తన రాజీనామాను రాష్ట్ర గవర్నర్ కు పంపించిన స్టాలిన్
తమిళనాడులో రాజకీయ ముఖచిత్రం సంపూర్ణంగా మారిపోయింది. దశాబ్దాలుగా తమిళగడ్డను గుప్పెట్లో పెట్టుకుని శాసించిన ద్రవిడ పార్టీల (డీఎంకే, అన్నాడీఎంకే) కంచుకోటలు బద్దలయ్యాయి. సినీ నటుడు విజయ్ స్థాపించిన టీవీకే పార్టీ రెండేళ్లలోనే తమిళనాడులో అధికారాన్ని చేజిక్కించుకుంది. తమిళ ఓటర్లు, ముఖ్యంగా జెన్ జీ యువత విజయ్ కు పట్టం కట్టారు. వరుసగా రెండు సార్లు సీఎంగా అధికారిన్ని చలాయించిన స్టాలిన్ తీవ్ర పరాభవాన్ని మూటకట్టుకున్నారు. డీఎంకే పార్టీ రెండో స్థానానికి పరిమితం అయింది. ఎవరూ ఊహించని విధంగా కొళత్తూర్ నియోజకవర్గంలో స్టాలిన్ 9 వేలకు పైగా ఓట్ల తేడాతో ఓటమిపాలయ్యారు. తమిళనాడు అసెంబ్లీ ఎన్నికల్లో డీఎంకే పరాజయం పాలవడంతో ముఖ్యమంత్రి స్టాలిన్ తన పదవికి రాజీనామా చేశారు. తన రాజీనామా లేఖను ఆయన గవర్నర్కు పంపించారు. మరోవైపు, తాజా ఫలితాల ప్రకారం ఏ పార్టీకి కూడా ప్రభుత్వ ఏర్పాటుకు అవసరమైన 118 స్థానాల మ్యాజిక్ ఫిగర్ దక్కకపోవడంతో రాష్ట్రంలో రాజకీయ సమీకరణాలు ఆసక్తికరంగా మారాయి. 108 స్థానాలను కైవసం చేసుకుని అతిపెద్ద పార్టీగా నిలిచిన విజయ్ నేతృత్వంలోని టీవీకే ఇప్పుడు ప్రభుత్వ ఏర్పాటుపై పూర్తిస్థాయిలో దృష్టి సారించింది.
72 స్థానాలు సాధించిన డీఎంకే కూటమి, 53 స్థానాల్లో నిలిచిన అన్నాడీఎంకేలను కాదని, మెజారిటీకి అవసరమైన మరో 10 మంది ఎమ్మెల్యేల మద్దతును కూడగట్టే పనిలో విజయ్ నిమగ్నమయ్యారు. ఎవరితో పొత్తు పెట్టుకోవాలనే అంశంపై పార్టీ నేతలతో కీలక చర్చలు జరుపుతున్న విజయ్… ఇప్పటికే గవర్నర్ అపాయింట్మెంట్ కోరారు. అతిపెద్ద పార్టీగా ఉన్న తమకే ప్రభుత్వ ఏర్పాటుకు అవకాశం ఇవ్వాలని ఆయన కోరనున్నారు.
