పెట్రోల్ బంకుల్లో విక్రయించే ఇంధనంలో ఇథనాల్ శాతం ఎంతో తప్పనిసరిగా వెల్లడించేలా ఆదేశాలు ఇవ్వాలని కోరుతూ దాఖలైన ప్రజా ప్రయోజన వ్యాజ్యాన్ని (పిల్) విచారించేందుకు సుప్రీంకోర్టు నిరాకరించింది. ఈ అంశంపై సంబంధిత హైకోర్టును ఆశ్రయించాలని పిటిషనర్కు సోమవారం ధర్మాసనం సూచించింది. న్యాయవాది ఎన్.కె. గోస్వామి సుప్రీంకోర్టులో ఈ పిల్ దాఖలు చేశారు. పెట్రోల్ నాజిళ్లపై, జారీ చేసే రశీదులపై ఇథనాల్ శాతాన్ని స్పష్టంగా ముద్రించాలని ఆయన కోరారు. ఇథనాల్ కలిపిన పెట్రోల్కు ఏయే వాహనాలు అనుకూలంగా ఉంటాయో తెలిపే అధికారిక డేటాబేస్ను ఏర్పాటు చేయాలని అభ్యర్థించారు. ముఖ్యంగా 2023 కంటే ముందు తయారైన పాత వాహనాలకు E20 (20 శాతం ఇథనాల్ కలిపిన పెట్రోల్) వాడకం వల్ల తలెత్తే సమస్యల నుంచి రక్షణ కల్పించాలని తన పిటిషన్లో పేర్కొన్నారు. ప్యాక్ చేసిన ఆహార పదార్థాలపై వాటి వివరాలను వెల్లడించినట్లే, తాము కొనుగోలు చేసే ఇంధనం గురించి తెలుసుకునే హక్కు వినియోగదారులకు ఉందని ఆయన వాదించారు.
ఈ పిటిషన్ను జస్టిస్ ఎం.ఎం. సుందరేష్, జస్టిస్ ప్రసన్న బి. వరాళేలతో కూడిన ధర్మాసనం విచారించింది. కేంద్ర ప్రభుత్వం తరఫున వాదనలు వినిపించిన అటార్నీ జనరల్ ఆర్. వెంకటరమణి ఈ పిటిషన్ను వ్యతిరేకించారు. ఇది ఒక ‘ప్రాక్సీ పిటిషన్’ అని, ఇదే తరహా వ్యాజ్యాన్ని 2025 సెప్టెంబర్లోనే సుప్రీంకోర్టు కొట్టివేసిందని ఆయన గుర్తుచేశారు.
ఇరుపక్షాల వాదనలు విన్న ధర్మాసనం, ఈ పిటిషన్పై తాము జోక్యం చేసుకోలేమని స్పష్టం చేస్తూ, పిటిషనర్ హైకోర్టును ఆశ్రయించవచ్చని పేర్కొంది. E20 పెట్రోల్ వల్ల వాహనాల యాక్సిలరేషన్ మెరుగుపడటంతో పాటు ఉద్గారాలు తగ్గుతాయని, దీనివల్ల రైతులకు మేలు జరుగుతుందని కేంద్ర ప్రభుత్వం చెబుతున్న విషయం తెలిసిందే
