దేశంలోని పలు నగరాల్లో ఇటీవల కొవిడ్ కేసులు క్రమంగా పెరుగుతున్నప్పటికీ, కొత్తగా లేదా మరింత ప్రమాదకరమైన వైరస్ వేరియంట్ వెలుగులోకి వచ్చినట్లు ఎలాంటి ఆధారాలు లేవని శాస్త్రవేత్తలు స్పష్టం చేస్తున్నారు.ప్రస్తుతం భారత్లో నమోదవుతున్న కేసులకు థాయ్లాండ్, సింగపూర్ వంటి దేశాల్లో వ్యాప్తి చెందుతున్న ఒమిక్రాన్ ఆర్ఎఫ్.5 వేరియంటే ప్రధాన కారణమని నిపుణులు చెబుతున్నారు.
అందువల్ల ప్రజలు అనవసర భయాందోళనలకు గురికాకుండా, అవసరమైన జాగ్రత్తలు పాటించాలని సూచిస్తున్నారు.
ఏపీలో నాలుగు మరణాలు.. ఇతర అనారోగ్యాలూ కారణమే
ఆంధ్రప్రదేశ్లో గత కొన్ని వారాలుగా నమోదైన కొవిడ్ కేసుల్లో నలుగురు మరణించారు. అయితే ఈ నలుగురూ ఇప్పటికే ఇతర తీవ్రమైన ఆరోగ్య సమస్యలతో బాధపడుతున్నారని వైద్యులు వెల్లడిస్తున్నారు.కేవలం కొవిడ్ కారణంగానే ఈ మరణాలు జరిగాయా, లేక ఇతర అనారోగ్య పరిస్థితులు కూడా ప్రభావం చూపాయా అనే అంశాన్ని సమగ్రంగా పరిశీలించడం అవసరమని ఆరోగ్య నిపుణులు పేర్కొంటున్నారు.
లక్షణాలు ఎలా ఉంటాయి?
ప్రస్తుతం నమోదవుతున్న కేసుల్లో కనిపిస్తున్న లక్షణాలు కూడా గతంలో ఒమిక్రాన్ వేరియంట్లో కనిపించినట్లుగానే ఉన్నాయి.
ముఖ్యంగా గొంతునొప్పి, దగ్గు, జ్వరం, తలనొప్పి, అలసట, ముక్కు కారడం వంటి సాధారణ ఫ్లూ లక్షణాలే ఎక్కువగా కనిపిస్తున్నాయని వైద్యులు వివరిస్తున్నారు. ప్రస్తుత పరిస్థితుల్లో తీవ్ర ఆందోళన అవసరం లేకపోయినా, ప్రజలు అప్రమత్తంగా ఉండటం అత్యంత ముఖ్యమని సూచిస్తున్నారు.
తీసుకోవాల్సిన జాగ్రత్తలు
జనం ఎక్కువగా ఉండే ప్రదేశాల్లో మాస్క్ ధరించడం, ఫ్లూ లేదా జలుబు లక్షణాలు ఉన్నవారు ఇతరులకు దూరంగా ఉండడం, వ్యక్తిగత పరిశుభ్రత పాటించడం వంటి సాధారణ జాగ్రత్తలు తీసుకుంటే వైరస్ వ్యాప్తిని గణనీయంగా తగ్గించవచ్చని నిపుణులు సూచిస్తున్నారు.
జన్యుక్రమ విశ్లేషణతోనే పూర్తి వివరాలు
వైరస్లో సంభవిస్తున్న మార్పులను గుర్తించడానికి జన్యుక్రమ విశ్లేషణ అత్యంత కీలకమని శాస్త్రవేత్తలు చెబుతున్నారు.దీనివల్ల వైరస్కు సంబంధించిన వేరియంట్, దాని వ్యాప్తి తీరు, లక్షణాలపై మరింత స్పష్టమైన సమాచారం లభిస్తుందని పేర్కొంటున్నారు.ప్రస్తుతం సీసీఎంబీలో ఈ నమూనాలపై ఎలాంటి పరీక్షలు నిర్వహించడం లేదని సీసీఎంబీ డైరెక్టర్ డాక్టర్ నందికూరి వినయ్కుమార్ తెలిపారు.దేశవ్యాప్తంగా ప్రస్తుతం సుమారు 300 లక్షణాలతో కూడిన కొవిడ్ కేసులు నమోదయ్యాయని ఆయన వెల్లడించారు.అయితే లక్షణాలు లేని చాలామంది పరీక్షలు చేయించుకోకపోవచ్చు కాబట్టి వాస్తవ కేసుల సంఖ్య మరింత ఎక్కువగా ఉండే అవకాశం ఉందన్నారు.అందువల్ల పరిస్థితిని నిరంతరం పర్యవేక్షించడం అత్యంత అవసరమని ఆయన అభిప్రాయపడ్డారు.
కొద్ది వారాల్లో కేసులు తగ్గే అవకాశం
దేశంలోని పలు నగరాలతో పాటు థాయిలాండ్, సింగపూర్లలో వ్యాప్తి చెందుతున్నఅదే వైరస్ రకం ప్రస్తుతం ఆంధ్రప్రదేశ్లో కూడా కనిపిస్తోందని టాటా ఇన్స్టిట్యూట్ ఆఫ్ జనెటిక్స్ అండ్ సొసైటీ డైరెక్టర్ డాక్టర్ రాకేశ్ మిశ్రా తెలిపారు.
గతంలో భారీ స్థాయిలో చేపట్టిన టీకా కార్యక్రమం వల్ల ఏర్పడిన రోగనిరోధక శక్తి, అలాగే కరోనా పట్ల ప్రజల్లో పెరిగిన అవగాహన,అనుభవం కారణంగా రాబోయే కొద్ది వారాల్లో కేసుల సంఖ్య క్రమంగా తగ్గే అవకాశాలు ఉన్నాయని ఆయన అంచనా వేశారు.
