తెలంగాణలో ఆటో ఛార్జీలను పెంచాలని అధికారుల కమిటీ రాష్ట్ర ప్రభుత్వానికి సిఫార్సు చేసింది. ప్రతిపాదిత కొత్త ఛార్జీల ప్రకారం 1.6 కిలోమీటర్ల వరకు కనీస ఛార్జీని రూ.30గా నిర్ణయించాలని సూచించింది.ఆ తర్వాత ప్రతి కిలోమీటరుకు రూ.14 చొప్పున వసూలు చేయాలని ప్రతిపాదించింది.ఆటోలో ప్రయాణికులు వేచి ఉండే సమయానికి నిమిషానికి 75 పైసలు, రాత్రి వేళల్లో సాధారణ ఛార్జీపై 50 శాతం అదనంగా వసూలు చేయాలని కమిటీ సూచించింది.ఈ మేరకు రవాణాశాఖ కమిషనర్ డాక్టర్ కె. ఇలంబర్తి ప్రభుత్వానికి తాజాగా నివేదిక సమర్పించారు.కమిటీ చేసిన సిఫార్సులకు ప్రభుత్వం ఆమోదం తెలిపిన వెంటనే ఆటో ఛార్జీల పెంపుపై అధికారిక ఉత్తర్వులు వెలువడనున్నాయి.
సమ్మె నేపథ్యంలో ఛార్జీలపై అధ్యయనం
తెలంగాణ రాష్ట్ర ఆటో, యాప్ బేస్డ్ యూనియన్ల ఐకాస 14 డిమాండ్లతో ఆగస్టు 7న నిరవధిక సమ్మెకు పిలుపునిచ్చింది. ఈ నేపథ్యంలో ఆగస్టు 23న యూనియన్ ప్రతినిధులతో అధికారులు సమావేశమయ్యారు. 15 రోజుల్లోగా తమ ప్రతిపాదనలు పంపిస్తామని అధికారులు హామీ ఇవ్వడంతో యూనియన్లు సమ్మె నిర్ణయాన్ని ఉపసంహరించుకున్నాయి. ఆ తర్వాత ఆటో ఛార్జీలపై సమగ్రంగా అధ్యయనం చేసేందుకు డీటీసీ సురేష్రెడ్డి, ఎంవీఐ శ్రీనివాస్, ఏఎంవీఐలు కేరళ, దిల్లీ, కర్ణాటకలోని బెంగళూరు, మహారాష్ట్రలోని ముంబయి నగరాల్లో అమల్లో ఉన్న ఆటో ఛార్జీలను పరిశీలించారు.ఈ అధ్యయనం ఆధారంగా కమిటీ ప్రభుత్వానికి నివేదిక సమర్పించింది.
పెరిగిన ఖర్చుల ఆధారంగా ప్రతిపాదనలు
ఇంధన ధరలతో పాటు వాహన బీమా, ఇతర నిర్వహణ వ్యయాలు గణనీయంగా పెరిగినందున ఆటో ఛార్జీలను పెంచాల్సిన అవసరం ఉందని అధికారుల కమిటీ నివేదికలో పేర్కొంది.ఆటో కొనుగోలు ధర రూ.2.55 లక్షలు, బ్యాంకు రుణం 70 శాతం, డ్రైవర్ నెలవారీ జీతం రూ.25 వేలు, రోజుకు సగటున ఆటో 163.8 కిలోమీటర్లు ప్రయాణించడం వంటి అంశాలను కమిటీ పరిగణనలోకి తీసుకుంది.ఒక్క రెవెన్యూ-ఎర్నింగ్ కిలోమీటరుకు నిర్వహణ ఖర్చు రూ.13.53గా ఉన్నట్లు లెక్కించింది. దీంతో ప్రతి కిలోమీటరుకు రూ.14 చొప్పున ఛార్జీ వసూలు చేయాలని సిఫార్సు చేసింది.
12 ఏళ్లుగా మారని ఛార్జీలు
రాష్ట్రంలో గత 12 ఏళ్లుగా ఆటో ఛార్జీల్లో ఎలాంటి మార్పు లేదని కమిటీ తన నివేదికలో పేర్కొంది.ఈ కాలంలో ఇంధనం, బీమా, వాహన నిర్వహణ తదితర ఖర్చులు పెరిగిన నేపథ్యంలో ప్రస్తుతం ఛార్జీలను సవరించాల్సిన అవసరం ఉందని ప్రభుత్వానికి సూచించింది.ప్రభుత్వం కమిటీ ప్రతిపాదనలను ఆమోదిస్తే.. 1.6 కిలోమీటర్లకు రూ.30 కనీస ఛార్జీ, ఆ తర్వాత ప్రతి కిలోమీటరుకు రూ.14, నిరీక్షణ సమయానికి నిమిషానికి 75 పైసలు, రాత్రి వేళల్లో సాధారణ ఛార్జీపై 50 శాతం అదనపు ఛార్జీ విధానం అమల్లోకి రానుంది.
