‘ఆయనో మాన్‌స్టర్.. కానీ ఎవరికీ తెలియదు’.. పిచాయ్‌పై ట్రంప్ వ్యాఖ్యలు

అమెరికా అధ్యక్షుడు డొనాల్డ్ ట్రంప్ మరోసారి తనదైన వ్యాఖ్యలతో వార్తల్లో నిలిచారు. గూగుల్ మాతృసంస్థ ఆల్ఫాబెట్ సీఈఓ సుందర్ పిచాయ్‌ను ఉద్దేశించి ఆయన ‘మాన్‌స్టర్’ అంటూ చేసిన వ్యాఖ్యలు ఇప్పుడు చర్చనీయాంశంగా మారాయి. అయితే ట్రంప్ ఈ పదాన్ని విమర్శగా ఉపయోగించలేదు. పిచాయ్‌కు ఉన్న అపారమైన ప్రభావాన్ని, శక్తిని ప్రశంసించే ఉద్దేశంతోనే ఈ వ్యాఖ్య చేసినట్లు ఆయన మాటలను బట్టి తెలుస్తోంది. వైట్‌హౌస్ వెలుపల ఆర్టిఫిషియల్ ఇంటెలిజెన్స్ (ఏఐ)పై ప్రముఖ టెక్ కంపెనీల సీఈఓలు, ప్రతినిధులతో ట్రంప్ సమావేశమయ్యారు. భేటీ ముగిసిన అనంతరం ఆయన మీడియాతో మాట్లాడారు. ఈ సందర్భంగా సుందర్ పిచాయ్‌ను కూడా మాట్లాడాలని ట్రంప్ కోరారు. పిచాయ్ సమాధానం చెప్పడం ప్రారంభించగానే ట్రంప్ మధ్యలో జోక్యం చేసుకున్నారు.

పిచాయ్‌ది మాన్‌స్టర్ ట్యాగ్‌లైన్ కాదు!
“మీకు వీళ్లెవరో తెలియదు. వీళ్లు ప్రపంచంలోనే అతిపెద్ద వ్యక్తులు.ఈయన ఒక మాన్‌స్టర్. కానీ,ఈ విషయం ఎవరికీ తెలియదు” అని ట్రంప్ అన్నారు. అనంతరం పిచాయ్‌ను ఉద్దేశించి మరిన్ని వ్యాఖ్యలు చేశారు.ఎంత గొప్ప జీవితం! ఒక మాన్‌స్టర్‌గా ఉండి కూడా ఇలాంటి ఇబ్బందులు పడాల్సిన అవసరం లేదు. మీరందరూ తెలుసుకోవాల్సింది ఒక్కటే… సుందర్!అతని పేరు సుందర్ అంటూ ట్రంప్ వ్యాఖ్యానించారు.

“నేనొక మాన్‌స్టర్‌ని అనే ట్యాగ్‌లైన్ కంటే మెరుగైనది ఏదైనా దొరుకుతుందని ఆశిస్తున్నాను”అంటూ నవ్వుతూ సమాధానం ఇచ్చారు.ట్రంప్ వ్యాఖ్యలు,పిచాయ్ చమత్కార స్పందనతో కూడిన ఈ సంభాషణ సోషల్ మీడియాలోనూ వైరల్‌గా మారింది.

టెక్ రంగంలో ‘మాన్‌స్టర్’ అంటే..
సాధారణంగా టెక్నాలజీ, కార్పొరేట్ రంగాల్లో ‘మాన్‌స్టర్’ అనే పదాన్ని అత్యంత శక్తివంతమైన సంస్థలు లేదా వ్యక్తుల ప్రభావాన్ని వివరించేందుకు ఉపయోగిస్తుంటారు. ముఖ్యంగా గూగుల్ మాతృసంస్థ ఆల్ఫాబెట్ వంటి భారీ టెక్ కంపెనీలకు మార్కెట్‌పై ఉన్న ప్రభావం, వాటి విస్తృత స్థాయి కార్యకలాపాలను వివరించేటప్పుడు ఇలాంటి పదాలను వాడటం కనిపిస్తుంది. అందువల్ల ట్రంప్ కూడా సుందర్ పిచాయ్‌కు ఉన్న ప్రభావం, శక్తిని ప్రస్తావించే క్రమంలోనే ‘మాన్‌స్టర్’ అనే పదాన్ని ఉపయోగించినట్లు విశ్లేషకులు భావిస్తున్నారు. అంటే ఈ వ్యాఖ్యను ప్రతికూల విమర్శగా కాకుండా, అసాధారణమైన రీతిలో చేసిన ప్రశంసగా చూడవచ్చని వారు పేర్కొంటున్నారు.

ఏఐ దిగ్గజాల ప్రతినిధులు హాజరు
ట్రంప్ నిర్వహించిన ఈ ఉన్నత స్థాయి సమావేశానికి పలు ప్రముఖ టెక్ సంస్థల ప్రతినిధులు హాజరయ్యారు.ఆంత్రోపిక్, ఓపెన్‌ఏఐ, మెటా, మైక్రోసాఫ్ట్, ఎన్విడియా, అమెజాన్ తదితర టెక్ దిగ్గజాలకు చెందిన ప్రతినిధులు ఈ భేటీలో పాల్గొన్నారు.మొత్తంగా చూస్తే.. ఆర్టిఫిషియల్ ఇంటెలిజెన్స్‌పై జరిగిన ఈ ఉన్నత స్థాయి సమావేశం అనంతరం ట్రంప్ చేసిన ‘మాన్‌స్టర్’ వ్యాఖ్య ప్రత్యేకంగా నిలిచింది.సుందర్ పిచాయ్‌పై ట్రంప్ చేసిన అసాధారణ ప్రశంస, దానికి పిచాయ్ ఇచ్చిన చమత్కార సమాధానం ఈ సంభాషణను మరింత ఆసక్తికరంగా మార్చింది.అదే సమయంలో ప్రపంచంలోని అతిపెద్ద టెక్ సంస్థల్లో ఒకదానికి నాయకత్వం వహిస్తున్న పిచాయ్‌కు ఉన్న ప్రభావాన్ని కూడా ఈ వ్యాఖ్యలు మరోసారి చర్చలోకి తెచ్చాయి.