ప్రస్తుత ప్రపంచ పరిస్థితులకు అనుగుణంగా మార్పులు: జైశంకర్
ఐక్యరాజ్య సమితి (UN) లో నిర్వహించిన పీ4ఎం సదస్సుకు భారత్ సహా ఆస్ట్రేలియా, బార్బడోస్, బ్రెజిల్, కెనడా, కెన్యా దేశాలు సహాధ్యక్షులుగా వ్యవహరించాయి. ఈ సందర్భంగా భారత విదేశాంగ మంత్రి ఎస్. జైశంకర్ ఐక్యరాజ్యసమితిలో సంస్కరణల అవసరాన్ని ప్రస్తావించారు. ప్రస్తుత ప్రపంచ పరిస్థితులు, మారుతున్న అంతర్జాతీయ అవసరాలకు అనుగుణంగా భద్రతామండలిలో మార్పులు తీసుకురావాల్సిన అవసరం ఉందని స్పష్టం చేశారు.
భద్రతామండలి అనుబంధ సంఘాల పనితీరులో తగినంత పారదర్శకత కనిపించడం లేదని జైశంకర్ అసంతృప్తి వ్యక్తం చేశారు. ప్రస్తుతం ప్రపంచ వ్యవస్థ అనేక సవాళ్లను ఎదుర్కొంటోందని పేర్కొన్నారు. వివిధ ప్రాంతాల్లో కొనసాగుతున్న సంఘర్షణలు, అంతర్జాతీయ చట్టాల ఉల్లంఘనలు ప్రపంచ శాంతి, స్థిరత్వంపై ప్రభావం చూపుతున్నాయని తెలిపారు.
ప్రపంచ సవాళ్లను అలాగే వదిలేస్తే..
ప్రస్తుత పరిస్థితులను సమర్థంగా ఎదుర్కొనే చర్యలు తీసుకోకుండా వదిలేస్తే.. అంతర్జాతీయ సహకార స్ఫూర్తిపైనే ప్రశ్నలు తలెత్తే ప్రమాదం ఉందని జైశంకర్ ఆందోళన వ్యక్తం చేశారు. ప్రపంచ దేశాలు ఎదుర్కొంటున్న కీలక అంశాలను సమష్టిగా పరిష్కరించాల్సిన అవసరం ఉందన్నారు. శాంతి, అంతర్జాతీయ భద్రత, వాతావరణ మార్పులపై చర్యలు, సాంకేతిక పరిజ్ఞానం, ఉగ్రవాద నిరోధక చర్యలు, విపత్తులను ఎదుర్కొనే సామర్థ్యం, భవిష్యత్ మహమ్మారులకు సన్నద్ధత వంటి అంశాలు సైతం సవాళ్లను ఎదుర్కొంటున్నాయని ఆయన పేర్కొన్నారు. ఈ సమస్యలను సమర్థంగా నిర్వహించేందుకు అన్ని దేశాలు ఒకే వేదికపైకి వచ్చి ఐక్యతను ప్రదర్శించాల్సిన అవసరం ఉందన్నారు.
ప్రపంచ సవాళ్లను అలాగే వదిలేస్తే..
అంతర్జాతీయ చట్టాలు, నియమాలు, నిబంధనలను అన్ని దేశాలు సమర్థంగా పాటించినప్పుడే ప్రపంచ వ్యవస్థ మరింత స్థిరంగా ముందుకు సాగుతుందని జైశంకర్ పేర్కొన్నారు. మారుతున్న ప్రపంచ అవసరాలకు అనుగుణంగా అంతర్జాతీయ సంస్థలు కూడా తమ విధానాలు, వ్యవస్థల్లో అవసరమైన మార్పులు చేసుకోవాల్సిన అవసరం ఉందని ఆయన అభిప్రాయపడ్డారు.
భారత్కు నాలుగు ఐరోపా దేశాల మద్దతు..
ఐక్యరాజ్యసమితి భద్రతామండలిలో శాశ్వత సభ్యత్వం పొందేందుకు భారత్ చాలాకాలంగా ప్రయత్నిస్తోంది. ఈ క్రమంలో ఐరోపాకు చెందిన హంగరీ, పోలాండ్, స్లోవేకియా, చెక్ రిపబ్లిక్ దేశాలు భారత్ శాశ్వత సభ్యత్వానికి మద్దతు ప్రకటించాయి. న్యూయార్క్లో జరిగిన 81వ ఐక్యరాజ్యసమితి సర్వసభ్య సమావేశాల సందర్భంగా నిర్వహించిన తొలి V4+ ఇండియా సమావేశంలో ఈ నాలుగు దేశాలు భారత్ శాశ్వత సభ్యత్వానికి తమ మద్దతును వెల్లడించాయి. భద్రతామండలి ప్రస్తుత నిర్మాణాన్ని మార్చి, సమకాలీన ప్రపంచ వాస్తవాలకు అనుగుణంగా మరింత ప్రాతినిధ్యంతో కూడిన వ్యవస్థను ఏర్పాటు చేయాలన్న భారత్ ప్రయత్నాలకు ఇది మద్దతుగా నిలిచింది.
