జ్ఞానేశ్ రాజీనామా డిమాండ్లతో దద్దరిల్లిన దిల్లీ.. బారికేడ్లు ఎక్కిన రాహుల్

ఎన్నికల సంఘం కార్యాలయం ఎదుట ఇండియా కూటమి ఎంపీల నిరసన
సీఈసీ జ్ఞానేశ్‌ కుమార్‌ రాజీనామాకు డిమాండ్‌
ఎన్నికల సంఘం ప్రధాన కమిషనర్‌ (సీఈసీ) జ్ఞానేశ్‌ కుమార్‌ రాజీనామా చేయాలని డిమాండ్‌ చేస్తూ ప్రతిపక్ష ఇండియా కూటమి ఎంపీలు మంగళవారం ఢిల్లీలో నిరసన చేపట్టారు. పార్లమెంట్‌ నుంచి ఎన్నికల సంఘం ప్రధాన కార్యాలయం ‘నిర్వాచన్‌ సదన్‌’ వరకు ర్యాలీగా బయలుదేరారు. ‘సేవ్‌ డెమోక్రసీ’ అంటూ బ్యానర్లు ప్రదర్శిస్తూ, జ్ఞానేశ్‌ కుమార్‌కు వ్యతిరేకంగా నినాదాలు చేశారు.ఎన్నికల సంఘం కార్యాలయం వైపు వెళ్లకుండా పోలీసులు అడ్డుకోవడంతో లోక్‌సభ ప్రతిపక్ష నేత రాహుల్‌ గాంధీ బారికేడ్‌పైకి ఎక్కారు. అనంతరం అక్కడే బైఠాయించి ధర్నాకు దిగారు. దీంతో ఆ ప్రాంతంలో కొద్దిసేపు ఉద్రిక్త వాతావరణం నెలకొంది.జ్ఞానేశ్‌ కుమార్‌పై ఆందోళనను మరింత ఉద్ధృతం చేసేందుకు కాంగ్రెస్‌ ఇప్పటికే కార్యాచరణ సిద్ధం చేసింది. ఈ అంశాన్ని పార్లమెంట్‌ శీతాకాల సమావేశాల వరకు ప్రజల్లో చర్చలో ఉండేలా కార్యక్రమాలు చేపట్టాలని నిర్ణయించింది. కాంగ్రెస్‌ ఎన్నికల సంఘాన్ని ‘చీటింగ్‌ కమిషన్‌’గా పేర్కొంటోంది.అక్టోబర్‌ 10 నుంచి 20 వరకు ‘సేవ్‌ ఓట్‌.. సేవ్‌ కంట్రీ’ పేరుతో బ్లాక్‌ స్థాయిలో ప్రచారం నిర్వహించనుంది. సైకిల్‌, బైక్‌ ర్యాలీలు చేపట్టడంతో పాటు జ్ఞానేశ్‌ కుమార్‌ దిష్టిబొమ్మలను దహనం చేయడం, కరపత్రాలు పంపిణీ చేయడం వంటి కార్యక్రమాలు చేపట్టనుంది.అక్టోబర్‌ 25 నుంచి నవంబర్‌ 25 వరకు బూత్‌ స్థాయిలో ‘సేవ్‌ ఓట్‌.. సేవ్‌ కంట్రీ’ చౌపాల్స్‌ నిర్వహించనుంది. వీటిలో కాంగ్రెస్‌ సీనియర్‌ నేతలు పాల్గొంటారు. నవంబర్‌ 1న ఢిల్లీలోని రామ్‌లీలా మైదానంలో భారీ బహిరంగ సభ నిర్వహించనుంది.నవంబర్‌ 25, 26 తేదీల్లో ఢిల్లీ చుట్టుపక్కల ప్రాంతాల నుంచి ఆరు వేర్వేరు ‘చలో ఢిల్లీ’ మార్చ్‌లు చేపట్టాలని నిర్ణయించింది. వేర్వేరు నేతలు వీటికి నాయకత్వం వహిస్తారు. నవంబర్‌ 26న రాజ్యాంగ దినోత్సవం సందర్భంగా ఈ మార్చ్‌లు ఢిల్లీలో కలుస్తాయి.పార్లమెంట్‌ శీతాకాల సమావేశాలు నవంబర్‌ 26 తర్వాత ప్రారంభం కానున్న నేపథ్యంలో.. అక్కడ కూడా ఎన్నికల సంఘం అంశాన్ని లేవనెత్తాలని కాంగ్రెస్‌ భావిస్తోంది. సీఈసీ జ్ఞానేశ్‌ కుమార్‌పై అభిశంసన తీర్మానం ప్రవేశపెట్టే అంశాన్ని కూడా పరిశీలిస్తోంది.ఇదిలా ఉండగా, ఎన్నికల సంఘానికి సంబంధించిన కేసుపై సుప్రీంకోర్టులో విచారణ కొనసాగుతోంది. ఈ కేసులో సీఈసీ జ్ఞానేశ్‌ కుమార్‌, ఎన్నికల సంఘానికి కోర్టు నోటీసులు జారీ చేసింది. ఎన్నికలకు సంబంధించిన నిర్ణయాలు ఏకాభిప్రాయంతో తీసుకోకపోతే వాటిపై నిలుపుదల విధించే అవకాశం ఉండొచ్చని కోర్టు వ్యాఖ్యానించింది.అయితే జ్ఞానేశ్‌ కుమార్‌పై తక్షణ చర్యలు తీసుకునేందుకు సుప్రీంకోర్టు ప్రస్తుతం నిరాకరించింది. పత్రికల్లో వచ్చే వార్తలు ఎప్పుడూ వంద శాతం కచ్చితంగా ఉండకపోవచ్చని పేర్కొంది. కేసుపై తదుపరి విచారణ కొనసాగనుంది.మంగళవారం నాటి ర్యాలీ తర్వాత కూడా తమ ఆందోళనను కొనసాగించాలని ప్రతిపక్షాలు నిర్ణయించాయి. ఈ అంశంపై మరిన్ని ప్రతిపక్ష పార్టీలను తమతో కలుపుకొనేందుకు ప్రయత్నాలు కొనసాగించనున్నాయి.