యూనిఫైడ్ పేమెంట్స్ ఇంటర్ఫేస్ (యూపీఐ) ద్వారా రూ. 2,000కు మించిన లావాదేవీలపై కొత్తగా విధించిన మర్చంట్ డిస్కౌంట్ రేట్ (ఎండీఆర్) దేశంలోని మెజారిటీ వ్యాపారులపై ఎలాంటి ప్రభావం చూపదని నేషనల్ పేమెంట్స్ కార్పొరేషన్ ఆఫ్ ఇండియా (ఎన్పీసీఐ) స్పష్టం చేసింది.డిజిటల్ చెల్లింపులు స్వీకరించే వ్యాపారుల్లో దాదాపు 75 శాతం మందికి ఈ కొత్త నిబంధన వర్తించదని ఎన్పీసీఐ మేనేజింగ్ డైరెక్టర్, సీఈఓ దిలీప్ అస్బే తెలిపారు. నేడు జరిగిన ఎస్బీఐ బ్యాంకింగ్ అండ్ ఎకనామిక్ కాంక్లేవ్లో ఆయన ఈ కీలక విషయాలను వెల్లడించారు.భారత్లో ప్రస్తుతం 60 మిలియన్లకు పైగా ప్రత్యేక యూపీఐ మర్చంట్లు ఉన్నారని, వారిలో 75 శాతం మంది ఇప్పటి వరకు ఒక్కసారి కూడా రూ. 2,000 కంటే ఎక్కువ విలువైన లావాదేవీని నమోదు చేయలేదని దిలీప్ అస్బే వివరించారు. ఈ కారణంగా ఎండీఆర్ విధానం వల్ల అత్యధిక శాతం మంది చిన్న, మధ్య తరహా వ్యాపారులకు ఎటువంటి ఇబ్బంది ఉండదని ఆయన పేర్కొన్నారు.ఈ ఎండీఆర్ భారం అధికంగా పెద్ద వ్యాపార సంస్థలపైనే పడుతుందని అస్బే తెలిపారు. మొత్తం ఎండీఆర్ విలువలో దాదాపు 80 శాతం… వార్షికంగా రూ. 1,000 కోట్ల కంటే ఎక్కువ స్థూల సరుకుల విలువ (జీఎంవీ) కలిగిన వ్యాపారుల నుంచి వస్తుందని అంచనా వేస్తున్నట్లు చెప్పారు. మిగిలిన మొత్తంలో దాదాపు సగం… రూ. 1 కోటి కంటే ఎక్కువ వార్షిక జీఎంవీ ఉన్న వ్యాపారాల నుంచి వస్తుందని ఆయన పేర్కొన్నారు.ఈ పెద్ద వ్యాపారుల్లో చాలామంది ఇప్పటికే క్రెడిట్ కార్డ్ చెల్లింపులను అంగీకరిస్తున్నారని, వారికి ఇలాంటి లావాదేవీ ఛార్జీల గురించి అవగాహన ఉందని అస్బే గుర్తుచేశారు. అందువల్ల వారు ఈ అదనపు భారాన్ని కస్టమర్లపై మోపే అవకాశం లేదని పరిశ్రమ వర్గాలు భావిస్తున్నట్లు తెలిపారు.
అయితే, మొత్తం వ్యాపారుల విలువలో దాదాపు 10 శాతం మంది ఈ ఎండీఆర్ భారాన్ని వినియోగదారులకు బదిలీ చేయడానికి ప్రయత్నించే ప్రమాదం ఉందని ఆయన అంగీకరించారు. అయినప్పటికీ, అలాంటి ఛార్జీలు కస్టమర్లపై పడకుండా బ్యాంకులు, పేమెంట్ అగ్రిగేటర్లు, ఇతర భాగస్వాములతో కలిసి ఎన్పీసీఐ పర్యవేక్షిస్తుందని హామీ ఇచ్చారు.
ఁవినియోగదారుడిపై ఛార్జీ పడే నిజమైన ప్రమాదం మొత్తం లావాదేవీల విలువలో కేవలం 10 శాతానికే పరిమితంఁ అని ఆయన స్పష్టం చేశారు. ఈ కొత్త ఎండీఆర్ విధానం వల్ల యూపీఐ లావాదేవీల సంఖ్య లేదా విలువపై గణనీయమైన ప్రభావం ఉండదని దిలీప్ అస్బే ధీమా వ్యక్తం చేశారు.
