇన్స్పెక్టర్ వర ప్రసాద్ తెలిపారు.
రహదారి భద్రత మాసోత్సవాల సందర్బంగా శుక్రవారం పట్టణంలో వాహనాల యజమానులు డ్రైవర్లు, ప్రజలతో కలిసి వాక తాన్ నిర్వహించారు. ద్విచక్ర వాహనదారులకు గులాబీ పువ్వులు, కర పత్రాలు అందిస్తూ ర్యాలీ నిర్వహించారు.వాహనదారులు హెల్మెట్ లేదా సీటు బెల్టుతో వాహనాలను నడపాలని, ట్రాఫిక్ నియమ నిబంధనలు పాటించాలని కోరారు.డ్రైవింగ్ పై డ్రైవర్ల అజాగ్రత్త వలన దేశంలో 87శాతం ప్రమాదాలు జరుగుతున్నాయని పలు సర్వేలు తెలుపుతున్నాయని తెలిపారు. డ్రైవింగ్ చేసేటప్పుడు మద్యం సేవించి నడపరాదని, సెల్ ఫోన్ లో మాట్లాడుతూ డ్రైవింగ్ చేయరాదని తెలిపారు.అలా చేసినచో ప్రమాదాలు జరిగే అవకాశాలు మెండుగా ఉన్నాయని తెలిపారు. అదేవిధంగా తల్లిదండ్రులు తమ పిల్లలను (మైనారిటీ) కు ద్విచక్ర వాహనాలు ఇచ్చి వాహనాలు నడిపించినచో వారితో పాటు తల్లిదండ్రులకు జరిమానా విధించడమే కాకుండా కేసులు నమోదు చేస్తామని తెలిపారు. కావున ప్రతి వాహనదారుడు నియమ నిబంధనలు పాటించి ప్రమాద రహిత ప్రయాణం చేయాలని వారు తెలిపారు. ఈ
కార్యక్రమంలో అసిస్టెంట్ వెహికల్ ఇన్స్పెక్టర్ రాజేష్, పట్టణ సీఐ నారాయణ రెడ్డి, రూరల్ అప్ గ్రేడ్ సీఐ నిరంజన్ రెడ్డి సిబ్బంది పాల్గొన్నారు.