ఆ ఐదు గ్రామాలకు సాగునీరివ్వండి

అనంతపురం జిల్లా కలెక్టర్ కు పరిటాల శ్రీరామ్ విజ్ఞప్తి

పులివెందుల బ్రాంచి కెనాల్ కు నీరు రావడం లేదు

ఐదు గ్రామాల్లో తీవ్ర తాగు, సాగునీటి ఎద్దడి ఉందన్న శ్రీరామ్

సానుకూలంగా స్పందించిన జిల్లా కలెక్టర్ వినోద్ కుమార్
విశాలాంధ్ర ధర్మవరం : పులివెందుల బ్రాంచి కెనాల్ కు నీరు విడుదల చేయకపోవడం వలన ఐదు గ్రామాల ప్రజలు, రైతులు తీవ్రమైన తాగు, సాగు నీటి సమస్యను ఎదుర్కొంటున్నారని ధర్మవరం నియోజకవర్గ టీడీపీ ఇన్ఛార్జి పరిటాల శ్రీరామ్ ఈ సందర్భంగా ఇదే అంశం పై అనంతపురం జిల్లా కలెక్టర్ వినోద్ కుమార్ దృష్టికి వినతి పత్రాన్ని అందజేశారు. పరిటాల శ్రీరామ్ తాడిమర్రి మండలం కునుకుంట్ల గ్రామస్థులతో కలసి కలెక్టరేట్ కు వెళ్లారు. అక్కడ కలెక్టర్ ని కలిసి నీటి సమస్య గురించి వివరించారు. అనంతరం పరిటాల శ్రీరామ్ మాట్లాడుతూ హెచ్చెల్సీ కాలువకు అనుబంధంగా ఉన్న పులివెందుల బ్రాంచి కెనాల్ కు గత కొన్ని సంవత్సరాలుగా నీరు రాక రైతులు ఇబ్బందులు పడుతున్నారన్నారు. ఎంపీఆర్ డ్యాం సౌత్ కెనాల్ మీదుగా ఉన్న తుంపెర డీప్‌కట్ సమీపంలో పులివెందుల బ్రాంచ్ కెనాల్‌కు ఆఫ్‌టేక్ పాయింట్ ఉందన్నారు. డీప్‌కట్‌లో 6కి.మీ నడిచిన తర్వాత కాలువ నదిలో కలుస్తుందన్నారు. చివరకు పులివెందుల బ్రాంచ్ కెనాల్ కింద ఆయకట్టు వలన ప్రయోజనం ఉంటుందని పీబీసీకి నీరు అందినప్పుడల్లా డీప్‌కట్‌ ప్రాంత రైతులు బోరుబావుల సాయంతో ఆయకట్టును సాగు చేస్థున్నారన్నారు. కానీ గండికోట – చిత్రావతి లిఫ్ట్ స్కీమ్ ప్రారంభించిన తర్వాత 2018 నుండి హెచ్‌ఎల్‌సి సిస్టమ్ నుండి పిబిసికి నీటిని పూర్తి సామర్థ్యంతో విడుదల చేయడం లేదన్నారు. ఐడిసి స్కీమ్‌లకు మాత్రమే మైనర్ డిశ్చార్జెస్‌తో నీటిని విడుదల చేస్తున్నారని.. దీని వలన రైతులకు సరిపడా నీరు అందక ఇబ్బందులు పడుతున్నారని ఆవేదన వ్యక్తం చేశారు. తాడిమర్రి మండలం రామాపురం, కునుకుంట్ల, చిలకొండయ్య పల్లి, నార్పల మండలం గుగూడు ముచ్చుకుంటపల్లి గ్రామస్తులు నీటి ఎద్దడిని తీవ్రంగా ఎదుర్కొంటున్నారని తెలిపారు. రైతుల అవసరానికి తీర్చడానికి ఎర్ట్స్ వైల్ పిబిసి కెనాల్ నుండి తగినంత ఎక్కువ నీటిని కేటాయించాలని వారు కోరారు. ఈ సందర్భంగా కలెక్టర్ వినోద్ కుమార్ సానుకూలంగా స్పందించడం జరిగిందని తెలిపారు. కలెక్టర్ మాట్లాడుతూ ప్రస్తుతం అక్కడున్న పరిస్థితులపై ఇరిగేషన్ అధికారుల ద్వారా సమాచారం తీసుకొని ఉన్నత స్థాయిలో చర్చించిన తర్వాత ఐదు గ్రామాలకు నీరు అందేలా కృషి చేస్తామని వారు హామీ ఇవ్వడం జరిగిందన్నారు. ఈ కార్యక్రమంలో గ్రామ రైతులు పాల్గొన్నారు.