రాజన్‌ క్షీరసాగర్‌
బీజేపీ ప్రభుత్వం ‘వినాశకర వ్యవసాయ చట్టాలు’ తిరిగి ప్రవేశపెట్టేందుకు వివిధ మార్గాల ద్వారా ప్రయత్నిస్తోంది. రైతుల వ్యతిరేకత, వివిధ రాష్ట్రాల అసెంబ్లీ ఎన్నికల దృష్ట్యా పార్టీ అధిష్ఠానం తోసిపుచ్చినప్పటికీ బీజేపీ ఎంపీలు అనేక మంది ఈ వినాశకర నల్లచట్టాలను బహిరంగంగా సమర్థిస్తూ ప్రకటనలు గుప్పిస్తున్నారు.
ఇటీవల జరిగిన సార్వత్రిక ఎన్నికలలో మెజారిటీ తగ్గిపోయినప్పటికీ కేంద్రంలోని ఎన్డీయే ప్రభుత్వం కార్పొరేట్‌ అనుకూల, రైతు వ్యతిరేక విధానాలను అవిచ్ఛిన్నంగా కొనసాగిస్తోంది. మోదీ ప్రభుత్వంపై రైతులకు విశ్వాసం సన్నగిల్లడమే ఇటీవల జరిగిన లోక్‌సభ ఎన్నికలలో బీజేపీ మెజారిటీ తగ్గిపోవడానికి ప్రధాన కారణం. మెజారిటీ తగ్గినప్పటికీ జేడీయూ, టీడీపీ మద్దతుతో బీజేపీ కేంద్రంలో అధికారంలో కొనసాగు తోంది. ఎన్నికలలో వచ్చిన ఫలితాలను గుర్తించడానికి బదులుగా 2017 మందసౌర్‌ రైతుల నిరసనను అమానుషంగా అణచివేసేందుకు ప్రయత్నించారని ఆరోపణలు ఎదుర్కొంటున్న శివరాజ్‌ సింగ్‌ చౌహాన్‌ను వ్యవసాయ, రైతు సంక్షేమ మంత్రిగా నియమించడంతో సహా రైతులకు హానిచేసే విధానాలను బీజేపీ కొనసాగిస్తోంది.
కేంద్రంలో తిరిగి అధికారంలోకి రావడంతో బీజేపీ ప్రభుత్వం ‘వినాశకర వ్యవసాయ చట్టాలు’ తిరిగి ప్రవేశపెట్టేందుకు వివిధ మార్గాల ద్వారా ప్రయత్నిస్తోంది. రైతుల వ్యతిరేకత, వివిధ రాష్ట్రాల అసెంబ్లీ ఎన్నికల దృష్ట్యా పార్టీ అధిష్ఠానం తోసిపుచ్చినప్పటికీ బీజేపీ ఎంపీలు అనేక మంది ఈ వినాశకర నల్లచట్టాలను బహిరంగంగా సమర్థిస్తూ ప్రకటనలు గుప్పిస్తున్నారు. మరో పక్క ఈ వివాదాస్పద చట్టాలను తిరిగి తీసుకువచ్చేందుకు మార్గం సుగమం చేస్తూ బహుళజాతి వ్యవసాయ కార్పొరేషన్లతో ప్రభుత్వం ఎంఓయూలు కుదుర్చుకుంటోంది. ‘‘డిజిటల్‌ మౌలిక సదుపాయాల’ ప్రచారం ద్వారా వ్యవసాయ డేటాపై నియంత్రణను ప్రభుత్వం కోరుకుంటోంది. ఐసీఏఆర్‌, అమజాన్‌, సింజెంటా వంటి కంపెనీల మధ్య ఈ విధమైన ఒప్పందాల ద్వారా ప్రపంచ సంస్థలకు అందుబాటులో ఉంటోంది. ఇది వ్యవసాయ విశ్వవిద్యాలయాలు పరిశోధన డేటా, విస్తరణ డేటా చివరకు భూమిని కూడా ఈ సంస్థలకు ధారాదత్తం చేయడానికి దోహదపడుతోంది. అంతేకాకుండా భారతీయ వ్యవసాయం కార్పొరేట్ల నియంత్రణలోకి వెళ్లిపోతోంది.
వరదలు, కరువు ప్రభావిత ప్రాంతాల నిర్లక్ష్యం
ఖరీఫ్‌ సీజన్‌లో దేశంలోని అనేక ప్రాంతాలలో భారీ వర్షాలు కురిసి వరదలు సంభవించి లక్షలాది ఎకరాలలో పంట నాశనమైనది. మరి కొన్ని ప్రాంతాలలో దుర్భిక్ష పరిస్థితులు పంట నష్టానికి దారితీశాయి. భారత వాతావరణ విభాగం (ఐఎండీ) తాజాగా విడుదల చేసిన ‘రుతుపవనాల ముగింపు నివేదిక’ ప్రకారం 2024లో 2,632 ప్రాంతాలలో భారీ వర్షాలు, 473 ప్రాంతాలలో అతి భారీవర్షాలు కురిశాయి. కేరళలోని వయనాడ్‌ జిల్లాలో ప్రకృతి ప్రకోపానికి గురై కొండచెరియలు విరిగిపడి భారీ ప్రాణ, ఆస్తి నష్టం సంభవించింది. ఆంధ్రప్రదేశ్‌, తెలంగాణ, మహారాష్ట్ర, బీహార్‌, అసోం, ఉత్తర ప్రదేశ్‌, త్రిపుర, గుజరాత్‌, మేఘాలయల్లో భారీ వరదలు సంభవించాయి. వందలాది మంది ప్రాణాలు కోల్పోయారు. లక్షలాది ఎకరాలలో పంట నాశనమైనది. వేలాది మంది నిరాశ్రయులయ్యారు. అయినప్పటికీ బీజేపీ ప్రభుత్వ స్పందన అత్యంత నామమాత్రం మాత్రమే. జాతీయ విపత్తుగా ప్రకటించడానికి తిరస్కరించి పరిమితమైన సహాయం మాత్రమే అందించి చేతులు దులుపుకుంది. ఇదిలావుండగా, పీఎంఎఫ్‌బీవై ఫసల్‌ బీమా పథకం కింద చెప్పుకోతగ్గ మొత్తంలో ఆర్థిక, బీమా సంస్థలకు నిధులు అందినప్పటికీ బాధిత రైతులలో అతి కొద్ది మందికి మాత్రమే అవి చేరాయి. వరద బాధిత కుటుంబాలు, రైతులకు అతి స్వల్ప మొత్తం పరిహారం అందింది. వ్యవసాయ ఉపకరణాలకు సంభవించిన నష్టం, పంట, ఇళ్లు నష్టం, జీవనోపాధి కోల్పోవడంపై నష్టం అంచనా వేయడాన్ని ప్రభుత్వం తీవ్రంగా నిర్లక్ష్యం చేసింది. బీహార్‌, ఆంధ్రప్రదేశ్‌, ఇతర రాష్ట్రాలలోని అనేక ప్రాంతాలలో తీవ్ర దుర్భిక్ష పరిస్థితులు నెలకొన్నా సాయం అందించడంలో కేంద్రంలోని మోదీ ప్రభుత్వం విఫలమైంది. దుర్బిక్ష ప్రకటన విధానాన్ని ఇప్పటికీ సవరించలేదు. దానితో రైతులు, అవసరతలో ఉన్న ఇతర వర్గాల వారికి ఇంతవరకూ ఎటువంటి ఉపశమనం లభించలేదు.
పెరిగిన సాగు వ్యయం
పెరుగుతున్న సాగు వ్యయం భారతీయ రైతులను మరింత ఒత్తిడికి గురిచేస్తోంది. ఎరువుల సబ్సిడీలపై గణనీయంగా కోత విధిస్తున్నారు. 202223 కేంద్ర బడ్జెట్‌లో ఎరువుల సబ్సిడీలకు రూ. 2,51,339 కోట్లు కేటాయించగా 202324 సంవత్సరం సవరించిన బడ్జెట్‌లో రూ. 1,88,894 కోట్లకు తగ్గిపోయింది. 202425 ఆర్థిక సంవత్సర బడ్జెట్‌లో రూ. 62,445 కోట్లను తగ్గించి 1,64,000 కోట్లతో బడ్జెట్‌ను ఖరారు చేశారు. ప్రభుత్వం ప్రజా పంపిణీ వ్యవస్థ (పీడీఎస్‌)తో నిమిత్తం లేకుండా, రైతులకు కనీస మద్దతు ధర (ఎంఎస్‌పీ) భావనకు విఘాతం కలిగిస్తూ, రేషన్‌ కార్డుదారులకు పీడీఎస్‌ ద్వారా ఆహార ధాన్యాల సరఫరాను నిలిపివేసి నేరుగా నగదు బదిలీని ప్రారంభించింది. వ్యవసాయ దిగుమతులు కూడా పెరిగాయి. 2023 ఆర్థిక సంవత్సరంలో భారత వ్యవసాయ, వ్యవసాయ సంబంధిత ఉత్పాదనల దిగుమతి 37 బిలియన్‌ డాలర్లకు చేరింది. 2019 ఆర్థిక సంవత్సరంతో పోల్చుకుంటే 2023లో దిగుమతులు 12.5 బిలియన్‌ డాలర్లు (51 శాతం)పైగా పెరిగాయి. ఈ ఉత్పాదనల దిగుమతిలో భారత్‌ ప్రపంచంలోనే ఎనిమిదవ అతిపెద్ద దేశంగా అవతరించింది. పత్తి, సోయా ఉత్పాదనలు, తాజా పండ్లు, పాలపొడి తదితరాలను భారత్‌ అధికంగా దిగుమతి చేసుకుంటోంది. దానితో దేశీయంగా సోయాబిన్‌, పత్తి ధరలు కనీస మద్దతు ధర (ఎంఎస్‌పీ)కన్నా తక్కువకు పడిపోయాయి. చౌక దిగుమతులను సులభతరం చేసేందుకు మోదీ ప్రభుత్వం సుముఖత చూపడం దేశీయ రైతులను నాశనం చేసింది, భారతదేశాన్ని ప్రపంచ వ్యవసాయ వస్తువులకు డంపింగ్‌ గ్రౌండ్‌గా మార్చివేసింది. రైతుల పేరుతో కార్పొరేట్‌ దోపిడీ మోదీ ప్రభుత్వం అమలుచేస్తున్న పీఎంఎఫ్‌బీవై పంట బీమా పథకం ప్రధానంగా ఆర్థిక, బీమా కంపెనీలకు మాత్రమే లబ్ధి చేకూరుస్తోంది. 2018లో ఈ పథకం ప్రారంభించినప్పటి నుంచి ఇవి 1,95,207 కోట్ల రూపాయలు అందుకున్నాయి. మహారాష్ట్ర వంటి చోట ‘‘రూపాయి పంట బీమా పథకం’ రైతుల అనుకూలమైనదిగా కనపడినప్పటికీ ప్రభుత్వం అంతిమంగా పూర్తి బీమా ప్రీమియం చెల్లించినప్పటికీ, అశాస్త్రీయంగా, రైతు వ్యతిరేక ప్రమాణికం కారణంగా కార్పొరేట్‌ కంపెనీలకు అనుకూలంగా మారి వాటికి లాభాలను తెచ్చిపెట్టింది. 95 శాతం సబ్సిడీపై సోలార్‌ విద్యుత్‌ పంపులను ఇచ్చే పునర్‌ ఇంధన మంత్రిత్వ శాఖ పథకం పీఎంకుసుమ్‌ను కూడా ఇదే విధంగా నిర్వహించడం వల్ల అదాని వంటి కొన్ని కంపెనీలకు మాత్రమే ప్రయోజనం కలిగించింది తప్ప రైతులకు ఏమాత్రం ప్రయోజనం లేదు. ప్రభుత్వ నిధులు కార్పొరేట్‌ సంస్థల అనుబంధ సంస్థల ఖాతాల్లోకి వెళ్లాయి.
అఖిల భారత కిసాన్‌ సభ అధ్యక్షులు
