హైదరాబాద్‌ జేఎన్టీయూలో విద్యార్థుల మధ్య తీవ్ర ఘర్షణ.. కర్రలతో దాడులు

హైదరాబాద్‌లోని జేఎన్టీయూ క్యాంపస్ విద్యార్థుల ఘర్షణతో రణరంగంగా మారింది. గురువారం అర్ధరాత్రి రెండు వర్గాలకు చెందిన విద్యార్థులు కర్రలతో పరస్పరం దాడులు చేసుకున్నారు. ఈ ఘటనలో పలువురు విద్యార్థులు గాయపడగా, వారిని సమీపంలోని ఆసుపత్రికి తరలించారు. సమాచారం అందుకున్న పోలీసులు 19 మంది విద్యార్థులపై కేసులు నమోదు చేసి, 8 మందిని అదుపులోకి తీసుకున్నారు.గురువారం సాయంత్రం క్యాంపస్‌లో నిర్వహించిన తీజ్ వేడుకల్లో ఇద్దరు విద్యార్థుల మధ్య మొదలైన చిన్న వాగ్వివాదానికి పాత కక్షలు కూడా తోడవడంతో తీవ్ర ఘర్షణకు దారితీసింది. రాత్రి సుమారు 2:30 గంటల సమయంలో మంజీరా హాస్టల్‌కు చెందిన కొందరు విద్యార్థులు, గౌతమి హాస్టల్‌పై దాడి చేశారు. అక్కడి విద్యార్థులను గదుల్లోంచి బయటకు పిలిచి కర్రలతో దాడికి పాల్పడ్డారు. సెక్యూరిటీ సిబ్బంది అడ్డుకున్నా ఫలితం లేకపోయింది.ఈ ఘటనపై రెండు వర్గాలు పరస్పరం ఫిర్యాదు చేసుకోవడంతో పోలీసులు మూడు వేర్వేరు కేసులు నమోదు చేశారు. పాత గొడవల నేపథ్యంలోనే ఈ ఘర్షణ జరిగిందని, ఓ యువతికి సంబంధించిన కోణంలో కూడా దర్యాప్తు చేస్తున్నామని డీసీపీ రీతిరాజ్ తెలిపారు. ఘర్షణ సమయంలో ఓ విద్యార్థి మద్యం మత్తులో ఉన్నట్లు గుర్తించామని, దీనిపైనా విచారణ జరుపుతున్నామన్నారు. మరోవైపు, ఈ ఘటనపై విచారణ కమిటీని ఏర్పాటు చేశామని, బాధ్యులపై కఠిన చర్యలు తీసుకుంటామని జేఎన్టీయూ ప్రిన్సిపల్ డాక్టర్ జి.వి. నరసింహారెడ్డి స్పష్టం చేశారు. పరారీలో ఉన్న మిగతా విద్యార్థుల కోసం పోలీసులు గాలిస్తున్నారు.