ఐఐటీ బాంబేలో సంచలనం సృష్టించిన విద్యార్థి సాహిల్ వాకోడే అనుమానాస్పద మృతి కేసు విచారణలో ముంబై క్రైమ్ బ్రాంచ్ పోలీసులకు ఊహించని సాంకేతిక అడ్డంకి ఎదురైంది. మృతుడు సాహిల్ ఉపయోగించిన వ్యక్తిగత ఐఫోన్ ఏకంగా 17 అంకెలతో కూడిన అత్యంత సంక్లిష్టమైన పాస్వర్డ్/ప్యాటర్న్తో లాక్ చేయబడి ఉండటమే ఇందుకు ప్రధాన కారణం. ఆ ప్యాటర్న్, పాస్కోడ్ ఏమిటన్నది కుటుంబ సభ్యులకు సైతం తెలియకపోవడంతో, ఇప్పటివరకు పోలీసులు ఆ మొబైల్లోని కీలక డేటాను వెలికితీయలేకపోయారు. ఉన్నత విద్యాసంస్థలో కులవివక్ష, మానసిక వేధింపుల ఆరోపణల నేపథ్యంలో ఈ మొబైల్ ఫోన్ డిజిటల్ సాక్ష్యాధారాల పరంగా దర్యాప్తుకు అత్యంత కీలకంగా మారినప్పటికీ, లాక్ తెరుచుకోకపోవడంతో విచారణ ముందుకు సాగడం లేదు.
ఈ ఫోన్ను నిపుణుల సాయంతో అన్లాక్ చేయగలిగితే కేసులోని అనేక రహస్యాలు, మిస్టరీ ప్రశ్నలకు స్పష్టమైన సమాధానాలు లభిస్తాయని క్రైమ్ బ్రాంచ్ అధికారులు భావిస్తున్నారు. ముఖ్యంగా సాహిల్ ఆత్మహత్యకు పాల్పడటానికి ముందు, సెప్టెంబర్ 18న జరిగిన పరీక్ష సమయంలో తన ఫోన్లో అసలేం శోధించాడు (సెర్చ్ చేశాడు), ఎవరితోనైనా చాటింగ్ లేదా సంభాషణలు జరిపాడా అనే విషయాలు పూర్తిగా నిగ్గుతేలే అవకాశముంది. ప్రస్తుతం మొబైల్లోని డేటాను రికవరీ చేసేందుకు ఫోరెన్సిక్ సైన్స్ లేబొరేటరీ నిపుణులు, సైబర్ నిపుణుల బృందాలు తీవ్రంగా శ్రమిస్తున్నాయి. ఫోన్ డేటా అన్లాక్ అయితేనే వేధింపుల ఆరోపణలు ఎదుర్కొంటున్న ప్రొఫెసర్ పాత్రపై మరింత బలమైన ఆధారాలు లభిస్తాయని దర్యాప్తు బృందాలు వెల్లడించాయి.
