అమెరికా దిగ్బంధనాన్ని ఛేదించిన ఇరాన్ నౌకలు!
ఇరాన్పై అమెరికా విధించిన కఠినమైన నౌకా దిగ్బంధనాన్ని ఛేదించుకుని ఇరాన్ నౌకలు చాకచక్యంగా ముందుకు సాగుతున్నాయి. హర్మూజ్ జలసంధిలో అమెరికా సైనిక నిఘా కళ్లుగప్పి, తమ గమ్యస్థాన వివరాలను మార్చివేసి కనీసం రెండు నౌకలు విజయవంతంగా ఇరాన్ పోర్టుల వైపు ప్రయాణించాయి. ఈ పరిణామం పర్షియన్ గల్ఫ్ ప్రాంతంలో తీవ్ర ఉద్రిక్తతకు దారితీస్తోంది. జిన్హువా వార్తా సంస్థ కథనం ప్రకారం ఈ విషయాన్ని బ్రిటన్కు చెందిన ప్రముఖ షిప్పింగ్ మీడియా లాయిడ్స్ లిస్ట్ వెల్లడించింది. అమెరికా దిగ్బంధనం అమల్లోకి వచ్చాక, ఇరాన్కు చెందిన రెండు కంటైనర్ నౌకలు తమ ఆటోమేటిక్ ఐడెంటిఫికేషన్ సిస్టమ్ (ఏఐఎస్)లో గమ్యస్థానాన్ని మార్చేశాయి. తొలుత బందర్ అబ్బాస్ పోర్టుగా ఉన్న వివరాలను, మరింత సాధారణంగా ఉండే పీజీ పోర్ట్స్ (పర్షియన్ గల్ఫ్ పోర్టులు) అని మార్చడం ద్వారా అమెరికా దళాలను ఏమార్చాయి. జలసంధిని దాటిన తర్వాత, మంగళవారం అవి తిరిగి బందర్ అబ్బాస్ పోర్టు వైపు తమ ప్రయాణాన్ని కొనసాగించాయి. ఇరాన్ అనుసరిస్తున్న ఈ ఎత్తుగడలు అమెరికా నిఘా వ్యవస్థకు సవాలుగా మారాయని, అనుమానిత నౌకలను గుర్తించేందుకు అదనపు వనరులు అవసరమవుతాయని విశ్లేషకులు అభిప్రాయపడుతున్నారు.
మరోవైపు ఈ దిగ్బంధనాన్ని యూఎస్ సెంట్రల్ కమాండ్ ధ్రువీకరించింది. 10,000 మందికి పైగా సైనికులు, డజనుకు పైగా యుద్ధనౌకలు, డజన్ల కొద్దీ విమానాలతో ఇరాన్ పోర్టులను దిగ్బంధించినట్లు ప్రకటించింది. తొలి 24 గంటల్లో ఏ నౌక తమ వలయాన్ని దాటలేదని, ఆరు వాణిజ్య నౌకలను వెనక్కి పంపించామని ఎక్స్ లో పేర్కొంది. ఈ నేపథ్యంలో అమెరికా అధ్యక్షుడు డొనాల్డ్ ట్రంప్ ఇరాన్కు తీవ్రస్థాయిలో హెచ్చరికలు జారీ చేశారు.
మా దిగ్బంధనం సమీపంలోకి ఏ ఇరాన్ నౌక వచ్చినా, సముద్రంలో డ్రగ్ డీలర్ల పడవలపై ప్రయోగించే వ్యవస్థతోనే వాటిని తక్షణమే ధ్వంసం చేస్తాం అని తన ట్రూత్ సోషల్ ఖాతాలో సంచలన పోస్ట్ చేశారు. ఈ ఘర్షణ వాతావరణం కారణంగా హర్మూజ్ జలసంధిలో నౌకల రద్దీ గణనీయంగా పడిపోయింది. సంఘర్షణకు ముందు రోజు 100కి పైగా నౌకలు ప్రయాణించగా, ఇప్పుడు ఆ సంఖ్య 10 శాతం కంటే తక్కువ స్థాయికి చేరింది. ఈ పరిణామాలు ప్రపంచ వాణిజ్యంపై తీవ్ర ప్రభావం చూపే అవకాశం ఉందని ఆందోళనలు వ్యక్తమవుతున్నాయి.
