అమెరికా-ఇరాన్ యుద్ధంతో పశ్చిమాసియాలో ఉద్రిక్తతలు కొనసాగుతున్నాయి. ఈ నేపథ్యంలో గల్ఫ్ దేశాలపై తన పట్టును మరింత బలోపేతం చేసుకునేందుకు ప్రయత్నిస్తున్న అగ్రరాజ్యం.. సౌదీ అరేబియాతో కీలక ఒప్పందానికి సిద్ధమైంది. సౌదీకి 5 బిలియన్ డాలర్లు (సుమారు రూ.47 వేల కోట్లు) విలువైన ఆయుధాలను విక్రయించేందుకు అమెరికా ఆమోదం తెలిపింది. ప్రాంతీయ ముప్పుల నుంచి తనను తాను రక్షించుకునే సౌదీ సామర్థ్యాన్ని మరింత బలోపేతం చేయడమే లక్ష్యంగా బాంబులు, గైడెన్స్ కిట్లు, ఇతర ఆయుధాల విక్రయానికి ట్రంప్ యంత్రాంగం అనుమతి ఇచ్చింది. ఈ ఆయుధ ప్యాకేజీలో భాగంగా 5,004 జాయింట్ డైరెక్ట్ ఎటాక్ మ్యూనిషన్స్ (JDAM) గైడెన్స్ కిట్లు, 5,000 KMU-556 JDAM గైడెన్స్ కిట్లను సరఫరా చేయనున్నారు.
5,000 బాంబులను అందించనున్నట్లు సమాచారం
అలాగే 500 పౌండ్ల బరువున్న 5,004 బాంబులు, 2,000 పౌండ్ల బరువున్న 5,000 బాంబులను అందించనున్నట్లు అమెరికా విదేశాంగ శాఖ వెల్లడించింది.ఈ ప్యాకేజీలో ఫ్యూజ్ వ్యవస్థలు, టార్గెట్ డిటెక్టర్లు, కంటైనర్లు, సహాయక పరికరాలు, ఆయుధాల విడిభాగాలతో పాటు అమెరికా కాంట్రాక్టర్ల నుంచి సాంకేతిక సహాయం కూడా ఉంటుంది.సౌదీ అరేబియా, ఇతర గల్ఫ్ దేశాలు, అమెరికా దళాల మధ్య ఉన్న పరస్పర సహకారం ఈ ఆయుధ ఒప్పందంతో మరింత మెరుగుపడుతుందని అమెరికా తెలిపింది.
ఇరాన్ దాడుల నేపథ్యంలో..
ఇరాన్పై అమెరికా దాడులకు ప్రతీకారంగా గల్ఫ్ దేశాల్లోని అమెరికా స్థావరాలు, సైనిక శిబిరాలను టెహ్రాన్ లక్ష్యంగా చేసుకుంటోంది.ఈ నేపథ్యంలో అమెరికా సౌదీకి భారీ స్థాయిలో ఆయుధాలను సరఫరా చేయడానికి ఆమోదం తెలపడం ప్రాధాన్యం సంతరించుకుంది.ఇప్పటికే సౌదీ అరేబియాతో అమెరికా 30 ఏళ్ల భాగస్వామ్యానికి సంబంధించిన అణు ఒప్పందాన్ని కుదుర్చుకుంది.ఈ ఒప్పందంలో భాగంగా అణు విద్యుత్ ప్లాంట్ల నిర్మాణం, అణు ఇంధన సరఫరా, రియాక్టర్ల సాంకేతికత బదిలీ, శాస్త్రవేత్తలు, ఇంజినీర్లకు శిక్షణ, రేడియోధార్మిక పదార్థాల నిర్వహణ, అంతర్జాతీయ తనిఖీలు వంటి అంశాల్లో సౌదీకి అమెరికా సహకరించనుంది.
సౌదీ అరేబియా శిలాజ ఇంధనాలపై ఆధారపడటాన్ని తగ్గించి.. అణు విద్యుత్ను ఉత్పత్తి చేయడం ఈ అణు ఒప్పందం ప్రధాన ఉద్దేశంగా ఉంది.
