పార్టీ కోసం కష్టపడిన వారికి అన్యాయం జరగనివ్వం
టీడీపీ ప్రజాప్రతినిధులతో చంద్రబాబు
విశాలాంధ్ర బ్యూరో – అమరావతి : సాధ్యమైనంత త్వరగా నామినేటెడ్‌ పదవుల భర్తీకి కసరత్తు చేస్తున్నామని టీడీపీ జాతీయ అధ్యక్షులు, సీఎం చంద్రబాబు చెప్పారు. పేర్లను సిఫారసు చేసేందుకు కొంతమంది నేతలు ఆలస్యం చేస్తున్నారని, ఆయా పదవుల కోసం పార్టీకి కష్టపడిన వారి వివరాలు త్వరగా అందించాలని కోరారు. తెలుగుదేశం పార్టీకి చెందిన మంత్రులు, ఎమ్మెల్యేలు, ఎంపీలు, ఎమ్మెల్సీలతో ముఖ్యమంత్రి శుక్రవారం టెలీకాన్ఫరెన్స్‌ నిర్వహించారు. ఈ సందర్భంగా ఆయన మాట్లాడుతూ పార్టీ కోసం కష్టపడిన వారిని, త్యాగాలు చేసిన వారిని తప్పకుండా తగిన గుర్తింపు ఇస్తామని భరోసా ఇచ్చారు. అలాగే సరైన వ్యక్తులను సరైన పదవుల్లో నియమిస్తామన్నారు. రాష్ట్ర వ్యాప్తంగా 21 ప్రధాన ఆలయాలకు చైర్మన్ల నియామకం చేపట్టనున్నట్లు వెల్లడిరచారు. నామినేటెడ్‌ పదవుల కోసం దాదాపు 60 వేల దరఖాస్తులు వచ్చాయని, వాటిని నిశితంగా పరిశీలిస్తున్నామన్నారు. మొదటిసారే పదవులు రాలేదని అనుకోవద్దు. రెండేళ్ల పదవీకాలం ముగిశాక మిగిలినవారికి అవకాశాలు కల్పిస్తాం. ఇప్పటికే పదవులు తీసుకున్నవారి ప్రతిభను పర్యవేక్షిస్తున్నాం. ప్రతిపక్షంలో ఉన్నట్లే ఇప్పుడు కూడా హుందాగా వ్యవహరించాలని కోరారు. పార్టీ నేతలు ఏ స్థాయిలోనూ వైసీపీ నేతలతో సంబంధాలు పెట్టుకోకూడదని, నేను చెబితే, వైసీపీకి ఓటేసిన వారికి పథకాలు ఇవ్వొద్దన్నట్లు ప్రచారం చేస్తున్నారని అన్నారు. సంక్షేమ కార్యక్రమాల అమలులో వివక్ష ఉండదని స్పష్టం చేశారు. పార్టీలకు అతీతంగా పథకాలు అందజేస్తున్నామన్నారు. సంక్షేమ పథకాలు వేరు. రాజకీయ సంబంధాలు వేరు అన్నారు. స్థానిక ప్రజాప్రతినిధులు కూడా సంక్షేమ కార్యక్రమాల అమలు విషయంలో లబ్ధిదారులు అర్హులా ? కాదా ? అన్న విషయం మాత్రమే పరిగణనలోకి తీసుకోవాలని సూచించారు. పార్టీలో గ్రూపు రాజకీయాలకు తావివ్వకుండా చూసే బాధ్యత మంత్రులదేనని స్పష్టం చేశారు. జిల్లా ఇంఛార్జ్‌ మంత్రులు వారి జిల్లాల్లో పర్యటనల సంఖ్య పెంచాలని, కూటమిలోని మూడు పార్టీల నేతలు, కార్యకర్తలను కలుపుకొని ముందుకెళ్లాలని చంద్రబాబు నేతలకు దిశానిర్దేశం చేశారు.
గత 9 నెలల కాలంలో ప్రభుత్వం చేపట్టిన అభివృద్ధి, సంక్షేమ కార్యక్రమాలపై ప్రజల నుంచి మంచి స్పందన వస్తోందన్నారు. ప్రజా ప్రతినిధులు కూడా ఎప్పటికప్పుడు వీటిని ప్రజల్లోకి తీసుకువెళ్లాలని, గతానికి, ఇప్పటికీ తేడాను తెలియజేసి వారిని చైతన్యపర్చాలని చంద్రబాబు నేతలకు మార్గనిర్దేశనం చేశారు.
